Ifyabipa Fyonse Fikapwa

FINSHI ulemona apa? Pali abashilika abali pali bakabalwe ababuuta. Lelo mona uko bakabalwe balefuma. Balebutukisha ukufuma mu makumbi, mu muulu! Nomba bushe kwaliba bakabalwe ku muulu?

Awe, aba te bakabalwe ba cine. Ico twalandila ifi ni co bakabalwe te kuti babutuke mu makumbi. Lelo Baibolo yalilanda pali bakabalwe abalefuma mu muulu. Bushe walishiba ico yalandila ifyo?

Ni co kale bakabalwe balebabomfya sana mu kulwa inkondo. E co Baibolo ilandila pa bantu abanina pali bakabalwe abalefuma mu muulu. Ilanda ifi pa kulanga ukuti kukaba inkondo ya kwa Lesa iya kulwisha abantu pa calo. Bushe iyi inkondo itwa ati shani? Itwa ati Armagedone. Iyi inkondo ikafumyapo ifyabipa fyonse pa calo.

Yesu e ukatungulula muli iyi inkondo pa Armagedone. Ibukisha ukuti Yesu eo Yehova asala ukuba imfumu mu Bufumu bwakwe. E co Yesu afwalile icisote ca bufumu. Ulupanga akwete lulanga ukuti akonaula abalwani ba kwa Lesa bonse. Bushe tulingile ukupapa ifi Lesa akonaula abantu bonse ababipa?

Bwelela ku Lyashi 10. Finshi ulemona pa cikope? Lyeshi ilikalamba ilyaonawile abantu ababipa. Ni nani walengele ukuti kube Ilyeshi? Ni Yehova Lesa. Nomba kabiye pa Lyashi 15. Finshi filecitika apa? Umusumba wa Sodoma na wa Gomora uleonaulwa ku mulilo uo Yehova atumine.

Nomba kabiye pa Lyashi 33. Mona ifilecitika kuli bakabalwe na maceleta ya nkondo aya bena Egupti. Nani walengele ukuti bebile mu menshi? Ni Yehova. Acitile ici pa kuti apusushe abantu bakwe. Lolesha na pa Lyashi 76. Walamona ukuti Yehova alilekele na bantu bakwe, abena Israele ukonaulwa pa mulandu wa fyabipa ifyo balecita.

Kanshi tatulingile ukupapa ukuti Yehova akatuma abashilika bakwe aba ku muulu ukwisapwisha ububifi bonse pa calo. Elenganya ifyo isonde likaba! Leka nomba tumone ifili pe bula lyakonkapo.