IFINGAFWA ULUPWA | ICUPO
Nga Mulomfwana Sana no Uushili Umwina Mwenu
UBWAFYA MUKWETE
Mwalikwata cibusa wenu uushili umwaume nelyo umwanakashi munenu uo mumfwana nankwe sana no kulanda nankwe amalyashi ayali yonse. Mwe bene mutila, ‘tuli fibusa fye,’ lelo abena mwenu bena kuti bafulwa nga baishiba ifyo muteekesha no yo muntu.
Nomba namwiluka ukuti mwalibeleshanya sana no yo muntu kabili mulefwaya ukupwisha ubo bucibusa. Ilyo tushilalanda pa fingamwafwa, intanshi natulande pa fyalengele nalimo ukuti mupange bucibusa bwa musango uyo.
UMULANDU KUBELA UBU BWAFYA
Ukufwaya icisansamushi. Mu cifyalilwa fye, tulomfwa bwino nga uushili umwaume nelyo umwanakashi munensu alelanga ukuti natutemwa. Tulomfwa bwino sana nga twaishiba ukuti umuntu umbi alitubikako amano kabili alitutemwa. Nga mwalikala mu cupo pa myaka iingi, nalimo kuti mwatendeka ukumfwana no muntu umbi uulelanga icitemwiko uushili umwaume nelyo umwanakashi munenu. Nomba mulingile ukwishiba ukuti ukufwaya icisansamushi ku muntu uushili umwina mwenu kuti kwaleta amafya. Nga mwatendeka ukutemwana no muntu uushili umwina mwenu, ninshi icitemwiko mwakwatila abena mwenu cikaya cilepwa. Nga mulecita ifi, kuti mwalafilwa ukulanga abena mwenu icitemwiko ico mulingile ukubalanga.
• Yipusheni amuti, ‘Finshi ndekabila sana ifyo ndesanga muli ici cibusa nkwete no muntu umbi ifyo ningasanga mu cupo candi?’
Icitemwiko nga capwa. Baibolo itila abaupana limo balakwata “amacushi.” (1 Abena Korinti 7:28) Ku ca kumwenako, inshita shimo kuti muleumfwa kwati abena mwenu balimulekelesha nelyo tabamutemwa, e lyo limbi kuti mwalikwata icikonko pa mulandu wa kuti mwalipusene kabili tamwapwishishe ubwafya. Napamo abena mwenu tabafwaya ukulanda pa mafya mukwata kabili ici cilenga muleumfwa ububi ica kutila icitemwiko mwakwatila abena mwenu casuka capwa, mwatendeka no kutemwa umuntu umbi uulelanga ukuti alimutemwa. Abasambilila pa fyupo batila ukukanalanda pa mafya kuti kwalenga insansa ukupwa mu cupo, e lyo ne cupo ukupwa.
• Yipusheni amuti, ‘Bushe mu cupo candi muli ubwafya ubulelenga umutima wandi ukutendeka ukutemwa uushili umwina mwandi?’
IFYO MWINGACITA
Ishibeni ubwafya. Baibolo itila: “Bushe umuntu kuti alapwila umulilo pa cifuba cakwe na malaya yakwe ukwabula ukupya?” (Amapinda 6:27) Icishinka ca kuti ukutendeka ukutemwana no muntu umbi uushili umwina mwenu kuti kwamuletelela. (Yakobo 1:14, 15) Mwilatontonkanya fye pa mafya mwingakwata ku ntanshi pa mulandu wa kupanga bucibusa bwa musango uyu, lelo muletontonkanya na pa bubi ubuli mu fyo mulecita ino ine nshita. Nga mulebika amano ku muntu uushili umwina mwenu, kuti mwalafilwa ukubika amano ku bena mwenu.
Mwilaibepa. Nga muleumfwana sana no muntu uushili umwina mwenu kuti mwatampa ukulaelenganya ifyo mwali no kulaikala bwino nga mwalyupene no yo muntu. Ukucita ifi kulenga mwatendeka ukulinganya umuntu mutemenwe ku bena mwenu no kulamona fisuma ifingi mu munenu e lyo mu bena mwenu mwena mulemonamo fye ifibi. Nomba ukucita ifi takwawama nakalya! Ibukisheni ukuti insansa mumfwa nga mwatontonkanya pa munenu e nsansa mwaleumfwa ilyo mwatendeke fye ukutemwana na bena mwenu.—Ilembo ilingamwafwa: Yeremia 17:9.
Ishibeni umwa kupelela. Abantu balabika ka alamu mu motoka pa kuti kalelila nga kuli uulefwaya ukwiba. E fyo mwingacita na ku cupo cenu. Baibolo itila: “Sunga umutima obe.” (Amapinda 4:23) Kuti mwacita shani ifyo? Esheni ukucita ifi twalalandapo:
• Lekeni uyo cibusa wenu eshibe ukuti mwalitemwana sana na bena mwenu. Ku ca kumwenako, ukubika ifikope fya bena mwenu ku ncito kuti kwalenga uyo muntu ukwishiba ukuti mwalitemwa sana abena mwenu.—Ilembo ilingamwafwa: Ukutendeka 2:24.
• Pingulenipo ifyo mukalacita ne fyo mushingacita no muntu uushili umwina mwenu. Ku ca kumwenako, te kuti ciwame ukulalanda no uushili umwina mwenu pa mafya mulekwata mu cupo nelyo ukuya mu kunwa utwa kunwa no muntu mubomba nankwe uushili umwina mwenu.
• Nga mulomfwana sana no uushili umwaume nelyo umwanakashi munenu, pwisheni ico cibusa. Nga mwasanga ukuti camwafya ukupwisha, yipusheni umulandu mulemwena ukuti nacafya. Mu nshita ya kulacingilila bucibusa mwakwata no yo muntu, bombesheni pa kuti mutemwe abena mwenu kabili citenipo cimo pa kuti mucingilile icupo cenu.—Ilembo ilingamwafwa: Amapinda 5:18, 19.
[Icikope pe bula 9]
[Icikope pe bula 9]
[Akabokoshi pe bula 10]
AMALEMBO AYENGAMWAFWA SANA
“Umutima wa bucenjeshi ukucila fyonse, kabili walipelelwa.” —Yeremia 17:9.
‘Umwaume . . . akalambatila ku mukashi wakwe.’ —Ukutendeka 2:24.
“Sekelela no mukashi wa ku bulumendo bobe . . . Upeshiwe amano pe ku kutemwa kwakwe.”—Amapinda 5:18, 19.
[Akabokoshi pe bula 10]
“BUSHE MUNANDI FYE”?
YIPUSHENI AMUTI:
Bushe ndalanda pa mafya nkwata mu cupo no yu muntu?
Bushe ndacitapo fimo pa kuti fye nkwate inshita ya kuba nankwe?
Bushe ndafisa ici cibusa ku mwina mwandi?
Bushe kuti nacita ifi umwina mwandi nga e po ali?
Bushe umwina mwandi kuti atendeka ukutunganya nelyo ukumfwa ububi nga aumfwako ku malyashi tulanda?