Watchtower LAIBRARE YA PA INTANETI
Watchtower
LAIBRARE YA PA INTANETI
Cibemba
  • BAIBOLO
  • IMPAPULO
  • UKULONGANA
  • w08 11/15 amabu. 23-27
  • Muleibukisha Ifyo Amalembo Yalanda Ilyo Mulefwaya Ukundapwa

Vidio mulefwaya tamuli

Mukwai yafilwa ukutambika

  • Muleibukisha Ifyo Amalembo Yalanda Ilyo Mulefwaya Ukundapwa
  • Ulupungu lwa kwa Kalinda—2008
  • Utumitwe utunono
  • Ifipalileko
  • Tacalubana Ukubika Amano ku Bumi Bwesu
  • Mwicishamo Ukusakamikwa pa Bumi Bwenu
  • Finshi Ifyacilapo Ukucindama?
  • Calicindama “Ukuba na Mano”
  • “Lekeni Abantu Bonse Beshibe Ukuti Muli ba Mutembo”
  • Ukukanasakamikwa Sana pa Bumi Bwesu Ilyo Tulepembelela Ubumi Bwapwililika
  • Ubumi Ubumi
    Loleni!—2013
  • Ukulwala Kwalaswa Kupwe Kuli Bonse!
    Loleni!—2001
  • Ifyo Mwingacita nga Mwalwala mu Kupumikisha
    Amalyashi Ayalekanalekana
  • Abantu bonse bafwaya ukwikala ukwabula ukulwala!
    Loleni!—2007
Moneni na Fimbi
Ulupungu lwa kwa Kalinda—2008
w08 11/15 amabu. 23-27

Muleibukisha Ifyo Amalembo Yalanda Ilyo Mulefwaya Ukundapwa

“Muletemwa Yehova Lesa wenu . . . no kutontonkanya kwenu konse, na maka yenu yonse.”—MARKO 12:30.

1. Bushe ilyo Lesa abumbile abantu alefwaya ukuti baleikala shani?

ILYO Yehova Lesa abumbile abantu, talefwaya ukuti balelwala no kulafwa. Abikile Adamu na Efa mwi bala lya Edene, nelyo mu paradaise, “ku kulilima no kulisakamana,” te pa myaka fye 70 nelyo 80, lelo ku ciyayaya. (Ukute. 2:8, 15; Amalu. 90:10) Abatwalilila ukuba aba cishinka kuli Yehova no kunakila ukuteka kwakwe, nga tabalelwala, ukukota, no kufwa.

2, 3. (a) Bushe ubukote babulondolola shani mwi buuku lya kwa Lukala Milandu? (b) Nani walengele ukuti abantu batampe ukulafwa, kabili imfwa ikafumapo shani?

2 Mu Baibolo, muli Lukala Milandu icipandwa 12, balilondolola bwino sana ifyo ciba mu “nshiku sha bubi” ishiisa mu bukote. (Belengeni Lukala Milandu 12:1-7.) Imfwi bashipashanya ku maluba yabuuta aya “muti wa mualmonde.” Amolu bayapashanya ku “baume ba maka” abenama, abatutuma pa kwenda. Abanakashi abalengela mu mawindo ku kufwayafwaya ulubuuto nomba basanga fye imfifi, menso, nga yalafilwa ukumona bwino bwino. Ukupwa kwa meno mu kanwa bakupashanya ku “banakashi abapela abaleka ukubomba pantu nabacepa.”

3 Lintu Lesa abumbile umuntu, tamubumbile ukuti amolu yaletutuma, alefilwa ukumona, nangu ukukanakwata ameno mu kanwa. E lyo imfwa iyo twapyana kuli Adamu yaba pa “milimo ya kwa Satana Kaseebanya” iyo Umwana wa kwa Lesa ‘akonaula’ ukupitila mu Bufumu bwakwe ubwa buMesia. Umutumwa Yohane alembele ukuti: “Ni pali uyu mulandu Umwana wa kwa Lesa amonekele, pa kuti onaule imilimo ya kwa Satana Kaseebanya.”—1 Yoh. 3:8.

Tacalubana Ukubika Amano ku Bumi Bwesu

4. Mulandu nshi ababomfi ba kwa Yehova babikila amano ku bumi bwabo, kabili cinshi baishiba?

4 Pali ino nshita, ababomfi ba kwa Yehova bamo balalwala, no kukota balakota nga filya fine fye ciba ku bantu bonse ababembu. Ukubika amano ku bumi bwesu ilyo twalwala nelyo ukukota takwalubana e lyo kuti catuwamina no kutuwamina. Na kuba tufwaya ukubombela Yehova ‘na maka yesu yonse’! (Marko 12:30) Nomba, ilyo tule-esha ukuba no bumi busuma, tatufwile ukucilamo ukusakamana, kabili tufwile ukwishiba ukuti te kuti tukumemo ukuicingilila pa kuti twilalwala nelyo ukukota bwangu.

5. Cinshi twingasambilila ku fyo ababomfi ba kwa Lesa aba cishinka bacitile ilyo balecula ku malwele?

5 Ababomfi ba cishinka aba kwa Yehova abengi balecula ku malwele. Umo pali aba ni Epafroditi. (Fil. 2:25-27) Na Timote, cibusa mwine mwine uwa kwa Paulo na o alelwalilila mu mala ica kuti Paulo amwebele ‘ukulanwako umwangashi uunono.’ (1 Tim. 5:23) Na Paulo wine aliculile ku “muunga mu mubili.” Uyu muunga nalimo wali kulwala amenso nelyo ubulwele bumbi ubo bashaishibe ukuposha pali ilya nshita. (2 Kor. 12:7; Gal. 4:15; 6:11) Paulo alipaapaatile sana Yehova ukuti amundape kuli uyu “muunga mu mubili.” (Belengeni 2 Abena Korinti 12:8-10.) Lesa taundepe Paulo mu cipesha amano. Lelo, alimupeele amaka ya kushipikisha. E ico, amaka ya kwa Yehova yamonekele mu kunaka kwa kwa Paulo. Bushe kuli ifyo twingasambilila kuli ici?

Mwicishamo Ukusakamikwa pa Bumi Bwenu

6, 7. Mulandu nshi tushilingile ukucishamo ukusakamana pa bumi bwesu?

6 Nge fyo mwaishiba, Inte sha kwa Yehova balasumina ukubondapa mu nshila ishalekanalekana. Ilingi line, muli magazini yesu iya kuti Loleni! mulaba amalyashi ayalanda pa fya kusakamana ubumi. Kabili nangu ca kuti tatweba abantu imyundapile balingile ukusalapo, tulatasha pa fyo aba fya cipatala batwafwilisha. Kwena twalishiba ukuti te kuti tube no bumi bwapwililika pali ino nshita. E ico, twalishiba ukuti tatufwile ukucishamo ukusakamana pa bumi bwesu. Tatufwile ukuba nga bantu bambi “ababula isubilo,” abamona kwati ubumi ubo bali na bo pali ino nshita, e bumi fye bweka ubwabako kabili abengacita icili conse pa kuti fye bapole. (Efes. 2:2, 12) Tatufwaya nangu panono ukonawilapo bucibusa bwesu na Yehova pa kuti fye twifwa bwangu, pantu twalishinkisha ukuti nga twatwalilila ukuba ne cishinka kuli Lesa, ‘tukekatisha ku mweo wine wine,’ e kutila ku mweo wa muyayaya mu calo cipya ico Yehova atulaya.—1 Tim. 6:12, 19; 2 Pet. 3:13.

7 Kwaliba umulandu na umbi tushicililamo ukusakamana pa bumi bwesu. Nga twacilamo ukusakamana kuti twalatontonkanya fye pa fyo tufwaya ne fyo tukabila. Paulo alisokele abena Filipi kuli ubu bwafya lintu atile ‘mwilabika fye amano ku fyo mulefwaya fye mwe bene, lelo mulebika amano na ku fyo bambi bafwaya.’ (Fil. 2:4) Tacabipa ukulaisakamana, lelo ukusakamana bamunyinefwe na bantu tutwalila “imbila nsuma iyi iya bufumu” kukatwafwa ukukanacishamo ukulatontonkanya fye pa bumi bwesu.—Mat. 24:14.

8. Bushe ukucishamo ukubika amano ku bumi bwesu kuti kwalenga twalacita cinshi?

8 Ubwafya bumbi bwa kuti Umwina Kristu kuti acindamika sana ubumi bwakwe ukucila ifya Bufumu. Lyonse nga tuletontonkanya fye pa kukwata ubumi busuma kuti twatampa no kulapatikisha bambi ukulakonka ifyo twaishiba pa kundapa kumo nelyo pa fya kulya fimo. Ukucila ukulacita ifi, moneni icishinte caba mu mashiwi Paulo asosele ayatila: “Mwishibe bwino bwino ifyacilapo ukucindama, pa kuti mube ababula akabi kabili abashipunwisha bambi ukufika pa bushiku bwa kwa Kristu.”—Fil. 1:10.

Finshi Ifyacilapo Ukucindama?

9. Cinshi cimo icaba pa fintu ifyacilapo ukucindama ico tushilingile ukulekelesha, kabili mulandu nshi?

9 Nga tuleishiba ifintu ifyacilapo ukucindama, tukalabombesha mu mulimo wa kwafwa bambi ukuba ifibusa fya kwa Lesa. Kuti twabafwa nga tulebomba umulimo wa kushimikila imbila nsuma no kusambilisha Icebo ca kwa Lesa. Uyu mulimo ulatunonsha kabili ulanonsha na bantu tusambilisha. (Amapi. 17:22; 1 Tim. 4:15, 16) Mu Ulupungu lwa kwa Kalinda na muli Loleni! limo limo mulaba amalyashi ayalanda pali bamunyinefwe abalwalilila. Aya malyashi yalalondolola ifyo aba ba bwananyina bakumamo ukushipikisha ubulwele nelyo ukulabako panono ku bulwele bwabo pa kuti fye baleafwilisha abantu bambi ukwishiba Yehova na malayo yakwe ayasuma.a

10. Mulandu nshi tufwile ukubikilako amano ku musango wa myundapile twingasala?

10 Umwina Kristu umukalamba nga alwala, mwine e ‘ukasenda icipe cakwe,’ e kutila e ufwile ukuisalila umusango wa kundapa uo alefwaya. (Gal. 6:5) Lelo tufwile ukulaibukisha ukuti umusango wa kundapa uo tulesala kuti walenga bucibusa bwesu na Yehova ukutwalilila nelyo ukupwa. Pa mulandu wa kuti twalicindamika ifishinte fyalembwa mu Baibolo, tulomfwila ifyebo fitila ‘talukeni . . . ku mulopa.’ Kanshi ifi fine e fyo tufwile ukucita na pa kusala umusango wa kundapa. Tatufwile ukusumina ukundapa ukupula mu mafunde ya mu Baibolo nelyo ukwingonaula bucibusa bwesu na Yehova. (Imil. 15:20) Imyundapile imo iishaishibikwa bwino bwino, ilapalana no kupupa imipashi. Yehova alyebawile abena Israele abamupondokele, abatampile ukulabomfya “ifinjelengwe” nelyo ukupupe mipashi. Abebele ukuti: “Lekeni ukuleta imituulo ya ngano iya fye. Ifyanunkila fya bunani kuli ine. Umweshi upya ne sabata, ukulonganya abantu, nintendwa ne fya finjelengwe fyenu no kulongana kwacindamisha.” (Esa. 1:13) Nga twalwala tatufwile ukufwaya ukundapwa ukwingonaula bucibusa bwesu na Yehova no kulenga amapepo yesu ukukanaumfwika kuli ena.—Inyimbo 3:44.

Calicindama “Ukuba na Mano”

11, 12. Bushe “ukuba na mano” kwacindama shani ilyo tulesala imyundapile?

11 Nga natulwala te kuti twenekele Yehova ukutundapa mu cipesha amano lelo kuti twamulomba amano ayengatwafwa ukusala bwino imyundapile. Tufwile ukumfwila ifishinte fya mu Baibolo kabili tufwile ukutontonkanya pa myundapile tulefwaya ukusala. Nga ca kutila ubulwele bwesu bukalamba, kuti cawama ukumonana na badokota abalekanalekana abaishiba bwino ukundapa ubo bulwele, nga filya ilembo lya Amapinda 15:22 litweba ukuti: “Abantu nga tabalelanshanya amapange yalafulungana, lelo ukuli abapanda amano abengi amapange yalafikilishiwa.” Umutumwa Paulo akonkomeshe Abena Kristu banankwe ukusambilila “ifya kuba na mano, ifya kuba abalungami ne fya kuba na bukapepa muli buno bwikashi bwa nomba.”—Tito 2:12.

12 Abengi pali lelo baba nga ulya mwanakashi walwele mu nshiku sha kwa Yesu. Pali Marko 5:25, 26 tubelengapo ukuti: “Awe kwali umwanakashi uwalefuma umulopa pa myaka ikumi na ibili (12), kabili aculile nga nshi kuli bakondapa abengi abaeseshe ukumuposha kabili apooselepo icuma cakwe conse lelo tapolele, e lyo alwalileko.” Yesu alyundepe ulya mwanakashi kabili ali ne cikuuku kuli ena. (Marko 5:27-34) Pa mulandu fye wa kufwaya ukupola, Abena Kristu bamo balisala umusango wa kubondapilamo uo Umwina Kristu wine wine ashilingile ukusala.

13, 14. (a) Bushe Satana kuti abomfya shani imyundapile twasala ku konaula bucishinka bwesu? (b) Mulandu nshi tulingile ukutalukila ku cintu fye conse umwaba ukupupa imipashi?

13 Satana kuti acita icili conse pa kuti atulufye tufume mu kupepa kwa cine. Nga filya fine fye abomfya ubulalelale no kutemwisha ifyuma pa kulufya abantu, alesha ukonaula bucishinka bwa bamo ukupitila mu kupupe mipashi no kubomfya ukundapa kwa mipashi ibifi. Apo tulalomba Yehova ukuti ‘etutwala mu kutunkwa’ no kutubaka “ku musango onse uwa bumpulamafunde,” tatufwile ukusumina ukundapa ukubomfya imipashi ibifi pantu ninshi tuleituula mu minwe ya kwa Satana.—Mat. 6:13; Tito 2:14.

14 Yehova alikenye abena Israele ukubuka imbuko no kucita ifinjelengwe. (Amala. 18:10-12) Paulo atile “ukupupa imipashi” kwaba pa “micitile ya muntu umubembu.” (Gal. 5:19, 20) Na kabili, “abapupa imipashi” tabakengile mu calo cipya ica kwa Yehova. (Ukus. 21:8) Kanshi icintu fye conse umuli ukupupa imipashi ca bunani kuli Yehova.

“Lekeni Abantu Bonse Beshibe Ukuti Muli ba Mutembo”

15, 16. Mulandu nshi tukabila ukubela na mano ilyo tulesala imyundapile, kabili kufunda nshi ukusuma ukwafumine kwi bumba litungulula ilya mu nshita ya batumwa?

15 Ukulingana ne fyo twasambilila, nga tuletwishika imyundapile imo, kuti cawama ukukaana. Nomba, nga ca kuti ifwe pa lwesu twafilwa ukulondolola bwino bwino ifyo imyundapile imo yaba te kuti ninshi muli iyo myundapile mwaliba ukupupa imipashi. Pa kuti tukonke ifyo Amalembo yalanda ilyo tulesala imyundapile, tukabila ukuba na mano ayaba mu Cebo ca kwa Lesa no kulailuka bwangu ifintu. Mu Amapinda icipandwa 3 mwaba uku kukonkomesha ukutila: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe. . . . Sunga amano yene yene no kulingulula, na fyo fikaba e mweo obe kabili icisaamo mu mukoshi obe.”—Amapi. 3:5, 6, 21, 22.

16 E ico pa kusakamana ubumi bwesu bwino bwino, tufwile ukucenjela pa kuti tatonawile bucibusa bwesu na Lesa ilyo tulefwaya ukundapwa ubulwele nelyo ukushipikisha amafya yesa mu bukote. Ilyo tulefwaya ukundapwa, tufwile ukukonka ifishinte fya mu Baibolo pa kuti ‘abantu bonse baishiba ukuti tuli ba mutembo.’ (Fil. 4:5) Muli kalata yacindama sana iyo ibumba litungulula lyatumine ku filonganino fyaliko mu nshita ya batumwa, Abena Kristu babebele ukutaluka ku tulubi, ku mulopa, na ku bulalelale. Muli ilya kalata mwali na aya mashiwi yatila: “Nga muletalukililako fye kuli ifi fintu, mukabomba bwino.” (Imil. 15:28, 29) Mu nshila nshi?

Ukukanasakamikwa Sana pa Bumi Bwesu Ilyo Tulepembelela Ubumi Bwapwililika

17. Bushe ukumfwila ifishinte fya mu Baibolo kwatwafwa shani?

17 Ifwe umo umo tufwile ukuipusha ukuti: ‘Bushe nalimona ubusuma ubwaba mu kukonka ifishinte fya mu Baibolo ifilanda pa mulopa na pa bulalelale?’ Tontonkanyeni na pa fyo ubumi bwesu bwawama pa mulandu wa kwesha na maka ‘ukuisangulula kuli fyonse ifikowesha umubili no mupashi.’ (2 Kor. 7:1) Ukukonka ifyo Baibolo yalanda pa busaka kwalenga ukuti twilalwala amalwele ayengi ayo bambi balwalako. Tulamwenamo pantu tulakaana ukupeepa fwaka no kubomfya imiti bubi bubi ingakowesha imibili yesu no konaula bucibusa bwesu na Lesa. Tontonkanyeni na pa fyo ubumi bwesu bwawama pa mulandu wa kukanacishamo ukulya no kunwa ubwalwa. (Belengeni Amapinda 23:20; Tito 2:2, 3.) Nangu cingati ukutuusha no kutukusha umubili na ko kuti kwalenga twaba no bumi ubusuma, icalenga ukuti tube no bumi busuma e lyo no kuba na bucibusa busuma na Lesa, ni co tulomfwila ifyo Amalembo yalanda.

18. Cinshi ico tulingile ukubikako sana amano, kabili kusesema nshi ukulanda pa bumi ubusuma ukukafikilishiwa?

18 Ne cacindamisha ca kuti tufwile ukubikako sana amano kuli bukapepa bwesu no kukosha bucibusa bwesu ubwacindama nga nshi na Shifwe, Intulo ya “bumi [twakwata] pali nomba e lyo [no bo tukakwata] ku ntanshi” mu calo cipya ico alaya. (1 Tim. 4:8; Amalu. 36:9) Mu calo cipya ica kwa Lesa, mukaba ukundapwa ku mubili na ku mupashi pantu kukaba ukwelelwa imembu ukupitila mu cilubula ce lambo lya kwa Yesu. Umwana wa Mpaanga uwa kwa Lesa, Yesu Kristu, akatutungulula “ku tumfukumfuku twa menshi ya mweo,” kabili Lesa akafuuta ifilamba fyonse ku menso yesu. (Ukus. 7:14-17; 22:1, 2) E lyo no ku kusesema ukusuma nga nshi kukafikilishiwa, ukutila: “Kabili takuli umwikashi uukatila: ‘Nindwala.’”—Esa. 33:24.

19. Ilyo tulesakamana ubumi bwesu, finshi ifyo twaishiba?

19 Twalishininkisha ukuti ukulubuka kwesu nakupalama, kabili tulafwaisha ukuti ubushiku Yehova akapwisha ukulwala no kufwa bukafike bwangu. Nomba ilyo ifi fishilacitika, twalishiba ukuti Shifwe uwatutemwa akulatwafwa ukulashipikisha amalwele pantu ‘asakamana ifwe.’ (1 Pet. 5:7) Kanshi natulesakamana ubumi bwesu, lelo lyonse ilyo tulecita ifi tufwile ukulaumfwila ukufunda ukwaba mu Cebo ca kwa Lesa!

[Futunoti]

a Kuti mwasanga imitwe ya aya malyashi mu mukululo waba mu Ulupungu lwa kwa Kalinda ulwa September 1, 2003, pe bula 17.

Ukupitulukamo

• Nani walenga ukuti tulelwala, kabili nani akatulubula ku macushi tupitamo pa mulandu wa lubembu?

• Nangu cingati caliba fye bwino ukusakamana ubumi bwesu, cinshi ico tushilingile ukucita?

• Mulandu nshi tufwile ukubikilako amano ku musango wa myundapile twingasala?

• Mulandu nshi ubumi bwesu bwingawamina nga tuleumfwila ifishinte fya mu Baibolo?

[Icikope pe bula 23]

Ilyo Lesa abumbile abantu, tababumbile ukuti balelwala no kukota

[Icikope pe bula 25]

Nangu cingati abantu ba kwa Yehova na bo balalwalilila, balaba ne nsansa ilyo balebombako umulimo wa kushimikila

    Impapulo sha mu Cibemba (1982-2025)
    Isaleni
    Isuleni
    • Cibemba
    • Peleniko Bambi
    • Ifyo Mwingasala
    • Copyright © 2025 Watch Tower Bible and Tract Society of Pennsylvania
    • Ifya Kubomfya
    • Amafunde Yesu
    • Privacy Settings
    • JW.ORG
    • Isuleni
    Peleniko Bambi