3. Cinshi Abantu Abasuma Baculila?

Umulandu Cacindamina Ukwishiba Icasuko

Fwe bantu tatumfwa bwino nga twamona umuntu umusuma alecula. E mulandu wine bamo batontonkanishisha ukuti nga ca kuti na bantu abasuma balacula, ninshi tatulingile ukuba abasuma.

Tontonkanyeni Pali Ifi

Abantu bamo basumina ukuti abantu balafwa no kufyalwa cipya cipya imiku iingi. Balanda ukuti abantu abacita ifisuma nga bafwa bafyalilwa mu bantu abekala bwino, e lyo abacita ifyabipa bafyalilwa mu bantu abacula. Abasumina muli ici icisambilisho batila, nga ca kuti umuntu alecita ifyabipa ilyo ashilafwa no kufyalilwa mu bumi ali nabo, kuti alecula nangu abe shani umusuma. Na lyo line, tulingile ukutontonkanya pali aya amepusho . . .

• Apo umuntu te kuti ebukishe ifyalecitika ilyo ashilafwa no kufyalwa cipya cipya, finshi engasambilila ku macushi yakwe?

• Mulandu nshi tusungila bwino ubumi bwesu, no kuicingilila ku masanso, nga ca kuti icilenga fyonse ifitucitikila fintu twalecita ilyo tatulafwa no kufyalwa cipya cipya?

  ISHIBILENIPO NA FIMBI

  Tambeni vidio itila Mulandu Nshi Lesa Asuminishisha Ukucula? pa jw.org/bem.

Ifyo Baibolo Ilanda

Nga tulecula ninshi te Lesa aletukanda.

Ifyabipa ifingi ifitucitikila, ficitika fye. Ilingi line icilenga tuleba na mafya ni co tuba pa cifulo apalecitikila ifyabipa.

Baibolo itila: “Te lyonse ababutukisha bacimfya muli nakatango wa lubilo, kabili te lyonse aba maka bacimfya mu bulwi, aba mano na bo te lyonse bakwata ifya kulya, abacenjela na bo te lyonse bakwata ifyuma, kabili abasalapuka na bo bene te lyonse bashuka; pantu inshita ya macushi ne nshita ya fintu fyabula ukwenekela ifikila fye umuntu uuli onse.”—LUKALA MILANDU 9:11.

Tulacula pa mulandu wa kuti tuli babembu.

Ilingi line, abantu babomfya ishiwi lya kuti ulubembu nga balefwaya ukulanda pa fyabipa ifyo umo acitile. Na lyo line, Baibolo ilabomfya ishiwi lya kuti ulubembu na lintu ilelanda pa fyo ifwe bonse twafyalwa, nampo nga tulacita ifisuma nelyo ifyabipa.

Kalemba wa Baibolo umo atile: “Mu lubembu e mo nafyalilwe, kabili mu lubembu e mo mayo anjimitile.”—AMALUMBO 51:5.

Ulubembu lulalenga tulecula.

Lulalenga tulekalifya Kabumba wesu kabili lulalenga twilabombela pamo ne fibumbwa fya kwa Lesa fimbi. Ne ci cilalenga tulecula sana.

Kalemba wa Baibolo umo atile: “Lyonse ilyo mfwaya ukucita icalungama, nsanga ndecita icabipa.”—ABENA ROMA 7:21.

Baibolo itila: “Ifibumbwa fyonse fitetela capamo no kucululukila capamo ukufika kuli nomba.”—ABENA ROMA 8:22.