Alifulilwe ica Kuti Aipaya na Munyina

Ilyo Adamu na Efa bafumine mwi bala lya Edeni, balikwete abana abengi. Kaini umwana umwaume uwa kubalilapo uo Adamu na Efa bakwete ali mulimi, kabili Abele umwana umwaume uwalenga bubili ali ni kacema.

Bushiku bumo Kaini na Abele balipeele Yehova amalambo. Bushe amalambo waliyeshiba? Amalambo bupe ubwaibela. Yehova alitemenwe ilambo ilyo Abele amupeele, lelo tatemenwe ilambo ilyo Kaini amupeele. Ici calengele Kaini afulwa sana. Yehova alisokele Kaini ati ali no kucita ifyabipa nga atwalilila ukufulwa. Lelo Kaini taumfwile ifyo Yehova amwebele.

E ico Kaini aebele Abele ati: “Natuleya mu mpanga.” Ilyo bali fye babili mu mpanga, Kaini aumine umwaice wakwe no kumwipaya. Bushe Yehova acitilepo shani? Yehova alitamfishe Kaini ukufuma apo aleikala ukuya ku cifulo icali ukutali no kwaleikala balupwa lwakwe. Yehova tasuminishe Kaini ukubwelela kuli balupwa lwakwe.

Finshi tulesambilila kuli ifi ifyacitike? Nga ca kuti ifintu tafilecitika ukulingana ne fyo tulefwaya nalimo kuti twakalipa. Nga twafulwa nelyo abanensu nga bamona ukuti natufulwa e lyo batwebapo, tulingile ukwaluka pa kuti tatucitile ifyabipa.

Apo Abele alitemenwe Yehova kabili alecita ifisuma, Yehova takamulabe, lyonse akalamwibukisha. Lesa akabuusha Abele ilyo akalenga icalo ukuba paradaise.