Isambililo 21

Ifyebo Fyabamo Kufunda Fyapeelwa mu Kumfwika

1-3. Mulandu nshi ifyebo fya kulungatika fikabilwa mu kulenge lyashi lya umo ilyabamo ukufunda?

¹ Amalyashi yasuma yatendeka no kupekanya kwasakamanisha, kabili ico cifwaya inshita no kubombesha. Lelo fintu cabe ca kulambula! Ulalundako ku butala bobe ubwa kwishiba kwalungikwa kabili ulakwate cintu cimo ica kunonsha mu cituntulu ica kwakana ne bumba lyobe. Ukucila ukulanda fye mu munsaunte, ulakwate fishinka fisanikila ifya kupeela, kabili uleshibo kuti cintu ulesosa nacilungama. Ici cikuula ukutesekesha kwe bumba ukwa Cebo ca kwa Lesa, kabili muli fyo cicindika Yehova. Ukulanguluka kwesu ukwa fyebo fyabamo kufunda kubimbamo ukucilisha fintu usosa mu lyashi lyobe. Mu kwipifya languluke mbali shalekanalekana isha uyu mulandu. E cishinka ca kubalilako pali slipi wa Ukufunda kwa Milandile.

² Ifyebo fya kulungatika. Ilyashi lilandwa fye mu munsaunte lilabulisha ukukatama no bulashi. Taliba ilyaumfwika. Lishe bumba mu kutwishika. Nga ca kuti imfundo shili no kwibukishiwa shifwile ukube sha kulungatika, ishalungika. Ici cipeelako ubushininkisho bwa kusapika no kwishiba cintu ulelandapo.

³ Iyi mibele kuti yanonkwa lintu ulepekanya ukupitila mu kwipusha ukuti, Mulandu nshi? Ni lilali? Kwi? na fimbipo. Ilingi tacibe cakumanino kusoso kuti icintu cimo calicitikeko. Peela amashina ya fifulo, inshiku, napamo ne milandu. Tacikumanino kulondolola fye ifintu fimo ifya cine. Langa umulandu fibelele ifya cine; langa umulandu fibelele ifyacindama ukufishiba. Nga ulepeelo kufunda, londolola inshila icintu cili no kucitilwamo. Ubwingi bwa fyo ibumba lyaishiba kale e bukapima ubwingi bwa kulunduluka kwa uyu musango ukulekabilwa. E co languluke bumba mu kushininkishe fishinka ifyo limbi fingafwaikwa.

4-6. Pa kuti ilyashi lyobe libemo kufunda kwi bumba limo, ni mbali nshi ufwile ukwibukisha?

⁴ Ifyabamo kufunda kwi bumba lyobe. Icingafunde bumba limo pambi te kuti cilundeko nangu cimo ku kwishiba kwe bumba limbi, nelyo pambi kuti cabasha fye na mu mfifi umupwilapo. Mu kumonekesha, lyene, ifyebo fifwile ukulinge bumba line ilyo. Ku ca kumwenako, mu lyashi lya pa fintu umulimo wesu utungululwa, ifyebo kuti fyapeelwa mu kupusanininako nga nshi pa Ukulongana kwa Mulimo ukucila mu kulanda ku muntu uuleiteyanyo kuipeela umwine kuli Yehova, nelyo mu lyashi kwi bumba lya mu calo.

⁵ Ifi fya kusangwilako na kabili fyalingo kulangulukwapo pa kupeela amalyashi yalekanalekana mwi Isukulu lya Butumikishi bwa Teokrasi. Ifyebo filelandwa mu lyashi ilili lyonse lyapeelwa filingile ukulangulukwa mu kukuma kwi bumba, imitantikile ne mifwaile ya lyashi. Ifi fya kusangwilako fikapampamikwa ku musango wa lyashi ne mitantikile iyo kalanda asalile. Kwena, ilyashi lya kufunda liba lyashi ku cilonganino. Amalyashi yambi kuti yaba ayalekanalekana, ibumba ne mifwaile filangishiwa ku mitantikile. Te mulandu no musango wa lyashi, bonse babili umusambi na kafunda kuti baipusha abene ukuti, Bushe ifyebo fikumine kuli ili bumba nafibimbwamo mu mipeelele? Bushe ibumba likafundwa no kusambilishiwa kuli fyene?

⁶ Pa kupekanya ipushe ukuti, Cinshi ndefwayo kupwilikisha muli ili lyashi? Bwingi bwaba shani ubwa fintu ndefwayo kusosa ifyo uyu muntu nelyo ibumba lyaishiba kale? Citendekelo nshi ico mfwile ukubika intanshi ifi fishinka tafilalengwo kumfwika? Ni shani fintu ningafisosa mu kupusanako kwi bumba lyapusanininako? Ukulinganya ilingi kulenge mimwene yesu ukulengama. Esha inshila shapusanapusana ku mabumba yapusanapusana pa kupekanya mu kukwata fye ukuyumfwa kwa bupusano mu kulanguluke bumba no kulenge fyebo ukube fya kufunda kuli ilyo ibumba uli no kulandako.

7, 8. Ni shani fintu twingalenga amalyashi yesu ukuba ayabomba?

⁷ Ifyebo ifya bucindami bubomba. Kwabako ifingi ifya kusambilila, lelo te fyonse ifibomba. Kuli ifwe, ifyebo fyabamo kufunda fikuma kuli ifyo fintu tukabilo kwishiba ku mikalile ya Bwina Kristu, ku butumikishi bwesu. Tufwayo kwishiba ifya kubomfye fi fyebo ifyo tunonka.

⁸ Umusambi, pa kupekanya, na kangalila we sukulu, pa kufunda, limbi kuti alanguluke ci cishinka pa kwipusha ati: Fishinte nshi fya kutungulula fili no kusangwa muli ili lyashi? Bushe ifyebo filimo kuti fyabomfiwa pa kupingulapo? Bushe ifyebo fipeelwe kuti fyateulwilwa ku butumikishi bwa mwi bala? Bushe filekushe Cebo ca kwa Lesa no kusonta ku mifwaile yakwe? Malyashi yanono ayengasangwilako kuli ifi fyebo fyonse, lelo pa kulingo kubomba, ifyebo fipeelwe filingile ukube fingabomfiwa mu nshila imo kwi bumba.

9-11. Mulandu nshi uo ukulungika kwa kulondolola kwabela ukwakatama?

⁹ Ukulungika kwa kulondolola. Inte sha kwa Yehova shaba kuteyanya kwaba ne cine. Tulingile ukufwayo kulande cine no kuba abalungika apakalamba mu kulonsha ukuli konse pa nshita shonse. Ici cilingile ukube fyo te mu kulosha ku cisambilisho kweka fye lelo kabili na mu kwambula kwesu, fintu tusosa pa lwa bambi nelyo fintu tulanda pa lwa bene, na kabili mu milandu ibimbamo ifyebo fya sayansi nelyo amalyashi yaponako.

¹⁰ Ubulondoloshi bwalubana ubwapeelwa kwi bumba limo kuti bwabwekeshiwapo kabili icilubo kuti cakushiwa. Impuso isho shishibikwa kwi bumba shimyako ifipusho pa lwa bulashi bwa kwa kalanda pa fishinka fimbi, pambi no kutwishika fye bucine bwa bukombe bwine. Umuntu mupya ulesekelela uwaumfwo bulondoloshi bwa musango yo, kabili uwaumfwile itontonkanyo lyapusanako lyalumbulwilwe pa kashita kambi, limbi kuti afika ku kusondwelela kwa kuti kwalibako ukukanaikatana kwe tontonkanyo pa kati ka Nte sha kwa Yehova no kuleko kubishanya ukwabula no kusokololo mulandu.

¹¹ Kafunda talingile kubongolola icili conse icacilandwa no musambi, ukucilisha uucili umupya mu cine na muli ifyo uushilaba uwashikama mu fyashika fya Cebo ca kwa Lesa. Ukucila, mu kucenjela akaafwa mu kumumungo kutontonkanya kwa musambi no kumulange fya kuwamyo kulungika kwakwe ukupitila mu kupekanya kwa mu kubangilila ukwasakamanisha.

12, 13. Bucindami nshi bwa fyebo fyalundwako ifilengo kumfwika?

¹² Ifyebo fyalundwako ifilengo kumfwika. Imfundo shipeelwa ukufuma mu kwetetula nelyo isho limbi shingasokotwa mu kusapika kwalundwapo pa cilelandwapo kuti shasangwilako ifingi ku lyashi kabili inshita shimo kuti shasengauko kubwekeshapo kushabamo kufunda ukwa fyebo fyaishibikwa kale kale kwi bumba. Cilalenge mipeelele ukumfwika iipya, cicincisho buseko bwe bumba, kabili kuti shalenge sambililo lyaishibikwa ukubamo kusangalasha mu cine cine. Na kabili, cipeelo kuicetekela kuli kalanda. Abomba ne lyashi lyakwe mu kuba no kucincimuka ukufuma mu kwishiba kwa kuti nakwata cimo icapusanako panono ico alepeela.

¹³ Ubusanso ubulingile ukusengaukwa bwaba kutunganya kwa pa lobe. Impapulo sha Sosaite shilingile ukubomfiwa no kushintililwapo. Bebeta ba Index ba Sosaite, no tulembo twa mwi samba pa malembo (NW). Shininkisho kuti ico ulesosa cilelengo kumfwika, te kulufya.

**********

14-16. Cinshi cifwile ukucitwa mu kupekanye lyashi pa kulumbulule fintu mu kwanguka?

¹⁴ Mu kupekanye fyebo fyobe caliba na kabili icakatama ukusakamana inshila ukasoselamo fintu uli no kusosa. Ici e co slipi wa Ukufunda kwa Milandile aloshako pamo nga “Ifyalondoloka, ifyaumfwika.” Ukufilwo kusakamana ici mu kulinga kuti kwakucilikila ukufuma ku kufika kwi bumba lyobe, nelyo pambi kuti kwabacilikila ukusunga fintu baleumfwa. Kwabako imbali shikalamba shitatu isha uyu mulandu isha kulangulukapo.

¹⁵ Ukulondololwa mu kwanguka. Ici tacipilibula ukuti inumbwilo shili no kutontonkanishiwa mu kubangilila. Lelo imfundo shili no kupeelwa shilingile ukupimununwa ne fya kusangwilako fyaishibikwa fimo fimo ukulangulukwapo. Ici ilingi kuti cafumamo ilyashi lyaikatana no kulumbulula kwe tontonkanyo kwayanguka, ukulandilwa mu lulimi lwayanguka. Isambililo ilyapikana mu muntontonkanya wa kwa kalanda likaba ilyapikana pa kupeela.

¹⁶ Ukupekanya kwa pa kulekelesha kulingile ukusengaukwa. Icishinka cimo cimo ica lyashi cilingile ukupitulukwamo conse mpaka caba icayanguka no kumfwika kuli kalanda. Ukupitulukamo muli ifi fishinka mu kupekanya kwa mipeelele kukafilenge fyatwa mu muntontonkanya wakwe ica kuti fikalafuma mu kwanguka lintu fyafwaikwa kabili fikaba ifyaumfwika mu kulengama kwi bumba nga fintu fikaba kuli kalanda.

17, 18. Mulandu nshi amashiwi yashabeleshiwa yafwile ukulondololwa?

¹⁷ Amashiwi yashabeleshiwa yalondololwa. Ukusambilila kwesu Amalembo pamo ne mpapulo sha Watch Tower Society kwatupeela ubutala bwa mashiwi ayaba ayeni ku bashabeleshanya no mulimo wesu. Nga twali no kulondolole cine ca Baibolo ku mabumba yamo, ukubomfya aya mashiwi, ubwingi bwa fintu tulesosa atemwa kuti bwalufiwa nelyo imilandile te kuti yumfwike.

¹⁸ Languluke bumba lyobe. Cipimo nshi ca kwishiba kwabo? Kufika pi baishiba ulwa mulimo wesu? Bwingi bwaba shani ubwa ishi numbwilo bwingomfwika mu kwanguka kuli bene pamo nga kuli kalanda? Amashiwi pamo nga “teokrasi,” “abashalapo,” “impaanga shimbi,” nangu fye “Armagedone” no “Bufumu,” kuti yaletako itontonkanyo lyapusanako ku muntontonkanya wa kwa komfwa nelyo ukukanaletako itontonkanyo ilili lyonse. Nangu fye mashiwi pamo nga “umweo,” “helo” na “bumunshifwa” yakabilo kulondololwa nga ca kuti komfwa tabeleshanya no mulimo wesu. Lelo nga ca kuti ilyashi lilepeelwa ku cilonganino, amashiwi ya musango yu tayakabila kulondololwa. E co ibumba lyobe lilingile ukulangulukwa.

19, 20. Ni shani fintu twingasengauka ukukwata ifyebo fyafulisha?

¹⁹ Ifyebo tafilingile ukufulisha. Ilyashi kuti pambi lyakwatamo ifyebo ifyafula ica kuti ubwingi bwa fyebo bwafulile bumba kabili ukumfwikisha kwafubalishiwa nelyo ukulufiwa umupwilapo. Pa kupwishishisha imifwaile ye lyashi, takuli fyebo fyalundwapo ifilingile ukuletwako ukucila pa fingalundululwa mu kumfwika mu nshita ipeelwe. Takuli ifyafulilako ifilingile ukulumbululwa ukucila pa fingomfwika kwi bumba. Mu kulundapo, ifyebo filepeelwa ku mweni nelyo umupya ulesekelela fili no kwangushiwa apakalamba mu kulinganishiwa ne fyebo pali ilyo isambililo limo line lintu filepeelwa ku cilonganino. Pano, napo, kafunda alingile ukulanguluka ibumba lilelandako kalanda.

²⁰ Ni shani fintu umusambi akeshiba ubwingi bwa fyebo fya kubika mu lyashi? Ukulinganya kuti kwaba ukusuma mu kupekanya. Bebeta fintu uli no kupeela. Bwingi bwaba shani ubwa ifi fishinka fyaishibikwa kale kale kwi bumba, nangu fye panono? Bwingi bwaba shani ubwa fyene ifikaba ifipya umupwilapo? Ukukulilako kwa mufula wa bwishibilo ibumba lyakwata kale kale, e fingaba no kufulilako kwa fingakuulwa pali wene mu nshita ipeelwe. Lelo nga finono nga nshi ifyaishibikwa pa lyashi lili no kulandwapo, lyene ufwile ukusakamana sana ubwingi bwa fili no kusoswa kabili ne nshita cikasenda ukulondolola ifi fishinka pa kuti ibumba likafyumfwe mu kukumanina.