‘Bakafule Mpanga Shabo Ukube fya Kuliminako Umushili’—Ni Lilali?

ICIMPASHANYA icaishibikwa ica pa cikuulwa ca kabungwe ka United Nations mu New York City cabapo umuntu alefulo lupanga ukuba ica kuliminako umushili. Ici cimpashanya cashimpwa pa kusesema kwa mu Baibolo ukwa pali Esaya icipandwa 2, icikomo 4, na pali Mika icipandwa 4, icikomo 3. Ni shani kabili ni lilali aya mashiwi yakafikilishiwa?

Ilyashi lya nomba line mu nyunshipepala ya The New York Times lyakwete umutwe uwa kuti “Ukushitisha Ifyanso mwi Sonde Lyonse Nakufika pa Madola Amabilioni 30!” Bushe mu 1999 ni bani abali pa ntanshi mu kushitisha ifyanso? United States e yali pa muulu ukushitisha ifyanso ukufika ku madola amabilioni 11.8. E lyo pakonkele Russia iyashitishe ukufika mupepi fye na madola amabilioni 5.9. lelo mu mwaka wafumineko, Russia yalingilisheko ukushitisha ifyanso ukucila pa miku ibili. Lyene pakonkele Germany, China, France, Britain, na Italy. Inyunshipepala imo ine yatwalilile ukuti: “Nge fyo cali kale, ifyanso mupepi na mapesenti 66 fyashitishiwe ku fyalo ifipiina.”

Pa numa ya nkondo shibili isha calo ne nkondo shimbi ishikalamba ishalwikwa mu mwanda wa myaka walenga 20 ishaipeye no kucena abantu abengi, umo kuti aipusha ati: “Bushe ni lilali ifyalo fikasambilila ukwikala umutende ukwabula ukulwa?” Baibolo itila umutende ukaba mu “nshiku [sha ku mpela, NW].” (Esaya 2:2) Na kuba, uku kusesema kulefikilishiwa lelo, pantu Inte sha kwa Yehova mupepi na mamilioni 6 balisumina ‘ukusambilishiwa na Yehova.’ Ici calenga ‘umutende wabo ukufula.’—Esaya 54:13.

Nomba line Yehova ali no kufumyapo ifyanso ne nkondo shonse ukusanshako na bafwilishako, pantu ‘akonaula abaleonaule calo.’ Nga kuti mwatemwa ukwishibilapo na fimbi pali uku kwaluka kushaiwamina, mukwai beni abantungwa ukwipusha Inte sha kwa Yehova mu ncende mwikala nelyo lembeleni ku keyala kalinga ukufuma pe bula 5.—Ukusokolola 11:18.