Bushe Ifilayo fya Kutaluka ku Bulalelale Filabomba?

MULI ino myaka, abaice abengi nabatemwa ukulaya ukuti tabakabale abacita ubulalelale. Mu filayo fyabo batila: “Nshakabale nsendama na muntu mpaka icupo.” Aya malayo yalanga ukuti balafwaya ukucite cisuma ico Baibolo ilanda. (1 Abena Korinti 6:18; Abena Efese 5:5) Nangu ni fyo, amalayo yabo yalatwishikwa nga kuti yabomba. Pa bapungwe abo baipwishe, casangilwe ukuti ukucila pali hafu batobele ifilayo fyabo ninshi no mwaka umo taulapwa.

Cilasakamika na kabili ukwishiba umo abaice balosha nga batila “balitaluka ku bulalelale” nelyo “balisunga bunacisungu bwabo.” Icitabo citila Boy Crazy, ico baCharlene C. Giannetti na baMargaret Sagarese balembele, cisosa ukuti: “Abafwailisha pali uyu mulandu batila abaice abengi abafwaya ukuba banacisungu balaipoosa mu kuulungana kwa kufyompana ifya mfwalo e lyo no kwampanina ku numa. Bena bamona kwati ifi fintu te bulalelale.”

Abengi e fyo batontonkanya. Ilyo baipwishe abaice abacilile nalimo 1,000, kalemba umo atile: “Pa baice 100 paleba fye umo nelyo babili abasumine ukuti ukufyompa ica mfwalo nelyo ukwampanina ku numa, bulalelale.” Na kabili atile: “Mulingile ukwishiba ukuti nalimo ifi e fyo na bana benu abapungwe nelyo abana benu abashilafika ne myaka 13 batontonkanya.”

Abomfwila amafunde ya Baibolo balishiba ukuti ukufyompa ica mfwalo nelyo ukwampanina ku numa bulalelale ubwabipisha. Ukufunda kwa Baibolo ukwa kuti ‘talukeniko ku bulalelale’ atemwa (“fumeniko ku fya bulalelale fyonse fye,” Today’s English Version) kusanshamo imisango yonse iya bulalelale.—1 Abena Tesalonika 4:3.