Ukulingana na Baibolo

Bushe Ifiloto Bukombe Ukufuma Kuli Lesa?

BASOSA ukuti Elias Howe, uwapangile mashini ya kubililako alotele fye inshila aipangilemo. Kashika wa nyimbo Mozart atile imitwe ya nyimbo ishingi isho alembele ashilotele fye. Uwasambilila ifya miti Friedrich August Kekule von Stradonitz na o atungile ukuti aishibe ifyo ka molecule ka benzene kamoneka ukupitila mu ciloto. Ifyalandwapo pa muulu fyaliseeka. Ukufuma ku kale, abantu abengi batunga ukuti ifiloto fifuma ku cintu cakwata amaka yacila pa bantunse. Bamo basumina ukuti ukulota no kulola cimo cine.

Mu Baibolo mwaba amalyashi umo ifiloto fyalondololwa nge ntulo yacindama iya fyebo—inshila ya kulandilamo na Lesa. (Abapingushi 7:13, 14; 1 Ishamfumu 3:5) Ku ca kumwenako, Lesa alandile kuli Abrahamu, Yakobo, na Yosefe mu filoto. (Ukutendeka 28:10-19; 31:10-13; 37:5-11) Imfumu ya ku Babele Nebukadnesari yapokelele ifiloto fyalimo ukusesema ukufuma kuli Lesa. (Daniele 2:1, 28-45) E co bushe kuti kwaba cimo ico twingasuminina ukuti nangu fye ni lelo ifiloto fimo fiba bukombe ukufuma kuli Lesa?

Ifiloto Ukufuma Kuli Lesa

Muli Baibolo, lyonse kwaleba icalelenga ukuti ifiloto fyapuutilwemo na Lesa fipeelwe. Ca cine, inshita shimo uwalota taleumfwikisha apo pene umo iciloto cilolele. Lelo, ilingi “uusokolola ifya nkama” umwine alelondolola pa kuti tapali ukutwishika pa bupilibulo bwa ciloto. (Daniele 2:28, 29; Amose 3:7) Ifiloto ifyalefuma kuli Lesa tafyaleyafyo kufyumfwikisha nge fyo ciba ku filoto ifingi ifya lelo.

Inshita shimo, Lesa alebomfya ifiloto ku kucingilila abantu alebomfya mu kufikilisha ubufwayo bwakwe. Te lyonse abalelota filya filoto baleba ababomfi ba kwa Lesa. Ku ca kumwenako, bakapendula ba ntanda abatandalile Yesu ilyo ali akanya tababwelelemo ku kumona Herode nge fyo abebele. Mulandu nshi? Balisokelwe mu ciloto. (Mateo 2:7-12) Ici calengele Yosefe, wishi umuleshi uwa kwa Yesu, ukucita nge fyo na o aebelwe mu ciloto no kufulumukila ku Egupti no lupwa lwakwe. Ukucite fi kwapuswishe Yesu ilyo aali akanya.—Mateo 2:13-15.

Imyaka iingi mu kubangilila, farao wa ku Egupti alotele ingano 7 ishisuma ne ng’ombe 7 ishaina ukupusanako ne ngano 7 ishabipa ne ng’ombe 7 ishaonda. Pa kwafwilishiwa na Lesa, Yosefe ailwile bwino ifiloto ukuti Egupti yali no kukwata ifya kulya ifingi pa imyaka 7 lyene mwali no kuba icipowe pa myaka 7. Ukwishibila kabela ici kwalengele abena Egupti ukupekanya no kusunga ifya kulya. Ici calyafwile sana ukusungilila abana ba kwa Abrahamu no kubaleta ku Egupti.—Ukutendeka, icipandwa 41; 45:5-8.

Imfumu Nebukadnesari iya ku Babele na yo yalotele iciloto. Casobele ukwima no kuwa kwa fyalo fyakwatisha amaka ukwali no kubako ku ntanshi kabili ukwali no kukuma sana abantu ba kwa Lesa. (Daniele 2:31-43) Pa numa, alotele na fimbi ukukuma ku fyo ali no kupena no kupola ilyo papite nshita. Ici ciloto calimo ukusesema cali no kufishiwapo kwacilapo, calesonta ku kwimikwa kwa Bufumu bwa buMesia, ubo Lesa akabomfya ku kulenga ukufwaya kwakwe ukucitwa.—Daniele 4:10-37.

Bushe Lesa Alalanda na Bantu mu Filoto lelo?

Ca cine ukuti Lesa alandile na bantu ukubomfya ifiloto. Lelo Baibolo ilangilila ukuti te lyonse ici calecitika. Ifiloto te fyo Lesa alebomfya sana pa kulanshanya na bantu. Kwali ababomfi ba kwa Lesa abashatalile abapokelela ubukombe kuli Lesa ukupitila mu filoto. Ifyo Lesa alelanshanya na bantu mu filoto kuti fyalinganishiwa ku fyo ayakenye Bemba wa Kashika. Twalishiba ukuti acitile fye ici umuku umo, lelo te fyo acita ku babomfi bakwe lyonse.—Ukufuma 14:21.

Umutumwa Paulo asumine ukuti mu nshiku shakwe umupashi wa kwa Lesa walengele ababomfi bakwe ukucita ifintu fya kupapusha ifingi. Paulo atile: “Kuli umo kwapeelwa mu Mupashi icebo ca mano, na kuli umbi icebo ca kwishiba, umwabelo Mupashi icebo ca mano, na kuli umbi icebo ca kwishiba, umwabelo Mupashi umo wine; na kuli umbi kwapeelwe citetekelo mu Mupashi umo wine, na kuli umbi ifya bupe fya kuundapila mu Mupashi umo wine; na kuli umbi ukutukute fisunguko, na kuli umbi ukusesema, na kuli umbi ukushininkishe mipashi; kuli umbi indimi sha misango misango, na kuli umbi ukwilule ndimi.” (1 Abena Korinti 12:8-10) Nangu ca kuti ifiloto fyapuutwamo tafyalandwapo muli ili lembo, nalimo Abena Kristu bamo baloteleko ifiloto fyapuutwamo nge ca bupe ca mupashi mu kufikilisha ukusesema kwa pali Yoele 2:28.—Imilimo 16:9, 10.

Lelo, ukulosha ku fya bupe fimo fimo umutumwa atile: “Lelo ukusesema, kukafubalishiwa; kabili indimi, shikaleka; kabili ukwishiba, kukafubalishiwa.” (1 Abena Korinti 13:8) Nge fyo twamona, pa fintu ifyali no ‘kufubalishiwa’ pali inshila shalekanalekana isha kulandilamo na Lesa. Ilyo abatumwa bafwile, Lesa alekele ukupeela ifi fya bupe fyaibela ku babomfi bakwe.

Pali lelo incenshi shicili shilefwaisha ukumfwikisha ukulota no kumona nga kwalicindama. Baibolo tailondolola umulandu tulotela. Lelo, Baibolo ilasoka abapampamina fye pa kupokelela ubukombe ukufuma kuli Lesa mu filoto fyabo. Pali Sekaria 10:2, itila: “Bakabuka, . . . filoto fya fye e fyo basosa.” Lesa na kabili alasoka ukukanacita amalele. (Amalango 18:10-12) Pa mulandu wa uku kusoka, Abena Kristu lelo tabenekela Lesa ukubasoka ukupitila mu filoto. Lelo, bamona ifiloto nge cintu icicitika ilyo umo alele.