Ipepo

Ubulondoloshi: Ukulanda kwabamo ukupepa, nampo nga ni mu kupongomoka nelyo mu mutalalila mu matontonkanyo ya umo, kuli Lesa wa cine nelyo kuli balesa ba bufi.

Bushe uyumfwa, nge fiyumfwa abengi, ukuti taukwata casuko ku mapepo yobe?

Mapepo ya bani Lesa afwaya ukuumfwa?

Amalu. 65:2; Imil. 10:34, 35: “Mwe bomfwo kupepa, kuli imwe abantunse bonse e ko besa.” “Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” (Uluko lwa umo, inkanda ya umo, nelyo imibele ya umo iya fya bunonshi tafyakwata kusangwilako ku mulandu. Lelo ukukuntwa kwa mutima wa umo ne nshila ya umo iya bumi e fisangwilako.)

Luka 11:2: “Ilyo mulepepa, muleti, Tata, ishina lyenu libelwe akatiina.” (Bushe amapepo yobe yalungikwa kuli Tata, umo uo ishina lyakwe Baibolo isoso kuti ni Yehova? Nelyo, mu cifulo ca ico, bushe ulungika amapepo yobe ku “batakatifu”?)

Yoh. 14:6, 14: “Yesu atile kuli wene, Ni ne nshila ne cine no mweo: takuli uwisa kuli Tata, kano aishila muli ine. Nga mukalombela akantu mwi shina lyandi, ine nkacita.” (Bushe ulapepela mwi shina lya kwa Yesu Kristu, ukwishiba ukuti pamo ngo muntunse uwa lubembu ukabila ukupapata kwakwe mu kukwimininako?

1 Yoh. 5:14: “Uku e kupama tuli na ko kuli wene, ukwa kuti nga twalomba akantu akalingene no kufwaya kwakwe atuumfwa.” (Pa kukwata ukupama kwa musango yo, nangu cibe fyo, ica kubalilapo ufwile ukwishiba ukufwaya kwa kwa Lesa. Lyene shininkisha ukuti ukulomba kobe kuleumfwana na kwene.)

1 Pet. 3:12: “Amenso ya kwa [Yehova] yalola pa balungami, na matwi yakwe yomfwo kupapata kwabo; lelo icinso ca kwa [Yehova] calukila abacite fibi.” (Bushe walisendako inshita ya kusambilila cintu Yehova asosa ukupitila mu Cebo cakwe ukukuma ku cabe calungama ne cabipa?)

1 Yoh. 3:22: “Conse ico tulomba tupokelela kuli wene, ico tubaka amafunde yakwe no kucite fya kutemuna ku cinso cakwe.” (Bushe mu cine cine cili kufwaisha kobe ukuba uwakutemuna kuli Lesa, kabili bushe uletukuta mu bufumacumi ukumfwila ayo mafunde ayo waishiba kale?)

Esa. 55:6, 7: “Fwayeni Yehova ilyo engasangwa, mulilileni ilyo ali mupepi. Imbifi ileke imibele ya iko, ne ncitatubi amapange ya iko; babwelele na kuli Yehova, na o akabacite nkumbu, babwelele na kuli Lesa wesu, pantu akabalekelela apakalamba.” (Mu nkumbu, Yehova alalika nelyo fye bantu abacita ifyabipa ukulilila kuli wene mwi pepo. Lelo, pa kukwata ukusuminisha kwa kwa Lesa, bafwile ukulapila mu kufumaluka ku nshila shabo ishalubana na matontonkanyo no kwalula inshila yabo.)

Cinshi cingalenga amapepo ya muntu umo ukuba ayapokelelwa kuli Lesa?

Mat. 6:5: “Ilintu mulepepa, mwiba nga ba bumbimunda: pantu batemwo kwiminina mu masunagoge na mu fifutu fya mansa, ukuti bamoneke ku bantu; ndemwebe ca cine, nati, nabapokelele cilambu cabo.” (Na kabili Luka 18:9-14)

Mat. 6:7, NW: “Pa kupepa, mwisosa fimo fine mu kubwekeshabwekeshapo, pamo nga fintu aba nko bacita, pantu belenganya ukuti bakomfwikwa ku kubomfya kwabo ukwa mashiwi ayengi.”

Amapi. 28:9: “Uufumyo kutwi ku kuumfwa amalango [ya kwa Yehova], ne pepo lyakwe line ca muselu kuli Yehova.”

Mika 3:4: “E lyo bakakuuta kuli Yehova, na o takabaasuke; akafise cinso cakwe kuli bene mu nshita ilya, pantu bacito bubi mu milimo yabo.”

Yako. 4:3: “Mulalomba kabili tamupokelela, pa kuti mulomba bubi bubi ukuti mupoosaike mu mangalo yenu.”

Esa. 42:8, Dy; Mat. 4:10, JB: “Ine, ne Shikulu [“Yahweh,” JB; “Yehova,” NW]: ili e shina lyandi. Nshakapeele ubukata bwandi kuli umbi, nelyo ukutashiwa kwandi ku fimpashanya.” “Ufwile ukupepa Shikulu Lesa obe [“Yehova Lesa obe,” NW] no kumubombela eka fye.” (Na kabili Ilumbo 115:4-8, nelyo 113:4-8 ukutantika kwa cibili ukwa mpendwa muli Dy] (Ipepo musango wa kushinshimuna. Nga ulapepa pa ntanshi ya fyabaswa, nelyo ifipasho, bushe ico cili no kutemuna Lesa?

Esa. 8:19: “Ilyo batila kuli imwe, Ipusheni ku fipao fya bafwa ne ngulu ifilongofyanya no kumamanta, mukatile, Bushe abantu te kuli Lesa wabo e ko bengepusha? Twipushishe shani aba mweo ku bafwa?”

Yako. 1:6, 7: “Alombele mu citetekelo, no kutwishika nakalya; pantu uutwishika apale bimbi lya muli bemba ilyaimiwa no kusensenunwa ku mwela; umuntu ulya elolelo kuti akapokelele cintu cimo kuli [Yehova].”

Milandu nshi yalinga iya kupepela?

Mat. 6:9-13: “E ico imwe pepeni ifyo, amuti: [1] Shifwe wa mu mulu, ishina lyenu libelwe akatiina. [2] Ubufumu bwenu bwise. [3] Ukufwaya kwenu kucitwe pano nse nga mu mulu. [4] Tupeeleni lelo ica kulya cesu ica bukaca. [5] Tulekeleleni imisha yesu, ifyo na ifwe twalekelela abatuliile misha. [6] Mwitutwala mu kweshiwa, lelo mutupokolole ku bubifi.” (Mona ukuti ishina lya kwa Lesa ne mifwaile filingile ukwise ntanshi.)

Amalu. 25:4, 5: “Inshila shenu munenge ukushiishiba, mwe Yehova; no mwa kuya mwenu munsambilishe. Munyenseshe mu cishinka cenu, no kunsambilisha; pantu ni mwe Lesa ipusukilo lyandi.”

Luka 11:13: “Nga imwe pa kuba ababi mwaishibo kupa abana benu ifya bupe fisuma, bushe Shinwe wa mu mulu takacishemo nga nshi ukupo mupashi wa mushilo ku bamulomba?”

1 Tes. 5:17, 18: “Pepeni no kukanaleka; muli fyonse tooteleni.”

Mat. 14:19, 20: “[Yesu] abuulile imikate isano no tusabi tubili, ainwina amenso mu mulu, no kupaala; e lyo pa kumokaule mikate, apeele ku basambi bakwe, na basambi bapeele ku mabumba. Awe baliile bonse, no kwikuta.”

Yako. 5:16: “No kupepelana.”

Mat. 26:41: “Loleni no kupepa, ukuti mwiingila mu kweshiwa.”

Fil. 4:6: “Mwisakamikwa nangu kamo, lelo mu fintu fyonse lekeni ifya kulomba fyenu fiishibikwe kuli Lesa mu kupepa.”

Nga Umo Asoso Kuti—

‘Tupepe na ine intanshi, e lyo mumpeele ubukombe bwenu’

Pambi kuti wayasuko kuti: ‘Ndi uwa nsansa pa kwishibo kuti muli bantu abatesekesha ubucindami bwe pepo. Inte sha kwa Yehova na bo balapepa lyonse. Lelo kuliko icintu cimo ico Yesu asosele pa lwa nshita ne fya kupepa ico pambi cingaba icipya kuli imwe. Bushe mwalishiba ukuti aebele abasambi bakwe ukukanapeela amapepo ya pa cintubwingi mu kuba ne cilolwa ca kuti bambi bamone ukuti baali bantu baipeelesha, abapepa? . . . (Mat. 6:5)’ Lyene nakalimo lundapo ukuti: ‘Moneni cintu atwalilile ukusosa icilingile ukuba ukwangwako kwesu ukukalamba kuli ifwe ne co tulingile ukubika pa ntanshi mu mapepo yesu. Ico e co njishile ukwisaakana na imwe. (Mat. 6:9, 10)’

Nelyo kuti wasoso kuti: ‘Nalishiba ukuti abeminishi ukufuma ku mabumba ya butotelo yamo balacita ico. Lelo Inte sha kwa Yehova tabacita, pa mulandu wa kuti Yesu afundile abasambi bakwe ukubomba umulimo wabo uwa kushimikila mu nshila imbi. Mu cifulo ca kusoso kuti, “Lintu mwaingila mu ŋanda, ica ntanshi pepeni,” moneni cintu asosele, nga fintu cisangwa pano pali Mateo 10:12, 13. . . . Kabili moneni pano mu cikomo 7 cintu baali no kulandapo. Ni shani fintu ubo Bufumu bwingafwilisha abantu bapala imwe na ine? (Ukus. 21:4)’