IFYO BAIBOLO ISAMBILISHA | UBWALWA

Ubwalwa

Bushe calibipa ukunwa ubwalwa?

‘Ubwalwa bwa mwangashi bwakusansamusha, na mafuta ya maolife yakuyemfya umubili, no mukate wakupeela amaka.’—Amalumbo 104:15, “Bible wa Mushilo 1983.”

IFYO ABANTU BALANDA Mu mayanda ayengi, abantu balanwa ubwalwa lyonse ilyo balelya ifya kulya. Nomba mu mayanda yambi, tabafwaya nangu fye panono ukunwa ubwalwa. Mulandu nshi abantu bapusanina mu fyo bamona ukunwa ubwalwa? Kwaliba ifintu ifingi ifilenga, pamo nga intambi, amalwele, e lyo no ko bapepa.

IFYO BAIBOLO ISAMBILISHA Baibolo yalilesha bucakolwa no kunwesha ubwalwa lelo tayalesha ukunwa mu kulinga. (1 Abena Korinti 6:9, 10) Kwena ukutula fye na kale, abaume na banakashi abalepepa Lesa balenwa umwangashi, kabili ishiwi lya kuti umwanganshi balililumbula muli Baibolo ukucila pa miku 200. (Ukutendeka 27:25) Pali Lukala Milandu 9:7 patila: “Akuya ulelya ifya kulya fyobe no kusekelela kabili ulenwa umwangashi obe no mutima wabuuta tuutu.” Ilingi line abantu balenwa umwangashi nga kuli imitebeto pamo nga amenga, pantu umwangashi ulasansamusha abantu. Na kuba, ni pa bwinga e po na Yesu Kristu acitile ne cipesha amano ca kubalilapo, ilyo asangwile amenshi ukuba “umwangashi usuma.” (Yohane 2:1-11) Umwangashi baleubomfya na ku kundapilako amalwele yamo.—Luka 10:34; 1 Timote 5:23.

Bushe Baibolo yalibika icipimo ca bwalwa ubo umuntu afwile ukunwa?

‘Mwilatekwa ubusha ku kunwa umwangashi uwingi.’—Tito 2:3.

UMULANDU AYA MASHIWI YACINDAMINE. Cila mwaka, indupwa ishingi shilacula pa mulandu wa kuti umo pa bafyashi nelyo bonse babili balanwesha ubwalwa. Abantu abanwesha ubwalwa ilingi baya balepona fye inshila yonse. Kabili kuti bakwata na masanso yambi pamo nga amasanso ya pa musebo. E lyo mu kuya kwa nshita ukunwesha ubwalwa kuti kwaonaula bongobongo, umutima, amabu, e lyo na mumala.

IFYO BAIBOLO ISAMBILISHA Lesa afwaya kuti abantu nga balenwa nelyo ukulya balelinga. (Amapinda 23:20; 1 Timote 3:2, 3, 8) Nga ca kuti umuntu taleilama, Lesa tatemwa nakalya. Baibolo itila: “Umwangashi ulaleta imiponto, ica kunwa icikola cilenga ulubuli, na onse uupumbukilamo muwelewele.”—Amapinda 20:1.

Inshila imo iyo umuwelewele engapumbulwa ku mwangashi kufilwa ukucita ifisuma. Pali Hosea 4:11 patila: “Umwangashi e lyo no mwangashi uwalowa e fifumyapo umutima wa mano.” Ba John baishileishiba ici cishinka ninshi ifintu nafibipa kale.a Ilyo bakansene na bena mwabo, ba John baile ku hotela uko bailenwa sana ubwalwa, e lyo bacita no bucende. Pa numa, balyumfwile ububi pa fyo bacitile kabili batile tabakatale ababwekeshapo. Ukunwesha ubwalwa kuti kwaonaula ubumi bwesu, kuti kwalenga twaba ne mibele yabipa, no konaula bucibusa bwesu na Lesa. Na kabili, Baibolo itila bacakolwa tabakakwate umweo wa muyayaya.—1 Abena Korinti 6:9, 10.

Ni lilali cinshingawama ukunwa ubwalwa?

“Uwasalapuka nga amona ububi alabelama, lelo imbulwa mano shena shiya fye no kukandwa.” —Amapinda 22:3.

UMULANDU AYA MASHIWI YACINDAMINE Icitabo ca World Book Encyclopedia citila, “Ubwalwa muti uukali.” Kanshi limo no kunwa fye utunono te kuti kuwame iyo.

IFYO BAIBOLO ISAMBILISHA Ilingi abantu balaisanga mu mafya pantu balanwa pa nshita iishilingile. Baibolo itila: “Icintu conse calikwata inshita ya ciko.” Ici cilepilibula ukuti, kwaliba ne nshita iyo umuntu ashilingile ukunwa ubwalwa. (Lukala Milandu 3:1) Ku ca kumwenako, umuntu kuti aba mwaice sana ica kuti talafisha ne myaka iyo ubuteko bwasuminisha ukutendekelapo ukunwa ubwalwa, e lyo limbi kuti kale alikunkwime ku bwalwa kabili acili alelwisha ukupwisha ubu bwafya, nelyo kuti ali pa muti uushumfwana no bwalwa. Kabili ku bantu abengi, inshita iishingawama ukunwa ubwalwa ni lilya bali mu kuya ku ncito na lilya balebomba imilimo yabo, maka maka nga balabomfya fimashini ifingaleta ubusanso. Ukwabula no kutwishika, abantu ba mano baleshiba ukuti ubumi bupe bwacindama ubwafuma kuli Lesa. (Amalumbo 36:9) Kanshi nga tulekonka ifyo amafunde yaba mu Baibolo yatweba pa kunwa bwalwa ninshi tulelanga ukuti twalicindika ubu bupe bwafuma kuli Lesa.

[Futunoti]