Lesa Abumbile Umuulu ne Calo

Yehova Lesa e Kabumba wesu. E wapangile fyonse ifyo tumona ne fyo tushimona. Ilyo ashilapanga ifintu ifyo tumona, apangile bamalaika abengi nga nshi. Bushe walibeshiba bamalaika? Babomfi ba kwa Yehova kabili baba nga ena. Bamalaika tabamoneka filya fine na Lesa ashimoneka. Malaika uo Yehova abalilepo ukupanga e walemwafwa ukupanga ifintu fyonse. Uyu malaika alibombeele pamo na Yehova ukupanga intanda, amapulaneti, e lyo ne fintu fimbi. Icalo ico twikalamo caba pa mapulaneti ayo Lesa apanga.

Lyena Yehova alipekenye icalo pa kuti inama na bantu baleikalamo. Alibikileko akasuba pa kuti kalesanika mu calo. Alipangile ne mpili, babemba e lyo ne mimana.

Finshi fimbi Lesa apangile? Yehova alandile ati: ‘Nalapanga ifyani, ifimenwa fya nseke, ne fimuti ifitwala ifisabo.’ Ifisabo ifingi, umusalu, na maluba fyalitendeke ukumena. Lyena Yehova apangile inama shonse. Alipangile ifipupuka, ifikala mu menshi, e lyo ne fikulika. Alipangile no tunama utunono pamo nga tukalulu, e lyo apanga ne nama ishikulu pamo nga insofu. Ni nama nshi watemwa sana?

Pa numa Yehova aebele malaika uo abalilepo ukupanga ati: “Natubumbe umuntu.” Abantu bali no kupusanako ne nama. Bali no kulapanga ifintu, ukulanda, ukuseka, no kulapepa. E bali no kulasunga icalo ne nama. Bushe walishiba umuntu uo Lesa abalilepo ukubumba? Natumone.