Lesa Atendeka Ukupanga Ifintu

IFISUMA fyonse ifyo twakwata fyafuma kuli Lesa. Apangile akasuba ukuti kaletupeela ulubuuto mu nshita ya kasuba, kabili apangile umweshi ne ntanda pa kuti filesanika ubushiku. Lesa apangile isonde pa kuti tuleikalamo.

Lelo Lesa tabalilepo ukupanga akasuba, umweshi, intanda ne sonde. Bushe nawishiba abo abalilepo ukupanga? Abalilepo ukupanga bamalaika abamoneka nga ena. Fwe bantu te kuti tumone bamalaika, filya fine tatumona Lesa. Lesa apangile bamalaika ukuti baleikala nankwe ku muulu.

Malaika uo Lesa abalilepo ukupanga ali uwaibela sana. Ali Mwana wakwe uwa kubalilapo, kabili uyu umwana alebombela pamo na Wishi. E wa-afwile Lesa ukupanga ifintu fyonse. Aafwile Lesa ukupanga akasuba, umweshi, intanda ne sonde.

Bushe pe sonde palemoneka shani pali ilya nshita? Pa kubala, pano isonde tapali abantu, pali fye amenshi yeka yeka. Lelo Lesa alefwaya ukuti pe sonde paleikala abantu. E ico atendeke ukutupekanishisha apa kwikala. Finshi acitile?

Ica ntanshi, pe sonde palingile ukuba ulubuuto. E ico Lesa alengele ulubuuto lwa kasuba ukusanikila pe sonde. Alengele ukuti kuleba inshita ya bushiku ne nshita ya kasuba. Pa numa, Lesa alengele umushili uwali pa nshi ya menshi ukwima no kwisa pa muulu.

Pa kubala, pali uyu umushili tapaali nangu fimo. Palemoneka nga ici cikope. Tapali amaluba nelyo ifimuti nangu inama. Mu menshi na mo tamwali isabi nangu limo. Kanshi Lesa alikwete incito iikalamba pa kuti apekanishishe abantu ne nama apa kwikala.