Isambililo 4

Kaseebanya Nani?

Satana Kaseebanya—ni kwi aafumine? (1, 2)

Ni shani fintu Satana alufya abantu? (3-7)

Mulandu nshi ulingile ukukaanina Kaseebanya? (7)

1. Ishiwi “kaseebanya” lipilibula umuntu uulanda ubufi bwabipisha pa lwa muntu umbi. “Satana” cipilibula umulwani nelyo uukaanya. Aya e mashina yapeelwa ku mulwani mukalamba uwa kwa Lesa. Pa kubalilapo, aali malaika wapwililika mu muulu pamo na Lesa. Nangu cibe fyo, pa numa aishileininikisha umwine no kufwaya ukupepa uko kulingile fye ukuya kuli Lesa.—Mateo 4:8-10.

2. Uyu malaika, Satana, alandile kuli Efa ukupitila mu nsoka. Pa kumubepa, amulengele ukukanaumfwila Lesa. Muli fyo Satana asanshile iciitwa “bumulopwe” bwa kwa Lesa, nelyo icifulo cakwe ngo Wapulishamo. Satana atwishike nampo nga inshila ya kutekelamo iya kwa Lesa yali iisuma kabili nga yaliwamine abatekwa Bakwe. Satana na kabili atwishike nga kuti kwabako abantunse abali bonse abengatwalilila ukuba aba bucishinka kuli Lesa. Pa kucite ci, Satana aipangile umwine ukuba umulwani wa kwa Lesa. Uyo e mulandu aishileitilwa Satana Kaseebanya.—Ukutendeka 3:1-5; Yobo 1:8-11; Ukusokolola 12:9.

3. Satana aleesha ukutumpika abantu pa kuti balemupepa. (2 Abena Korinti 11:3, 14) Inshila imo iyo alufishamo abantu kupitila mu kupepa kwa bufi. Nga ca kuti imipepele isambilisha ubufi pa lwa kwa Lesa, ninshi mu cituntulu iyo mipepele ibombela imifwaile ya kwa Satana. (Yohane 8:44) Abantu ababa ifilundwa fya kupepa kwa bufi kuti mu kufumaluka basumina ukuti balepepa Lesa wa cine. Lelo untu balebombela mu cituntulu ni Satana. E ‘mulungu wa cino calo.’—2 Abena Korinti 4:4.

4. Ukupupe mipashi e nshila na imbi Satana asendelamo abantu. Kuti bayalukila ku mipashi ku kubacingilila, ku kucena bambi, ku kusobela ifya ku ntanshi, nelyo ku kucite fipesha amano. Satana e maka yabipa ayashingamwa ifi fibelesho fyonse. Pa kuteemuna Lesa, tufwile ukusengauka ukupupe mipashi umupwilapo.—Amalango 18:10-12; Imilimo 19:18, 19.

5. Satana na kabili alufya abantu ukupitila mu cilumba cacishamo ica mushobo no kupepa utubungwe twa bupolitiki. Bamo bayumfwa ukuti icalo cabo nelyo umushobo walicila imishobo imbi. Lelo ubu bufi. (Imilimo 10:34, 35) Abantu bambi bashintilila pa tubungwe twa bupolitiki ku kupwisha amafya ya muntu. Pa kucite ci, balakaana Ubufumu bwa kwa Lesa. E bwingapwisha fye amafya yesu.—Daniele 2:44.

6. Inshila na imbi iyo Satana alufishamo abantu ni pa kubatunka ukubomfya ulunkumbwa lwa lubembu. Yehova atweba ukusengauka ifibelesho fya lubembu pa mulandu wa kuti alishiba ifyo fili no kutucena. (Abena Galatia 6:7, 8) Abantu bamo kuti bafwaya ifyo uilunde kuli bene mu fibelesho fya musango yo. Ibukisha, nangu ni fyo ukuti, aba ni Satana mu cituntulu uufwaya ukuti ucite fi fintu.—1 Abena Korinti 6:9, 10; 15:33.

7. Satana kuti pambi abomfya ukupakasa nelyo ukukaanya pa kukulenga ukufuma kuli Yehova. Abatemwikwa bobe bamo kuti bakalipa nga nshi pa mulandu wa kuti ulesambilila Baibolo. Bambi kuti bakupumya. Lelo ni ani untu ulingile ukutasha sana pa bumi bobe? Satana afwaya ukukutiinya pa kuti uleke ukusambilila pa lwa kwa Yehova. Wileka Satana acimfye! (Mateo 10:34-39; 1 Petro 5:8, 9) Ukupitila mu kukaanya Kaseebanya, kuti walenga Yehova ukusamwa no kulanga ukuti ulasumbula bumulopwe Bwakwe.—Amapinda 27:11.

[Ifikope pe bula 9]

Ukupepa kwa bufi, ukupupe mipashi, no kupupa icalo filalufya abantu

[Icikope pe bula 9]

Kaanya Satana pa kutwalilila ukusambilila pa lwa kwa Yehova