Nga wayishiba bwino kuti wacimfya amafya ayaba nga icimwela icikalamba
ABACAICE
9 Ukuishiba Bwino
UMO UKUISHIBA BWINO KWALOLA
Taufwile ukwishiba fye ifyo umoneka ne shina lyobe, lelo ufwile no kwishiba imibele yobe, ifyo wasuminamo, ne fyo watemwa ukucita. Kanshi ufwile ukuishiba bwino sana.
ICO UKUISHIBA BWINO KWACINDAMINA
Nga ca kuti wayishiba bwino, tawakulacita fye ifyo abanobe balefwaya, lelo wa kulacita ifyo waishiba ukuti fisuma.
“Abantu abengi baaba kwati filubi ifyo bafwika ifya kufwala mwi tuuka. Tafisala ifyo fyalafwala, lelo abantu e bafisalilako.”—E fyalandile Adrian.
“Ndatwalilila ukucita ifyo naishiba ukuti fisuma na lintu ifintu fyafishe. Nga ca kuti namona ukuti ifibusa fyandi filelenga ndecita ifyabipa, ndeshiba ukuti te fibusa fya cine, na kabili ndeshiba ifibusa fya cine nga namona ifyo ficita.”—E fyalandile Courtney.
ILEMBO ILINGAKWAFWA: “Mwipalana no bwikashi buno, lelo mupilibuke pa kwalula amatontonkanyo yenu.”—Abena Roma 12:2.
IFYO WINGACITA
Tontonkanya pa fyo ucitamo bwino, ifyo ushicitamo bwino, ne fyo wasuminamo pa kuti wingeshiba ifyo waba ne fyo ufwaya ukuba. Pa kucita ifi ufwile ukwasuka amepusho yakonkapo.
Ifyo ucitamo bwino: Milimo nshi naishiba ukubomba bwino? Ni muli finshi umo ncita bwino? (Ku ca kumwenako: Bushe ndafika nelyo ukupwisha imilimo mu nshita? Ndailama? Ndabombesha? Nine kapekape?) Fisuma nshi ifyo ncita?
IFINGAKWAFWA: Nga ca kuti naufilwa ukusanga ifyo ucitamo bwino, kuti waipushako abafyashi nelyo cibusa obe uo wacetekela ukukweba ifyo bamona ukuti ulacitamo bwino ne co balandila ifyo.
ILEMBO ILINGAKWAFWA: “Umo na umo alange umulimo wakwe, e lyo akasansamuka pa mulimo wakwe, te kuilinganya ku muntu umbi iyo.”—Abena Galatia 6:4.
Ifyo ushicitamo bwino: Ni muli finshi ningatemwa ukwaluka? Ni lilali cinyangukila ukucita ifyabipa? Ni muli finshi ningile ukulailama sana?
LEMBO ILINGAKWAFWA: “Nga twasosa atuti: ‘Tatuli na lubembu,’ ninshi tuleibepa fye.”—1 Yohane 1:8.
Ifyo wasuminamo: Mafunde nshi nkonka kabili mulandu nshi? Bushe naishiba ukuti Lesa e ko aba? Nashininkisha shani ukuti e ko aba? Mibele nshi imona ukuti yalibipa kabili mulandu nshi? Finshi nacetekela ukuti fikacitika ku ntanshi?
ILEMBO ILINGAKWAFWA: “Ukulingulula kukakucingilila, ukwiluka kukakulinda.”—Amapinda 2:11.