Ukuba Uwashininkisha Pa Kulanda

UMUNTU nga nashininkisha pa kulanda, bambi balamona ukuti nacetekela sana ifyo alesosa. Ukushininkisha kwa musango yo e kwali no mutumwa Paulo ilyo alebomba ubutumikishi bwakwe. Alembeele abasumina mu Tesalonika ati: “Imbila nsuma yesu tayafikile kuli imwe mu nsoso yeka, lelo na mu . . . [kushininkisha, NW] kwine kwine.” (1 Tes. 1:5) Uko kushininkisha kwamonekele mu milandile yakwe na mu mikalile. Ukushininkisha kwine kwine kulingile ukumoneka na mu kushimikila kwesu ukwa cine ca mu Baibolo.

Ukuba uwashininkisha pa kulanda te kuba mano kuikwatila, uwauminina fye pa cishashininkishiwa bwino, nelyo uwaituntumba. Lelo, lintu uushininkishe alesosa ifya mu Cebo ca kwa Lesa, imilandile yakwe yumfwika iya citetekelo cine cine.—Heb. 11:1.

Inshita sha Kuba Uwashininkisha pa Kulanda. Calicindama ukuba uwashininkisha pa kulanda ilyo muli mu butumikishi bwa mwi bala. Ilingi line filya fine abantu bapoosa amano ku bukombe bwenu e fyo bapoosa na mano ku milandile yenu. Balamona ifyo muleumfwa icine cine pa fintu mulesosa. Ukushininkisha e kwingalanga sana abantu ukuti namukwata ifyacindama ifyo mulefwaya ukubeba te mashiwi yeka yeka.

Mulingile ukushininkisha na lintu mulelanda na basumina banenu. Umutumwa Petro alembele kalata wakwe uwa kubalilapo uwapuutwamo ku “kukonkomesha kabili [ku] kushimikisho kuti uku e kusenamina kwa cine kwa kwa Lesa.” Acincishe bamunyina ati: “Iminineni muli uku.” (1 Pet. 5:12) Ilyo umutumwa Paulo alelembela icilonganino ca ku Roma, ali uwashininkisha kabili ukushininkisha kwakwe kwalibanonseshe. Alembele ati: “Pantu [ninshininkisha, NW], ndeti, nangu ni mfwa, nangu mweo, nangu ni bamalaika nangu ni bamulopwe, nangu fintu ifyabapo nangu fintu ifikesabako, nangu fya maka, nangu kusansama nangu kushika, nangu icibumbwa cimbi, te kuti cibe na maka ya kutupaatululako ku kutemwa kwa kwa Lesa ukwa muli Kristu Yesu Shikulwifwe.” (Rom. 8:38, 39) Paulo na kabili alembele amashiwi ya kunashanasha ukuti calikabilwa ukushimikila kuli bambi, kabili ukupimpa kwakwe umwine muli ulya mulimo kwalangile apabuuta ukuti umwine wine alishininkishe ukuti walicindama. (Imil. 20:18-21; Rom. 10:9, 13-15) Ukushininkisha kumo kwine kulingile ukumonekela na muli baeluda ba Bwina Kristu ilelo lintu balesambilisha Icebo ca kwa Lesa.

Pe sambililo na pa nshita shimbi, abafyashi bafwile ukuba abashininkisha ilyo balelanshanya ifya ku mupashi na bana babo. Ici cikabila ukuti abafyashi batemwe Lesa ne mibele yakwe mu mitima yabo. Lyene kuti baba abashininkisha na ku mitima ilyo balelanda na bana babo, ‘pantu ku kupaka kwa mu mutima e ko akanwa kalandila.’ (Luka 6:45; Amala. 6:5-7) Ukushininkisha kwa musango yo e kukacincisha na bafyashi ukuba ne “citetekelo ica cishinka” ico abana bengapashanya.—2 Tim. 1:5.

Calicindama sana ukuba abashininkisha pa kulanda na kucilisha ilyo balesonsomba icitetekelo cenu. Napamo umwana we sukulu munenu, bakafundisha, nelyo untu mubomba nankwe kuti apapa ukuti tamulesefyako ifyo bena basefya. Ukwasuka kwashangila, ukwabamo amano napamo kuti kwayafwa uyo muntu ukucindika ifya mu Baibolo ifyo mwatetekela. Ni shani nga ca kuti umo aesha ukumusembeleka ukuti mucite ubufumfuntungu, ukunwa imiti ikola, nelyo ukucita bucisenene? Calicindama ukulondolola bwino bwino ukuti tamuli na kucita ifya musango yo no kuti nangu beshe shani ukumunashanasha, tamwakaciteko. Pa kukaana kano muli abashininkisha pa kulanda. Ilyo Yosefe alekaana ukubeleleka kwa kwa muka Potifari, alandile nashininkisha no kushininkisha ati: “Nga kanshi ningacita shani ububi ubu bukulu, no kubembukila Lesa?” Ilyo umwanakashi wa kantu akoselepo, Yosefe alifulumwike no kufumina pa nse.—Ukute. 39:9, 12.

Ifya Kucita pa Kuti Abantu Beshibe Ati Namushininkisha. Amashiwi yenu kuti yabomba sana ku kulenga mumfwike ukuti namushininkisha. Inshita ishingi ilyo Yesu alelanda ifyacindama alebalilapo ati: “Ndemwebe cine cine, nati.” (Yoh. 3:3, 5, 11; 5:19, 24, 25) Ukushininkisha kwa kwa Paulo kwaumfwikile mu mashiwi pamo nga ya kuti “ninshininkisha,” “ninjishiba, kabili ninsuubila kuli Shikulu Yesu,” na ya kuti “ndesose cine cine, nshilebepa.” (Rom. 8:38; 14:14; 1 Tim. 2:7) Yehova inshita shimo apuutilemo bakasesema bakwe ukulanda ifyebo fyabulo kutwishika ukukuma ku kufishiwapo kwa cebo cakwe, pamo nge fya kuti, “Ukwisa cikesa.” (Haba. 2:3) Ilyo mwamona muli uku kusesema, kuti mwakopako amashiwi ya kubomfya. Nga mwacetekela Yehova ukucila ukuicetekela mwe bene kabili mwalanda na bambi mucinshi mucinshi, amashiwi ayomfwika ukuti namushininkisha yakashinina bambi ukuti icitetekelo cenu calikosa.

Na kabili kuti mwaumfwika ukuti namushininkisha nga ca kuti imilandile yenu ili iyacincimuka. Ukumoneka kwa cinso, na fintu mulebomfyo mubili, fyonse filalenga mumfwike abashininkisha, nangula filapusanapusana ku bantu na bantu. Nangu fye nga muli ba nsoni nelyo abanakilila ishiwi, nga namushininkisha sana ukuti ico mulesosa ca cine kabili bambi bafwile ukumfwako, ukushininkisha kwenu kukamoneka.

Kwena, ukushininkisha kwesu konse kufwile ukuba kwa cine cine. Abantu nga bamona ukuti ifyo tulelanda tafilefuma ku mutima lelo tulebepekesha fye, bakatila ifyo tulesosa taficindeme. Kanshi icifwaikwa sana kulanda mu cifyalilwa. Ibumba nga likalamba, pa kulanda mukakabila ukwikatishako ishiwi e lyo no kulanda na maka. Lelo ico mufwile ukwimininapo, kuba abafumacumi no kulanda mu cifyalilwa.

Ifya Kwafwa pa Kuba Abashininkisha pa Kulanda. Apo ukushininkisha kwenu kusanshamo ifyo muleumfwa pa fyebo fyenu, ukupekanya kusuma kwalicindama. Ukukopolola fye ifyebo mu lupapulo no kufisungila ku mutwe te cikabilwa fye. Mufwile ukumfwikisha ifyo fyebo no kufilanda mu mashiwi yenu. Mufwile ukushininkisha icine cine ukuti fya cishinka no kuti ifyo mulesosa naficindama ku bantu mulelandako. E kutila pa kupekanya ilyashi, mufwile ukutontonkanya pa fyo balepitamo pamo no kumona ifyo baishibapo kale pa fyebo fyenu atemwa ifyo bali no kuyumfwa pali fyene.

Nga ca kuti imilandile yesu nailongoloka, cikanguka kuli bambi ukumfwa ukuti natushininkisha ifyo tulesosa. Kanshi pa kupekanya ifyebo fisuma, mufwile ukupekanya sana ne nshila mukalandilamo. Pooseniko sana amano ku fyebo filekabila ukulandwa mu kucincila pa kuti ilyo mulefilanda tamufindamine sana pa fyo mulembele. Ibukisheni no kupepa ukuti Yehova amupaale ilyo mulepekanya. Nga mulecite fi muli no ‘kupama muli Lesa wesu’ ku kulanda mu nshila ikalanga ukuti namushininkisha ati ifyebo fyenu fya cishinka kabili naficindama.—1 Tes. 2:2.