Bushe Ukupya mu Mulilo wa pe na ko Kwaba Bupingushi bwa kwa Lesa?

Bushe mwalimonapo uko balelungulusha umuntu? Tulesubila tamwamonapo. Ukulungulusha umuntu ku mufulo cintu ca kulengo mwenso kabili ca muselu. Lelo, ni shani pa kulungulusha ukucitwa na Lesa? Bushe kuti mwaelenganya icintu ca musango yo? Nomba, ici cine fye e mwalola icisambilisho ca mulilo wa pe, icisambilisho cikalamba mu macalici ayengi.

Tontonkanyeniko panono pali ici cintu cabipa: Umuntu alesalulwa pa cela cakaba nga nshi. Ilyo alecululuka alomba ukuti bamubelele uluse, lelo tapali uulemukutika. Batwalilila ukumulungulusha lyonse fye—ukwabula ukutushako!

Te mulandu no lubembu umuntu wa musango yo acitile, bushe teti mumumfwileko uluse? Ni shani pa watile uyu muntu alungulushiwe? Bushe kuti aba muntu wa kutemwa? Nakalya! Mu kutemwa mwaba uluse ne nkumbu. Wishi wa kutemwa kuti akanda abana bakwe, lelo te kuti abalungulushe!

Lelo, imipepele iingi isambilisha ukutila Lesa alalungulusha ababembu mu mulilo wa pe. Batila ubu bupingushi bwa kwa Lesa. Nga ca kuti ici ca cine, ninshi nani apangile ici cifulo cabipa ica kulungulusha kwa pe? Kabili nani ashingamwa ukulungulusha kwabipa ukucitwa kulya? Kwena icasuko tacikosele. Nga icifulo ca musango yo cine cine e ko caba, lyene Lesa ninshi e wacipanga, kabili e washingamwa ku ficitika kulya.

Bushe kuti mwasumina ico? Baibolo itila: “Lesa kutemwa.” (1 Yohane 4:8) Bushe Lesa wa kutemwa kuti alungulusha abantu mu musango uyo uo nangu fye bantunse abakwata uluse bamona ukuti wa kuselausha? Awe nakalya!

Icisambilisho Cabulamo Amano

Nalyo line, abantu abengi basumina ukutila ababifi bakayapya mu mulilo wa pe no kulungulushiwa umuyayaya. Bushe mwaliba amano muli ici cisambilisho? Imyaka abantunse bekala abomi ni 70 nelyo 80. Nangu umuntu acitile ifintu fyabipisha mpaka ne mfwa, bushe ukumulungulusha umuyayaya kuti kwaba kukanda kwalinga? Iyo. Kuti caba lufyengo lwabipisha ukulungulusha umuntu umuyayaya pa membu fye ishinono isho acitile ilyo ali umumi.

Nani aishiba icine pa cicitika nga twafwa? Ni Lesa fye e wingasokolola ifi fyebo, kabili alicite ci mu Cebo cakwe icalembwa, Baibolo, ico tulandilepo pa muulu. Baibolo itila: “Ifyo yabe mfwa ya [bantu], e fyo yabe mfwa ya [nama], kwabo mupu umo kuli fyonse fibili . . . Fyonse fibili fileya ukuntu kumo; fyonse fibili fyafumine ku lukungu, na fyonse fibili fibwelela ku lukungu.” (Lukala Milandu 3:19, 20) Apa tabalandilepo pa mulilo wa pe. Abantu babwelela ku lukungu—e kuti balaloba—ilyo bafwa.

Pa kuti umuntu alungulushiwe afwile ukwishiba ifilecitika. Bushe abafwa paliba ifyo baishiba? Iyo. “Aba mweo bantu abaishibo kuti bakafwa, lelo abafwa bantu abashaishiba kantu nangu kamo, kabili takwaba cilambu kuli bene; pantu iciibukisho cabo calabwa.” (Lukala Milandu 9:5) Teti cicitike ku bafwa, “abashaishiba kantu nangu kamo,” ukumfwo bukali bwa mulilo wa pe.

Icisambilisho Cabipa

Bamo bena batila icisambilisho ca kupya mu mulilo wa pe caliba fye bwino, nampo nga ca cine nelyo ca bufi. Mulandu nshi? Batila cilaafwako ukucefyako bumpulamafunde. Bushe ico ca cine? Bushe mu ncende umo abantu basumina mu cisambilisho ca kupya mu mulilo wa pe bumpulamafunde bwalicepako ukucila mu ncende shimbi? Nakalya! Na kuba, icisambilisho ca kupya mu mulilo wa pe calibipa nga nshi. Bushe umuntu uwasumina ukutila Lesa alalungulusha abantu kuti amona ukulungulusha ngo kwabipa? Mulandu nshi engasuminine fyo? Abantu abasumina mu milungu iinkalwe na bo baba fye abankalwe nge milungu yabo.

Mu nshila yonse iyo umuntu wa mano engamwena uyu mulandu, teti asumine ukuti kwaliba ukulungulushiwa mu mulilo wa pe. Ukusumina ifi kwalipusana no kupelulula kwine kwine. Kwapusana ne mibele ya bantunse. Icacindamisha ca kuti Icebo ca kwa Lesa tacilanda ukutila kwaliba icifulo ca musango yo. Ilyo umuntu afwa, “abwelela ku mushili wakwe, ubushiku bulya bwine yaloba amatontonkanyo yakwe.”—Amalumbo 146:4.

Kukanda Nshi Ukwa pa Lubembu?

Bushe ici e kuti tatukandwa pa membu shesu? Iyo, te fyo caba. Lesa wesu uwa mushilo alakanda ababembu, lelo tabalungulusha. Kabili ilyo ababembu balapila, alabelela. Cinshi caba e kukanda kwa pa membu? Baibolo ilasuka ukwabula ukupita mu mbali ati: “Icilambu ca lubembu ni mfwa.” (Abena Roma 6:23) Ubumi bupe ukufuma kuli Lesa. Ilyo twabembuka, tatuba abalinga ubu bupe, kabili tulafwa.

Kuti mwaipusha amuti: ‘Bushe ici caliba fye bwino? Pantu bonse tulafwa!’ Ici ca cine pantu bonse tuli babembu. Na kuba, takwaba uwawamino bumi. “Ulubembu lwaingilile mu muntu umo pano isonde, ne mfwa yaingilile mu lubembu; e fyo ne mfwa yayambukile ku bantu bonse, pantu bonse balibembwike.”—Abena Roma 5:12.

Nalimo nomba muletontonkanya ati: ‘Nga bonse tulabembuka no kufwa, mulandu nshi tulingile ukwesesha ukuba ne mibele isuma? Cimoneka kwati umubifi asungwa cimo cine nge fisungwa umuntu uubombela Lesa.’ Lelo te fyo caba. Nangu ca kuti bonse tuli babembu, Lesa alelela bonse abalapila mu kufumaluka kabili abesha ukwalula imibele yabo. Alatulambula pa fyo tubombesha mu ‘kulengwa kwa mitima yesu iipya’ no kucita icisuma. (Abena Roma 12:2) Ukwishibe ci cine conse e pashimpwa isubilo lyawama nga nshi.

Icilambu ca Kucita Icisuma

Ilyo twafwa tulaloba. Lelo ici te kuti ninshi takuli isubilo. Umwaume wa cishinka Yobo alishibe ukuti ali no kuya ku mbo ilyo afwa. Lelo kutikeni ifyo apepele kuli Lesa, atile: “Iye, nga mwambika mwansungila ku Mbo, nga mwambelamika, kukasuke akupito bukali bwenu, nga mwambikile cipope, no kunjibukisha! Umuntu uwafwa, nga engaba no mweo kabili, . . . nga mwaita, na ine nayasuka.”—Yobo 14:13-15.

Yobo asumine ukuti nga atwalilile uwa cishinka ukufika ne mfwa, Lesa ali no kumwibukisha no kumubuusha. Ifi e fyo ababomfi ba kwa Lesa bonse aba ku kale abali no busumino basumine. Yesu umwine alandile pali ili subilo ilyo atile: “Inshita ileisa, iyo bonse aba mu nshishi bakomfwamo ishiwi lyakwe, no kufumamo; abalecite fisuma bakabuukila ku mweo, na balebombe fibi bakabuukila ku bupingushi.”—Yohane 5:28, 29.

Bushe ukubuuka ku bafwa kukatendeka lilali? Ukulingana na Baibolo, kukatendeka nomba line fye. Ukusesema kwa mu Baibolo kulanga ukutila ukutendeka mu 1914, cino calo caba mu “nshiku sha kulekelesha.” (2 Timote 3:1) Mu nshita iyo abengi beta ‘impela ya calo,’ Lesa nomba line akafumya ububifi pe sonde no kuleta icalo cipya icikatekwa no buteko bwa ku muulu.—Mateo, icipandwa 24; Marko, icipandwa 13; Luka, icipandwa 21; Ukusokolola16:14.

Icikacitika ca kuti isonde lyonse likaba paradise kabili mukekala abantu ababombela Lesa mu kufumaluka. Ababifi tabakapye mu mulilo wa pe, lelo tabakabemo muli Paradise iikabako ku ntanshi. Pa Amalumbo 37:10, 11, tubelenga ati: “Umubifi takabepo; awe ukalolekesha apo ali, no kusanga tabapo: lelo abalanda bakapyaninine calo, no kuilemeno bwingi bwa mutende.”

Bushe ifi fyonse ciloto fye? Iyo, ni Lesa e walaya. Mu Baibolo tubelengamo ukutila: “Naumfwile ne shiwi likalamba lya mu cipuna ca bufumu, lileti, Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:3, 4.

Bushe mwalicetekela aya mashiwi? Mufwile ukuyacetekela. Icebo ca kwa Lesa lyonse cilafishiwapo. (Esaya 55:11) Tulemukoselesha ukusambilila na fimbi pa bufwayo bwa kwa Lesa ku bantunse. Inte sha kwa Yehova bakaba aba nsansa ukumwafwa. Nga mwingatemwa ukuti bamwafwe, shi lembeleni ku keyala kamo pa tuli pe samba.

Amalembo yambwilwe muno yafumine muli Baibolo wa Cibemba uwa mu 1956.