Ukulondolola Bwino Ifyo Ifyebo Fingabomfiwa

NAMPO nga mulelanda ku muntu umo nelyo kwi bumba, te cisuma ukutunganya ukuti bakomfwa wenu bali no kusekela mu fyo mulesosa pantu fye imwe namusekelamo. Ifyebo mukwete naficindama, lelo nga tamulondolwele ifyo fingabomfiwa, napamo ibumba talyakafwaye ukukutika pa nshita yalepa.

E fyo caba na kwi bumba lya mu Ng’anda ya Bufumu. Kuti bakutika ilyo muleshimika icilangililo nelyo icacitike ico bashatala abomfwa. Lelo te kuti bakutike ilyo mulelanda pa fintu baishiba kale, na kucilisha nga mwafilwa ukulundapo na fimbi pali uyo mulandu. Mufwile ukubafwa bamone umulandu ifyebo mulesosa fingabanonsesha ne nshila fingabanonseshamo.

Baibolo itukoselesha ukutontonkanya lyonse pa fyo twingabomfya ifintu. (Amapi. 3:21) Yehova abomfeshe Yohane Kabatisha ukutungulula abantu “ku kushilimuka kwa balungama.” (Luka 1:17) Uku kushilimuka kwashintilila pa katiina ka kuli Yehova. (Amalu. 111:10) Abakatamika aya mano balafwiwa ukwikala bwino te mulandu na mafya ya ino nshita kabili balekata ku mweo wine wine, umweo wa muyayaya uukesa.—1 Tim. 4:8; 6:19.

Ifyakucita pa Kusansha mu Lyashi Ifyebo Abantu Bengabomfya. Nga mulefwaya mu lyashi lyenu mube ifyebo abantu bengabomfya, mufwile ukutontonkanya sana pa fyebo fyenu na pe bumba lyenu. Mwilabamona fye nga cinkupiti. Abapanga cinkupiti bantu umo umo ne ndupwa. Kuti muli abaice sana, abapungwe, abakalamba, na bakote. Nalimo kuti muli abatendeke nomba line ukusambilila icine pamo na batendeke ukubombela Yehova ilyo mushilafyalwa. Bamo kuti balikosoka lwa ku mupashi; bambi kuti bacili balasongwa sana ku mibele imo ne misango ya ku calo. Ipusheni amuti: ‘Bushe ifyebo ndi no kulanda kuti fyanonsha shani abali mwi bumba? Kuti nabafwa shani ukumfwa icishinka?’ Napamo kuti mwafwaya ukulanda pa fyebo finganonsha sana aba mushinku umo nelyo ibili abali mwi bumba lyenu. Lelo te kwesha ukulabililako fye kuli bambi.

Ni shani nga ca kuti mwaebwa ukulanda pa cisambilisho ca mu Baibolo icayanguka? Kuti mwacita shani pa kuti ilyashi lya musango yo linonshe abali mwi bumba abatetekela kale ico cisambilisho? Esheni ukukosha ukushininwa kwabo muli cene. Kuti mwacita shani fyo? Kuti mwacite fyo pa kupelulushanya na bo pa bushininkisho bwa mu Malembo ubutungilila ico cisambilisho. Na kabili kuti mwabalenga ukutesekesha sana ico cisambilisho ca mu Baibolo. Kuti mwacite co pa kulondolola ifyo ico cisambilisho calingana ne cine cimbi ica mu Baibolo e lyo ne mibele ya kwa Yehova umwine. Bomfyeni ifya kumwenako—nangu ificitika mu bumi—ifilanga ifyo abantu banonkelamo mu kumfwikisha ici cisambilisho na fintu caalula amatontonkanyo ya muntu pa fya ku ntanshi.

Mwilanda fye utunono pa mpela ye lyashi ku kulanga ifyo abantu bengabomfya ifyo fyebo. Pa mubalo fye pene, umo umo mwi bumba alingile ukumfwa ati “ifi fyebo nafinkuma.” Pa numa ya kubika ici citendekelo, twalilileni ukulanda ifyo ifyebo fingabomfiwa ilyo mulelanda icishinka cikalamba cimo na cimo ica lyashi ukufika fye na ku kusondwelela.

Pa kulondolola ifyo ifyebo fingabomfiwa, shininkisheni ukuti mwalanda ifilingene ne fishinte fya mu Baibolo. E kutila shani? E kutila ukulanda no kutemwa kabili no kulangulukilako. (1 Pet. 3:8; 1 Yoh. 4:8) Nangu fye ni lintu Paulo alebombela pa mafya yakakala mu Tesalonika, lyonse alekomaila pa kulunduluka kusuma ukwa ku mupashi ukwa bamunyina ba Bwina Kristu na bankashi abali kulya. Na kabili atile acetekele ukuti mu mulandu balelanshanyapo, balefwaya ukucita icalungama. (1 Tes. 4:1-12) We cipasho ubusuma ica kukonka!

Bushe ilyashi lyenu lya kucincisha abantu ukubombako umulimo wa kushimikila no kusambilisha bambi imbila nsuma? Landeni ifingacincisha bambi no kubafwa ukukatamika ili shuko. Lelo pa kucite fyo, ibukisheni ukuti imibombele ya muntu no muntu ilapusanapusana, kabili Baibolo yalilandapo pali co. (Mat. 13:23) Mwilenga bamunyinenwe bafinininwe ku kuyumfwa kwati bali no mulandu. Ilembo lya AbaHebere 10:24 litucincisha ‘ukucincimushanya ku kutemwa kabili ku kubombe milimo isuma.’ Nga ca kuti twacincimusha ku kutemwa, bakalaitendekelako ukubomba ne mitima yafumaluka. Ukucila ukupatikisha abantu ukucite fintu umo tulefwaila, ishibeni ukuti Yehova afwaya tuleafwa bambi ukukwate “cumfwila ku citetekelo.” (Rom. 16:26) Pa kwishibe ci, tufwaya ukukosha icitetekelo cesu ne ca bamunyinefwe.

Ukwafwa Bambi Ukumfwa Icishinka. Ilyo muleshimikila bambi, mwilaba ukukomaila pa fyo imbila nsuma ingabafwa. Ukucite fyo kufwaya mutontonkanye pa fyo ababa mu cifulo mushimikilamo baletontonkanya. Kuti mwaishiba shani ifyo baletontonkanya? Umfweni ku lyashi pa redio nelyo pa televishoni. Lolesheni pa lyashi lili pa ntanshi mu nyunshipepala. Esheni no kulanda ilyashi na bantu, no kukutika ilyo balesosa. Kuti mwasanga ukuti baleshomboka na mafya ya kutitikisha pamo ngo bulofwa, ukusonkela ing’anda, ukulwala, ukufwilwa mu lupwa, umwenso wa bapuupu, ukufyengwa ku balashi, ukupwa kwa fyupo, ukufunda abana, na mafya yambi. Bushe Baibolo kuti yabaafwa? Ee.

Pa kutampa ukulanshanya, napamo mukaba na cimo ico mulefwaya ukulandapo. Lelo, nga ca kuti uyo muntu alanga ukuti nakwata cimo ku mukoshi ico engafwaya ukulandapo bwangu bwangu, mwishimba ukucilandapo nga kuti mwacite fyo, nelyo kuti mwamulaya ukuti muli no kubwelelako no kumutwalila ifyebo fingamwafwa. Kwena, tatufwaya ‘ukucito bukwakwa,’ lelo tulaitemenwa ukwebako bambi ukufunda kwingabomba ukwaba mu Baibolo. (2 Tes. 3:11) Ukwabula no kutwishika, ico abantu bakatemwa sana kufunda kwaba mu Baibolo ukwingabafwa mu mikalile yabo.

Nga ca kuti abantu bafilwa ukumona ifyo ubukombe tushimikila bubakumine pa lwabo, kuti baputula ukulanshanya bwangu bwangu. Na lintu batusuminisha ukulanda, nga twafilwa ukubalanga ifyo bengabomfya ifyo tulelanda ninshi ubukombe bwesu tabwakakume ubumi bwabo. Lelo nga ca kuti twabalondolwela bwino bwino ifyo bengabomfya ifyo tulelanda, ukulanshanya na bo kuti kwayalula imikalile ya bantu.

Pa kutungulula amasambililo ya Baibolo, twalilileni ukukomaila pa fyo ifyebo fingabomfiwa. (Amapi. 4:7) Afweni abasambi ukumfwikisha ukufunda kwa mu Malembo, ifishinte, ne fya kumwenako ifibalanga ifya kwenda mu nshila sha kwa Yehova. Komaileni pa bunonshi bwaba mu kucite fyo. (Esa. 48:17, 18) Ici cikalenga abasambi ukwaluka umo balekabila ukwaluka mu mikalile yabo. Basambilisheni ukutemwa Yehova no kufwaya ukumutemuna, kabili lekeni ukufwaisha ukubomfya ukufunda kwaba mu Cebo ca kwa Lesa kufume ku mitima yabo.