Isambililo 15

Ukwaafwa Bambi Ukucita Ukufwaya kwa kwa Lesa

Mulandu nshi uwa kwebelako bambi pa lwa fintu ulesambilila? (1)

Ni bani wingebako imbila nsuma? (2)

Ni shani fintu imyendele yobe ingambukila bambi? (2)

Ni lilali lintu wingashimikila capamo ne cilonganino? (3)

1. Ukufika pano, nausambilila ifintu ifisuma ifingi ukufuma muli Baibolo. Uku kwishiba kulingile ukukutungulula ku kulundulula ubuntu bwa Bwina Kristu. (Abena Efese 4:22-24) Ukwishiba kwa musango yu kulakabilwa sana pa kuti winganonka umweo wa muyayaya. (Yohane 17:3) Nangu cibe fyo, bambi na bo balakabila ukumfwa imbila nsuma pa kuti na bo bengapusuka. Abena Kristu ba cine bonse bafwile ukucitilo bunte kuli bambi. Caba likambisho lya kwa Lesa.—Abena Roma 10:10; 1 Abena Korinti 9:16; 1 Timote 4:16.

2. Kuti watampa ukucite fi pa kwebako abapalamine na iwe ifintu fisuma ulesambilila. Ebako ulupwa lobe, ifibusa, abo usambilila na bo, na bantu ubomba na bo. Ba uwa cikuuku kabili uwatekanya ilyo ulecite ci. (2 Timote 2:24, 25) Ibukisha ukuti abantu ilingi line balolesha pa myendele ya muntu ukucila fintu bakutika ku fyo asosa. E co imyendele yobe iisuma kuti yacebusha bambi ukukutika ku bukombe ubo ulebeba.—Mateo 5:16; 1 Petro 3:1, 2, 16.

3. Mu kupita kwa nshita, kuti wafikapo ukutendeka ukushimikila pamo ne cilonganino ca Nte sha kwa Yehova uko usangwa. Iyi ni nshita iyacindama mu kulunduluka kobe. (Mateo 24:14) Fintu wingaba uwa buseko ukwaafwako umuntu umbi ukusanguka umubomfi wa kwa Yehova no kunonka umweo wa muyayaya!—1 Abena Tesalonika 2:19, 20.