Ulubatisho

Ubulondoloshi: Ishiwi “ukubatisha” lyafuma ku ciGreek ba·ptiʹzein, ukupilibula “ukutumpika, ukwibisha.” (A Greek-English Lexicon, kuli Liddell na Scott) Ulubatisho lwa mu menshi ulwa bwina Kristu cishibisho cituntulu ica kuti umo uulebatishiwa nacita ukuipeela kwa mupwilapo, ukwabula ukushako, kabili ukushapelela ukupitila muli Yesu Kristu ukucita ukufwaya kwa kwa Yehova Lesa. Amalembo na kabili yalosha ku lubatisho lwa kwa Yohane, ulubatisho ku mupashi wa mushilo, no lubatisho ku mulimo, pa kati ka shimbi.

Bushe abantu mu cine cine abasumina mu Cebo ca kwa Lesa balasengauka ukubatishiwa?

Mat. 28:19, 20: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo: mulebasambilisha ukubaka fyonse ifyo namwebele.”

Imil. 2:41: “E ico abapokelele icebo cakwe balibatishiwe.”

Imil. 8:12: “Lelo ilyo batetekele kuli Filipi, uwalebile mbila nsuma iya bufumu bwa kwa Lesa ne shina lya kwa Yesu Kristu, balabatishiwa, abaume na banakashi.”

Imil. 8:36-38: “Awe pa kuye fi, bafikile pa menshi; na mutungwi [umwina Etiopia] atile, Mona, amenshi! Cinshi cilendesha ukubatishiwa? . . . E lyo aebele ukuti iceleta liminine . . . na Filipi abatishe mutungwi.”

Ulubatisho lwa mu menshi ulwa bwina Kristu—bushe kusansa nelyo kwibishiwa kwakumanina?

Marko 1:9, 10: “Yesu . . . alibatishiwe [“aibishiwe,” ED, Ro] mu mumana wa Yordani kuli Yohane. Na apo pene pa kunina afumine mu menshi, amwene mu myulu mwacenama.”

Imili. 8:38: “Kabili bonse batentemukile ku menshi Filipi na mutungwi; kabili alimubatishe [“alimwibishe,” ED, Ro].”

Bushe ulubatisho lwa tunya lwalibeleshiwe ku bena Kristu ba mwanda wa myaka uwa kubalilapo?

Mat. 28:19: “E ico kabiyeni, kalengeni abasambi . . . mulebabatisha.”

Imil. 8:12: “Lelo ilyo batetekele kuli Filipi . . . balabatishiwa, abume na banakashi.”

Nangu cibe fyo, pa numa, Origen (185-254 C.E) alembele ukuti “Caliba cishilano ce calici ukuti ulubatisho lucitwe na ku tunya.” (Selections From the Commentaries and Homilies of Origen, Madras, India; 1929, ibu. 211) Icibelesho calipampamikwe ku Cilye ca Butatu ica Carthage (253 C.E.).

Kalemba wa lyashi lya kale ilya butotelo Augustus Neander alembele ukuti: “Icitetekelo no lubatisho lyonse fyalundanishiwe cimo ne cinankwe; na muli fyo caliba mu cipimo casumbukisha ica kupelulula . . . Ukuti icibelesho ca lutabisho lwa tunya tacaishibikwe pali iyi nshita [mu mwanda wa myaka uwa kubalilapo]. . . . ukuti caishibikwe mu kubalilapo nge cishilano ca butumwa mu kupita kwa mwanda wa myaka uwalenga butatu, cili bushinino ukulwisha ukucila pa kusuminishiwa ukwa ntulo ya luko iya butumwa.”—History of the Planting and Training of the Christian Church by the Apostles (New York, 1864), ibu. 162.

Bushe ulubatisho lwa mu menshi ulwa bwina Kristu lufumamo ukulekelelwe membu?

1 Yoh. 1:7: “Lelo nga twenda mu lubuuto, ifyo wene ali mu lubuuto, . . . umulopa wa kwa Yesu Umwana wakwe utusangulula ku lubembu lonse.” (Muli fyo, te lubatisho lwa mu menshi lelo umulopa wa kwa Yesu e utusangulula ukufuma ku lubembu.)

Mat. 3:11: “Ine [Yohane Kabatisha] . . . ndemubatisha ku menshi ku kulapila, lelo uuleisa ku numa yandi [Yesu Kristu] ancila amaka, uo ine nshawaminwo ukusende ndyato shakwe.” (Ifikomo 5, 6, na kabili Imilimo 13:24, filanga ukuti cintu Yohane acitile tacalungikwe ku bantu bonse, kano ku baYuda. Mulandu nshi? Pa mulandu wa membu sha baYuda ukulwishe cipingo ce Funde no kubapekanishisha kuli Kristu.)

Imil. 2:38: “Lapileni, no kubatishiwa onse uwa muli imwe mwi shina lya kwa Yesu Kristu ku kulekelelwe membu shenu.” (Bushe ulubatisho ulwine lwaliletele ukulekelela kuli bene? Languluka: Ici casoselwe ku baYuda abaakeene icishingamo ca mfwa ya kwa Kristu [Moneni ifikomo 22, 23.)] Ulubatisho lwabo lwali no kupeela ubushinino bwa cintu cimo. Cinshi? Ukuti nomba babike icitetekelo muli Yesu pamo nga Mesia, Kristu. Ni pa kucita kwabo ici epo imembu shabo shingalekelelwa. [Imilimo 4:12; 5:30, 31])

Imili. 22:16: ”Ima, ubatishiwe no kusambe membu shobe, pa kulilila kwi shina lyakwe.” (Na kabili Imilimo 10:43)

Ni ani abatishiwa no mupashi wa mushilo?

1 Kor. 1:2, 12:13, 27: “Ku bashishiwa muli Kristu Yesu, abaitwa ku kuba aba mushilo . . . Pantu ku mupashi umo e ko ifwe bonse twabatishiwe ukuti twingile mu mubili umo, abaYuda atemwa abena Hela, abasha atemwa abantungwa; ifwe bonse twanwenshiweko umupashi umo. Awe imwe muli mubili wa kwa Kristu.” (nga fintu Daniele 7:13, 14, 27 alangilila, “aba mushilo” aba musango yo bakana mu Bufumu pamo no Mwana wa muntu, Yesu Kristu.)

Yoh. 3:5: “Ngo muntu tafyelwe ku menshi na ku mupashi, te kuti engile mu bufumu bwa kwa Lesa.” (Umuntu ‘afyalwa ku mupashi’ pa nshita ya kubatishiwa kuli uyo mupashi. Luka 12:32 alangilila ukuti “mukuni unono” fye e wakwata ishuko. Moneni na kabili Ukusokolola 14:1-3.)

Bushe bonse ababatishiwa no mupashi wa mushilo balandila mu ndimi nelyo balikwata ubupe bwa kuposha?

1 Kor. 12:13, 29, 30: “Pantu ku mupashi umo e ko ifwe bonse twabatishiwe ukuti twingile mu mubili umo . . . Bushe bonse batumwa? . . . Bushe bonse ni bakabomba wa fisunguko? Bushe bonse bali ne fya bupe fya kuundapila? Bushe bonse balelandila mu ndimi sha misango misango?”

Moneni na kabili “Ukundapa” na “Indimi, Ukulandilamo.”

‘Ulubatisho lwa bafwa’—cinshi lupilibula?

1 Kor. 15:29, KJ: “Napamo cinshi bakacita ababatishiwa pa mulandu wa bafwa, nga ca kuti abafwa tababuuka nakalya? Mulandu nshi babatishiwa pa mulandu wa bafwa”?

Ishiwi lya kwampanya ilya ciGreek hy·perʹ, pano lyapilibulwa, “pa mulandu,” na kabili lipilibula “pa,” “pa lubali lwa,” “mu cifulo ca, “pa mifwaile ya,” na fimbipo. (A Greek-English Lexicon, kuli Liddell na Scott) Cinshi cintu lipilibula muli ili lembo? Bushe Paulo aletubulula ukubatisha abantu abomi pa lubali lwa abo abafwa ukwabulo kubatishiwa?

Amalembo na yambi ayalumbula fye mu kulungatika imfwa mu kulundana no lubatisho yalosha ku lubatisho ulo umuntu umo umwine apitamo, te lubatisho pa lubali lwa muntu umbi, umo uwafwa

Rom. 6:3: “Bushe tamwaishiba ukuti ifwe bonse ababatishiwe muli Kristu Yesu twabatishiwe mu mfwa yakwe?” (Na kabili Marko 10:38, 39)

Kol. 2:12: “Mwashiikilwe [ifilundwa fya mweo ifya cilonganino ca Kolose] pamo nankwe mu lubatisho, umo na umo mwabuushiwe pamo nankwe pa kutetekelo kubomba kwa kwa Lesa, uwabuushishe wene ku bafwa.”

Ukupilibula muli “New World Translation” ukulingana na grama kwaliba ukwalungikwa kabili mu kumfwana na ya malembo yambi aya mu Baibolo

1 Kor. 15:29, NW: “Nga te ifyo, bakacita shani abalebatishiwa ku mifwaile ya kuba abafwa? Nga abafwa tabakabuushiwe, mulandu nshi na bo bene babatishiwilwa ku mifwaile imo ine iya kube fyo?” (E co balabatishiwa nelyo, ukwibishiwa, mu nshila ya bumi iyo iikatungulula ku mfwa ya bumpomfu ukupala iyo iya kwa Kristu kabili lyene ukubuushiwa ku bumi bwa ku mupashi nga fintu aali.)

Finshi fifumamo ukufuma ku lubatisho lwa mulilo?

Luka 3:16, 17: “Akamubatisha [Yesu Kristu] . . . ku mulilo. Ulupe lwakwe luli mu minwe yakwe ku kwelulwilako icipulilo cakwe . . . Lelo imisungu akoca ku mulilo uushishima.” (Ubonaushi bwa iko bukaba bwa muyayaya.)

Mat. 13:49, 50: “E fyo cikaba mu kupwa kwa nshita ya bwikashi buno; bamalaika bakafuma, bakapaatulula ababifi mu kati ka balungami, no kubapoosa mwi lungu lya mulilo.”

Luka 17:29, 30: “Ubushiku Lote afumine mu Sodomu yalokele iya mulilo na mabwe ya mingu ukufuma mu mulu, no konaula bonse—e fyo cikaba pali ubo bushiku Umwana wa muntu akasokololwa.”

Te cimo cine ngo lubatisho lwa mupashi wa mushilo, ulwali lwa basambi

Imil. 1:5: “Yohane wena abatishe ku menshi, lelo imwe [abatumwa ba citetekelo aba kwa Yesu] mukabatishiwa ku mupashi wa mushilo tapakapite inshiku ishingi.”

Imil. 2:2-4: “Ukupumikisha iciunda kwati cipupu icikali ica mwela, caiswilemo na mu ŋanda monse umo baikele. Kuli bene kwamoneke indimi ishabe misasatwe kwati sha mulilo, no kwikala pali bonse [lelo tawafimbilikishe nelyo ukwibisha] umo umo. E lyo bonse baiswilemo umupashi wa mushilo, batendeke no kulandila mu ndimi shimbi ifyo umupashi wabapeele ukulanda.”