Isambililo 11

Ifisumino ne Myata Ififulwisha Lesa

Musango nshi uwa fisumino ne myata uwalubana? (1)

Bushe Abena Kristu balingile ukusumina ukuti Lesa abamo Batatu? (2)

Mulandu nshi Abena Kristu ba cine bashisefeshako Krisimasi, Isita, nelyo inshiku sha kufyalwa? (3, 4)

Bushe abafwa kuti bacena aba mweo? (5) Bushe Yesu afwilile pa musalaba? (6) Bushe cacindama shani ukuteemuna Lesa? (7)

1. Te fisumino fyonse ne myata ifyabipa. Lelo Lesa tasuminisha fyene nga ca kuti fyafuma ku kupepa kwa bufi nelyo nga fyalipusana ne fisambilisho fya Baibolo.—Mateo 15:6.

2. Bulesa Butatu: Bushe Yehova abamo baLesa Batatu? Iyo! Yehova, Wishi, e ‘Lesa wine wine eka.’ (Yohane 17:3; Marko 12:29) Yesu Mwana Wakwe ibeli, kabili alanakila Lesa. (1 Abena Korinti 11:3) Wishi mukalamba pa Mwana. (Yohane 14:28) Umupashi wa mushilo te muntu; maka yabomba aya kwa Lesa.—Ukutendeka 1:2; Imilimo 2:18.

3. Krisimasi na Isita: Yesu tafyelwe pa December 25. Afyelwe mupepi na October 1, pa nshita ya mwaka lintu bakacema baaleba ne mikuni yabo mu mpanga ubushiku. (Luka 2:8-12) Yesu tabalile akambisha Abena Kristu ukusefya ukufyalwa kwakwe. Ukucila, aebele abasambi bakwe ukubaka, nelyo ukulaibukisha imfwa yakwe. (Luka 22:19, 20) Krisimasi ne myata ya iko fyafuma ku mipepele ya bufi iya pa kale. E fyo caba na ku myata ya Isita, pamo nga ukubomfya amani no tululu. Abena Kristu ba mu kubangilila tabalesefya Krisimasi nelyo Isita, kabili Abena Kristu ba cine tabasefya fyene ilelo.

4. Inshiku sha kufyalwa: Ukusefya inshiku sha kufyalwa kubili fye ukwalandwapo mu Baibolo kwasefiwe na bantu abashalepepa Yehova. (Ukutendeka 40:20-22; Marko 6:21, 22, 24-27) Abena Kristu ba mu kubangilila tabalesefya inshiku sha kufyalwa. Umwata wa kusefya inshiku sha kufyalwa wafuma ku mipepele ya bufi iya pa kale. Abena Kristu ba cine balapeela ifya bupe kabili balaipakisha ukuba capamo pa tushita tumbi mu mwaka.

5. Ukutiina Abafwa: Abafwa te kuti bacite icili conse nelyo ukumfwa icili conse. Te kuti tubaafwe, kabili te kuti batucene. (Ilumbo 146:4; Lukala Milandu 9:5, 10) Umweo ulafwa; tautwalilila ukubako pa numa ya mfwa. (Esekiele 18:4, NW) Lelo inshita shimo bamalaika babifi, abetwa ifibanda, balabepekesha ukuba imipashi ya bafwa. Imyata iili yonse iyaampana no kutiina nelyo ukupepa abafwa yalilubana.—Esaya 8:19.

6. Umusalaba: Yesu tafwilile pa musalaba. Afwilile pa cimuti ca mulungulungu, nelyo umulando. Ishiwi lya ciGriki ilyapilibulwa “umusalaba” mu maBaibolo ayengi lyalelosha fye ku ciputusha fye cimo ica cimuti caololoka. Icipasho ca musalaba catuntuka ku mipepele ya bufi iya pa kale. Umusalaba tawalebomfiwa nelyo kupepwa ku Bena Kristu ba mu kubangilila. E ico, bushe uletontonkanya ifyo kuti caba icalungama ukubomfya umusalaba mu kupepa?—Amalango 7:26; 1 Abena Korinti 10:14.

7. Kuti pambi caba icakosa ukusha fimo ifya ifi fisumino ne myata. Abantu bobe ne fibusa kuti pambi baesha ukukukaanya ukuti wiyalula ifisumino fyobe. Lelo ukuteemuna Lesa kwalicilapo kucindama pa kuteemuna abantu.—Amapinda 29:25; Mateo 10:36, 37.

[Icikope pe bula 22]

Lesa tabamo Batatu

[Icikope pe bula 23]

Krisimasi na Isita fyatuntuka ku mipepele ya bufi iya pa kale

[Icikope pe bula 23]

Takwabako umulandu wa kupepela abafwa nelyo ukubatiina