Ukulwala Kwalaswa Kupwe Kuli Bonse!
MAGAZINI wa lyashi uwa Focus uwa ku German atile: “Icisambilisho ca kushilwala na kabili . . . naciseeka.” Lelo ici cisambilisho te lelo catendeka. Ilyo abantu balengelwe, Kabumba tatalile afwaya ukuti balelwala. Ubufwayo bwakwe ku bantunse tabwali fye bwa “kufika pa cipimo cimo ica kulenga abantu ba mwi sonde lyonse ukukanalwala.” (Amashiwi yapindeme ni fwe twapindika.) Kabumba wesu afwaile ukuti bonse tube no bumi bwapwililika!
Cinshi kanshi tulwalila?
Baibolo itweba ukuti Yehova Lesa alengele abafyashi ba bantunse bonse, e kuti Adamu na Efa, abapwililika. Ilyo apwishishe ububumbo bwakwe, “Lesa amwene conse ico acitile, kabili, moneni, naciwamisha.” Kabumba wesu uwakwata ukutemwa tatalile afwaya ukuti abantunse balelwala no kufwa. Lelo lintu Adamu na Efa basalilepo ukusha inshila ya ku bumi iyo baebelwe ukukonka, balibembwike. Icatumbwike mu lubembu lwa kwa Adamu ni mfwa, iyaambukile abantunse bonse.—Ukutendeka 1:31; Abena Roma 5:12.
Yehova tashile fye abantunse. Kabili talabileko ku co alengele abantu ne sonde. Muli Baibolo yonse, alisokolola ubufwayo bwakwe ubwa kubwesesha abantunse bacumfwila ku mibele ya pa kubala iya kukanalwala. Ilyo Yesu Kristu, Mwana Lesa, ali pano isonde, alangishe amaka ya kwa Lesa aya kuposha amalwele. Ku ca kumwenako, Yesu aundepe impofu, ukuposha aba fibashi, ukukomona bankomamatwi, ukuposha aba lusuku, abafunta, na ba bulebe.—Mateo 4:23, 24; Luka 5:12, 13; 7:22; 14:1-4; Yohane 9:1-7.
Lesa alaswa ebe Yesu Kristu, Imfumu ya buMesia, ukupoka ubutungulushi bwa bantunse ubwa pe sonde. Mu kuteka kwakwe, e mu kafikilishiwa ukusesema kwa kwa Esaya ukutila: “Umwikashi wa mu calo takasose, ati, Nindwala; abantu abaikalamo, bantu abalekelelwa amampuulu yabo.” (Esaya 33:24) Cikacitika shani ici?
Pano kasesema alemba ulwa bantu “abalekelelwa amampuulu yabo.” Kanshi, ulubembu ululenga abantu ukulwala—ulo bapyana fye—lukafumishiwapo. Lukafumishiwapo shani? Umutengo we lambo lya cilubula ilya kwa Yesu ukabomfiwa ku bantunse bacumfwila, icikalenga no kuti icilenga ukulwala ne mfwa cikafumishiwepo. Paradise akaba konse pano isonde. Umutumwa wa Bwina Kristu Yohane alembele ati: “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kucululuka; pa kuti ifya ntanshi nafiya.” Ico cili no kucitika bwangu!—Ukusokolola 21:3, 4; Mateo, icipandwa 24; 2 Timote 3:1-5.
Ukuba Abashikatala
Pali lelo, abantu abengi balalwalilila. E mulandu wine abantu basakamikilwa pa bumi bwabo no bwa batemwikwa babo.
Abena Kristu balatasha nga nshi ukubombesha kwa ncenshi sha fya cipatala. Balacitapo fimo pa kuti babe nelyo ukutwalilila abatuntulu. Lelo, ubulayo bwa mu Baibolo ubwa nshita kushakabe ukulwala bulatwafwa ukuba abashikatala muli ulu lubali. Ilyo Imfumu ya buMesia tailapoka imitekele yonse iya bantunse, te kuti cicitike ukwikala ukwabula ukulwala. Nga fintu twamona, nangu batukute shani balifilwa ukusaba ico twingeta ati iapele lyalowesha ilyaba pa kantongolilo ka muti wa maapele—e kutila ukulenga abantunse bonse ukukanalwala.
Ubuyo bwa “kufika pa cipimo cimo ica kulenga abantu ba mwi sonde lyonse ukukanalwala” bwalaswa bufikwepo. Lelo te kuli ba United Nations nelyo ba World Health Organization nangu ba environmental planners (abalolekesha pa misungile ya mpanga) nelyo abesha ukuwamya imikalile ya bantu nangu kuli badokota. Uukabomba uyu mulimo ni Yesu Kristu. Fintu cikawama ilyo abantu kuli pele pele ‘bakalubulwa ku busha bwa kubola no kutwalwa mu buntungwa bwa bana ba kwa Lesa’!—Abena Roma 8:21.
[Ifikope pe bula 10]
Takwakabe nangu umo uukalalwala mu calo cipya ica kwa Lesa