Ifilembo Pa Cibumba

FINSHI filecitika apa? Abantu bali pa mutebeto. Imfumu ya bena Babiloni yalitile abakankaala abengi sana. Balebomfya amakapu ya golde na ya silfere e lyo ne mbale ifyali mwi tempele lya kwa Yehova mu Yerusalemu. Lelo ilyo balelya, bamwene fye iminwe ya muntu yatendeka ukulemba pa cibumba. Bonse balitiinine.

Belshasari, umwishikulu wa kwa Nebukadnesari e wali imfumu. Abilikishe abaume ukuti bengishe aba mano. Imfumu yatile: ‘Onse uwalabelenga no kunjeba umo ifi filembo filolele, nalamupeela ifya bupe ifingi sana kabili akaba uwalenga butatu mu bufumu bwandi.’ Lelo pa baume aitile, tapaali nangu umo uwabelengele ifilembo nelyo ukulondolola umo fyalolele.

Banyina wa mfumu balyumfwile icongo, e ico baile mu muputule uukalamba umwali umutebeto. Baebele imfumu ati: ‘We mfumu wiitina. Mu bufumu bobe mwaliba umwaume uwaishiba balesa ba mushilo. Ilyo Nebukadnesari, shikulu obe ali imfumu, aebele uyu mwaume ukuba umukalamba pa ba mano bonse. Ishina lyakwe ni Daniele. Tuma uwa kumwita pa kuti ese akwebe umo ifi filembo filolele.’

Apo pene fye Daniele balimuletele ku mfumu. Pa numa ya kukaana ukupoka ifya bupe fintu bamupeele, Daniele atendeke ukubeba ico Yehova afumishe Nebukadnesari, shikulu wa kwa Belshasari pa bufumu. Daniele atile, Nebukadnesari ‘ali uwa cilumba sana. E co Yehova amukandiile.’

Daniele aebele Belshasari ati: ‘Iwe walishiba ifyacitikiile Nebukadnesari, lelo ucili uwa cilumba nga ena. Naubuula amakapu ne mbale mwi tempele lya kwa Yehova no kunwenamo. Upepa tulesa utwabaswa no twa mabwe, kabili taucindika Kabumba, Lesa Mukulu. E co ukuboko kwa kwa Lesa kulembeele aya mashiwi.’

Lyena Daniele atile: ‘Ifilembo fileti, “MENEE, MENEE, TEKEELE na PARSIINI.”’

‘Ishiwi lya kuti MENEE lilepilibula ukuti Lesa napenda inshiku sha bufumu bobe kabili nashipwa. Ishiwi lya kuti TEEKELE lilepilibula ukuti Lesa nakupima mu ca kupiminamo kabili asangile ukuti taucita ifisuma. Ishiwi lya kuti PEREESE lilolele mu kuti ubufumu bobe nabupeelwa ku bena Madai na bena Pessia.’

Ilyo Daniele talapwa no kulanda, abena Madai na bena Persia batendeke ukusansa abena Babiloni. Balipokele umusumba no kwipaya Belshasari. Ifyo Yehova alandile mu filembo ifyali pa cibumba fyalicitike bulya bwine ubushiku! Nomba cinshi cacitike ku bena Israele? Tukasambilila pali ico nomba line. Lelo intanshi natulande pa cacitikile Daniele.