Imbila ya Bufumu Na. 35

Bushe Abantu Bonse Bakatala Abatemwana?

Ukutemwa Umunensu Kwalibotelela

AMAMILIONI ya bantu baba abapelelwa kabili ababombomana, tabakwata na kwa kulola. Umwanakashi waleka ubukwebo atile: ‘Bushiku bumo icungulo, mukamfwilwa untu twikala nankwe pa ntunti imo ine akonkonseshe ku ng’anda yandi no kunjeba ukuti alitalalilwe. Nalimwebele mu cikuuku lelo mu kulungatika ukuti nimpamfiwa. Alilombele ubwelelo pa kumpumfyanya no kuya aya.’

Ku ca bulanda, ubo bwine bushiku, uyo mukamfwilwa aliipeye. Pa numa ya ico, uyu mwanakashi wa bukwebo alilile ubulanda ati “kanshi nga tamutamfishe.”

Mu kukanatemwa umunensu ilingi line mulafuma akalanda. Mu kati ka kukansana kwa mishobo mu Bosnia na Herzegovina, ifyali kale iciputulwa ca Yugoslavia, ukucila pa bantu milioni umo balibatamfishe mu mayanda yabo na bantu amakumi amakana balipaiwe. Ni bani bacitile ifyo? “Banensu,” e fyalilishike umukashana uyo bafulumwine mu mushi wakwe. “Twalibeshibe.”

Mu Rwanda, imyanda ya makana balipayaulwilwe, ilingi line ku banabo bene. “AbaHutu na baTutsi [baleikala] capamo, ukuupana, ukwabula no kusakamana nelyo fye kwishiba uwali umuHutu no wali umuTutsi,” e fyashimike The New York Times. “Lyene icintu cimo calicitike mu kupumikisha,” kabili “batendeke ukwipaya.”

Mu kupalako, abaYuda na baArabu mu Israel bekala capamo, lelo abengi balipatana. E fyo caba na kuli baKatolika abengi na baProtestanti mu Ireland na bantu bafulilako mu fyalo fimbi. Ukutemwa takwabala akubotelelapo mu calo conse nga fintu cili ilelo.

Mulandu Nshi Ukutemwa Umunensu Kwashibantukila?

Kabumba wesu alasuka. Icebo cakwe, Baibolo, cita ino nshita tuleikalamo “inshiku sha kulekelesha,” iciputulwa ca nshita ico ubusesemo bwa Baibolo bulandamo ukuti, abantu tabakakwate “icitemwishi ca cifyalilwa.” Ukulosha kuli ishi “nshita ishayafya,” na kabili ishitwa mu Malembo ukuti “ukupwa kwa pano isonde,” Yesu Kristu asobele ukuti “ukutemwa kwa bengi kukashibantukila.”—2 Timote 3:1-5, NW; Mateo 24:3, 12.

Ukukanatemwa ilelo, kanshi, kwaba lubali lwa bushinino bwa kuti tuleikala mu nshiku sha kulekelesha isha ici calo. Mu nsansa, na kabili, cipilibula ukuti ici calo ca bantu bashipepa mu kwangufyanya cikapyanikwapo ne calo cipya ica bulungami icikatekwa no kutemwa.—Mateo 24:3-14; 2 Petro 2:5; 3:7, 13.

Lelo bushe mu cine cine kuti twasumina ifyo kuti kwabako ukwaluka kwa musango yo—ukuti abantu kuti basambilila ifya kutemwana no kwikala capamo mu mutende?

Ukutemwa Umunensu—Ukwa Cine Cine

“NGO munandi nani?” e fyo loya wa mu mwanda wa myaka uwa kubalilapo aipwishe Yesu. Ukwabula ukutwishika aenekele Yesu ukwasuka ukuti, ‘MuYuda munobe.’ Lelo mu lyashi pa lwa mwina Samaria wa bucibusa, Yesu alangilile ukuti abantu ba mu nko shimbi na bo bene banensu.—Luka 10:29-37; Yohane 4:7-9.

Yesu akomailepo ukuti, icakonka pa kutemwa Lesa, ukutemwa umunensu, e cilingile ukutungulula ubumi bwesu. (Mateo 22:34-40) Lelo bushe abantu abali bonse balibala abatemwapo abanabo mu cine cine? E fyo Abena Kristu ba mu kubangilila bacitile! Baishibikilwe ku nshila batemenwemo bambi.—Yohane 13:34, 35.

Ni shani ilelo? Bushe uuli onse alikwata ukutemwa kwapala ukwa kwa Kristu? Encyclopedia Canadiana itila: “Umulimo wa Nte sha kwa Yehova waba kubuukulula no kwimika cipya cipya ubuKristu bwa pa kale ubwa kwa Yesu na basambi bakwe . . . Bonse ni bamunyina.”

Cinshi cintu ico cipilibula? Cipilibula ukuti Inte sha kwa Yehova tabasuminisha icili conse—napamo mushobo, buluko, nelyo icikulilo ca bantu—ukubalenga ukupata abanabo. Kabili te kuti bepaye uuli onse, pantu mu mampalanya balifula impanga shabo ukuba ifya kuliminako umushili na mafumo yabo ukuba ifya kutungwilako imiti. (Esaya 2:4) Na kuba, Inte baishibikilwa ku fyo baitendekelako ukwaafwa abanabo.—Abena Galatia 6:10.

E mulandu wine icipande ca muli Sacramento Union ya ku California calandilepo ati: “Kuti cakumanina nga twatile icalo conse acilaikala ukulingana ne cisumino ca fya mipepele ica ba Nte ba kwa Yehova, ukusuumya umulopa no kupatana kuti fyapwa, kabili ukutemwa kuti kwateka nge mfumu.” Kalemba wa magazini wa ku Hungary uwa Ring alandilepo ukuti: “Ninsondwelela ukuti nga ca kuti Inte sha kwa Yehova e baleikala mwi sonde beka fye, inkondo kuti shapwa, kabili umulimo bakapokola bengalabomba fye wa kulama bamotoka no kupeela amapaasu ya kwendelapo.”

Nangu cibe fyo, kwena, kano fye nga kwabako ukwaluka kukalamba mwi sonde lyonse, e lyo abantu bonse bengatemwana. Ni shani fintu uko kwaluka kukabako? (Moneni ibula lya ku numa.)

Lintu Abantu Bonse Bakatemwana

Ipepo lintu Yesu Kristu asambilishe lilangilila ukuti ukwaluka kwa kusungusha kuli mupepi. Mu Lyashi lyakwe ilya pa Lupili, Yesu atusambilishe ukupepa ukuti: “Ubufumu bwenu bwise. Ukufwaya kwenu kucitwe pano nse nga mu muulu.”—Mateo 6:10.

Bushe Ubufumu bwa kwa Lesa cinshi? Bwaba buteko bwa cine cine, ubuteka ukufuma mu muulu. E mulandu wine bwitilwa “Ubufumu bwa mu muulu.” Yesu, “Cilolo wa mutende,” alisontwa na Wishi ukuba kateka wa buko.—Mateo 10:7; Esaya 9:6, 7; Ilumbo 72:1-8.

Lintu Ubufumu bwa kwa Lesa bwaisa, cinshi cikacitika kuli ici calo caisulamo ulupato? “Ubufumu . . . bukashonaula no kupesha” amabuteko yabotelela yonse aya ici calo. (Daniele 2:44) Baibolo ilondolola ukuti: “Pano isonde paleya, . . . lelo uucito kufwaya kwa kwa Lesa ekalilila umuyayaya.”—1 Yohane 2:17.

Ukukuma ku calo cipya ica kwa Lesa, Baibolo itila: “Abalungama bakapyaninine calo, no kwikalamo inshiku pe.” (Ilumbo 37:9-11, 29; Amapinda 2:21, 22) Mwandi iyo ikaba ni nshita yawamisha! “Imfwa tayakabeko kabili iyo; takwakabe kabili ukuloosha nangu kukuuta nangu kucululuka.” (Ukusokolola 21:4) Nangu fye abafwa bakaba aba mweo na kabili, ne sonde lyonse likaalulwa ukuba paradise wa cine cine.—Esaya 11:6-9; 35:1, 2; Luka 23:43; Imilimo 24:15.

Pa kwikala mu calo cipya ica kwa Lesa, tufwile ukutemwana, nga fintu fye Lesa atusambilisha ukucita. (1 Abena Tesalonika 4:9) Umusambi wa Baibolo uwa ku Kabanga atile: “Mpembelela inshita lintu, nga fintu Baibolo yalaya, abantu bonse bakaba nabasambilila ukutemwana.” Kabili kuti twashininkisha ukuti Lesa akasunga ifilayo fyakwe! Atila: “Nalisosa, nkacilengo kwisabapo.”—Esaya 46:11.

Lelo pa kuipakisha amapaalo ya Bufumu bwa kwa Lesa, mufwile ukusambilila Baibolo, nga fintu amamilioni ya bantu ba bufumacumi mwi sonde lyonse balecita. (Yohane 17:3) Broshuwa wa mabula 32 Cinshi Cintu Lesa Afwaya Kuli Ifwe? akamwaafwa. Shiteniko uyu broshuwa pa kwisushisha akapepala kapayanishiwe pe bula lyafumako no kukatuma ku keyala ka cifulo capalamina ku mwenu.

[Abatusuminishe Ukubomfya Icikope pe bula 2]

Kepaya wa mfuti ne cililo mu Bosnia: Reuters/Corbis-Bettmann