Umwana Umusuma, No Wabipa

MONA Kaini na Abele. Bonse nomba bakulu. Kaini aali mulimi. Alelima ifilimwa fyalekanalekana pamo nga ifisabo ne misalu.

Abele aleteka impaanga. Alitemenwe ukusunga utwana twa mpaanga. Nga twakula twaleba impaanga ishikalamba, kanshi Abele alekwata impaanga ishingi isho alecema.

Bushiku bumo Kaini na Abele batwele ifya bupe kuli Lesa. Kaini atwele ifya kulya ifyo alimine. Abele na o atwele impaanga iisuma sana pa sho akwete. Yehova alisekelele Abele kabili alitemenwe no bupe amupeele. Lelo tasekelele Kaini kabili tatemenwe no bupe amupeele. Bushe nawishiba icalengele?

Te mulandu fye wa kuti ubupe bwa kwa Abele bwaliweme ukucila ubwa kwa Kaini. Ni co Abele ali muntu umusuma. Alitemenwe Yehova na munyina. Lelo Kaini ali muntu umubi; tatemenwe munyina.

E ico, Lesa aebele Kaini ukuti alule imibele yakwe. Lelo Kaini taumfwilile Lesa. Alikalipe nga nshi pantu Lesa atemenwe sana Abele. Bushiku bumo Kaini aebele Abele ati, ‘Natuleya mu mpanga.’ Ilyo bafikile mu mpanga ninshi bali fye beka, Kaini aumine Abele munyina. Alimumine ica kuti afwa no kufwa. Ico Kaini acitile calibipile nga nshi!

Nangu ca kuti Abele alifwa, Lesa acili alamwibukisha. Abele ali muntu umusuma, kabili Yehova talaba abantu ababa nga Abele. Kanshi bushiku bumo Yehova Lesa akamubuusha ku bafwa. Abele nga abuuka takafwe na kabili. Akekala pano pene pe sonde umuyayaya. Bushe tacakawame ukwishiba abantu pamo nga Abele?

Lelo Lesa tatemwa abantu ababa nga Kaini. Ilyo Kaini aipeye munyina, Lesa amutamfiishe ukutali sana ukufuma ku lupwa lwakwe. E fyo amukandile. Ilyo Kaini aile mu kwikala uko bamutamfiishe, asendele nkashi yakwe, kabili e waileba umukashi wakwe.

Umuye nshiku Kaini no mukashi wakwe batendeke ukukwata abana. Abana bambi aba kwa Adamu na Efa nabo batendeke ukuupana, no kukwata abana. Mu nshita fye inono abantu balifulile pe sonde. Natulandeko pali bamo.