Ukulingana na Baibolo

Bushe Lesa Akasuulako Amabunake Yesu?

‘Nshili mubifi! Nalyesha nga nshi ukuleka imyendele yandi iyabipa, lelo naba fye no bunake!’

BUSHE ifi e fyo muyumfwa nelyo e fiyumfwa uo mwaishiba? Abengi batila ni cikanga mufilwe ukubombela pa mabunake ya mibele iyalimba imishila. Abantu bamo balikunkuma ku bwalwa, fwaka, nelyo imiti ikola. Ubufunushi bwaliteeka abantu abengi. Na kabili kwaliba abo abalemenena ku kucita bucisenene, ukubepekesha ukuti calilaala calipwa balikunkuma ku bulalelale.

Ukulingana ne fyo calembwa pali Mateo 26:41, Yesu mu cikuuku alondolwele ifyo aishibepo pa mabunake ya buntunse.a Na kuba, icalembwa ca Baibolo onse cilondolola bwino ukuti Yehova Lesa na Yesu cine cine ba nkumbu ku bantunse. (Amalumbo 103:8, 9) Lelo bushe kuti twaenekela Lesa ukusuulako amabunake yesu bonse?

Mose na Davidi

Bebeteni ilyashi lya kwa Mose. Aishibikwe ngo “wafuukisha ukucilamo mu bantu bonse aba pano isonde,” kabili atukwite ukubakilila iyo imibele isuma. (Impendwa 12:3) Ilyo abena Israele baleenda mu matololo, libili libili balepondoka no kukanacindika Lesa na beminishi bakwe. Muli fi fyonse, Mose mu kuicefya alelomba ubutungulushi bwa bulesa.—Impendwa 16:12-14, 28-30.

Lelo ilyo fye ulwendo lwalepa ulwa kunasha lwaile lulepwa, alikalipe pa ntanshi ya luko lonse no kukanaumfwila amafunde ya kwa Lesa. Lesa alimwelela, lelo bushe Alisuulileko ku fyo acitile? Awe. Aebele Mose ati: ‘Ico tauntetekele . . . , e co tawakengishishe ulukuta ulu mu calo ico nkabapeela.’ Mose taali na kwingila mu Calo Calaiwe. Pa numa ya myaka 40 iya kubombela ishuko lisuma, ubunake bwa buntunse ubwabipa bwalengele alilufye.—Impendwa 20:7-12.

Imfumu Davidi yali mwaume wa bukapepa na umbi uwali no bunake. Pa nshita imo aali no lunkumbwa kabili aleele no mukashi wa mwaume umbi. Lyene afwaile ukufishilisha umulandu pa kwipaisha umulume wakwe. (2 Samwele 11:2-27) Pa numa, ali no bulanda sana pa bubifi bwakwe, kabili Lesa alimwelela. Lelo Davidi aonawile ulupwa, kabili Yehova tamucingilile ku tuyofi twabipa utwamuponene. Umwana mwaume wa kwa Davidi alilwele nga nshi, kabili Yehova tanyantukilemo te mulandu na mapepo Davidi alepepela umwana wakwe. Umwana alifwile kabili pakonkele utuyofi utwingi mu ng’anda ya kwa Davidi. (2 Samwele 12:13-18; 18:33) Ubunake bwakwe ubwa mibele bwalengele Davidi alobolola ifyabipa.

Ifi fya kumwenako filanga ukuti Lesa alaleka abantunse ukushingamwa ifitumbuka mu myendele yabo. Abo abafwaya ukumubombela bafwile ukuwamya amabunake yabo aya ku mupashi pa kuti babe Abena Kristu basuma. Mu kutendeka kwa buKristu, abengi balicitile co.

Ukubombesha ku Kucimfya Ulubembu

Umutumwa Paulo amonwa nge ca kumwenako ca mikalile ya Bwina Kristu. Lelo bushe mwalishibe ukuti aleshomboka lyonse na mabunake yakwe? Abena Roma 7:18-25 balondolola bwino uku kushomboka, nelyo ukulingana ne cikomo 23, ubu ‘bulwi.’ Paulo ashombweke ukwabula ukuleka, pantu alishibe ukuti ulubembu lwa mutatakuya.—1 Abena Korinti 9:26, 27.

Bamo abaali mu cilonganino ca Bwina Kristu ica mu Korinti wa pa kale balecita ifibi lyonse. Baibolo isosa ukuti baali ‘aba bulalelale, abacende, abaume abalaala na baume banabo, abapuupu, abafunushi, bacakolwa.’ Lelo isosa no kuti ‘balisambilwe.’ (1 Abena Korinti 6:9-11) Basambilwe shani? Ukwishiba kwine kwine, ukubishanya kwa Bwina Kristu, no mupashi wa kwa Lesa fyalibakoseshe ukuleka imicitile yabo iyabipa. Kwi pele pele, balilungamikwe kuli Lesa mwi shina lya kwa Kristu. Ca cine, Lesa alibalekelele, e co abapeele kampingu uwasanguluka.—Imilimo 2:38; 3:19.

Paulo na Bena Kristu ba mu Korinti tabaleti ukukanapwililika kwabo kwali kantu akanono. Ukucila, balebombelapo, kabili mu kuba no kwafwa kwa kwa Lesa balicimfishe. Balya bakapepa ba mu mwanda wa myaka uwa kubalilapo bali abasuma mu mibele, te mulandu na bantu baleikala na bo kabili no kukanapwililika. Nga ifwe?

Lesa Enekela Ifwe Ukubombela pa Mabunake Yesu

Ukubombela pa bunake napamo teti kulenge ukubupwisha umupwilapo. Teti tubupwishe nangu line tatukabila ukutekelesha ukukanapwililika kwesu. Kufyala amabunake ayengaba nalimo aya mutatakuya. Na lyo line tatufwile ukutekelesha amabunake yesu. (Amalumbo 119:11) Mulandu nshi ici cacindamina?

Pantu Lesa tasuminisha ukukanapwililika ukuba ubwelelo bwa lyonse ku myendele yabipa. (Yuda 4) Yehova afwaya abantunse ukusanguluka, ukuba ne mikalile ya mibele isuma. Baibolo itila: “Patisheni icabipa.” (Abena Roma 12:9) Mulandu nshi Lesa apampamina fye pali ci?

Umulandu umo waba wa kuti mwaliba ububi mu kucita ififwaya ubunake bwesu. Baibolo isosa pa Abena Galatia 6:7 ati: “Ico umuntu alebyala, e co kabili akalobolola.” Abakunkuma, abafunushi, na bacisenene ilingi line balobolola ifyabipisha mu bumi bwabo. Lelo kwaliba umulandu wacindamisha.

Ulubembu lulakalifya Lesa. Lulenga ‘ukupaatulanya’ pa kati ka ifwe na Yehova. (Esaya 59:2) Apo abacita ulubembu te kuti basenaminwe na wene, abakonkomesha ati: “Sambeni, isangululeni; . . . lekeni ukucito bubi.”—Esaya 1:16.

Kabumba wesu wa kutemwa kabili wa nkumbu. “Tafwaya umuntu nangu umo ukonaulwa lelo afwaya bonse bafike ku kulapila.” (2 Petro 3:9) Lesa te kuti atusenamine nga lyonse tulenakila ku bunake bwesu. Apo Lesa tasuulako amabunake yesu, na ifwe bene tatufwile ukusuulako.

[Futunoti]