ISAMBILILO 15

Mulelanga Ukuti Namushininkisha Ifyo Mulelanda

1 Abena Tesalonika 1:5

IFILI MULI ILI ISAMBILILO: Mulelanga ukuti namushininkisha ukuti ifyo mulelanda fya cine kabili fyalicindama.

Mulepekanya bwino. Muleisambilisha ifyebo mpaka mwaumfwikisha ifishinka ifikalamba kabili mwaishiba ne fyo Baibolo ilanga ukuti ifyo fishinka fya cine. Muleesha ukulanda ifishinka ifikalamba mu mashiwi fye ayanono kabili ayayanguka. Mulebika amano ku fyo ifyebo fingafwa abakalakutika. Mulelomba Yehova alemupeela umupashi wa mushilo.

Mulepituluka mu lyashi lyenu mu kupongomoka pa kuti mulishibe bwino kabili mukalilande bwino.
Mulelanda amashiwi ayalelanga ukuti namushininkisha ifyo mulelanda. Mulelanda mu mashiwi yenu ukucila ukulalanda fye amashiwi filya fine yalembwa mu mpapulo. Mulesala amashiwi ayalelanga ukuti namushininkisha ukuti ifyo mulelanda fya cine.
Mulelanga ukuti namushininkisha ifyo mulelanda no kuti naficindama. Ishiwi lifwile lileumfwika ilyo mulelanda. Nga ca kuti uko mwikala caliba fye bwino ukulolesha abantu ilyo mulelanda nabo, mulebalolesha.

Mwilamona kwati nga namushininkisha ukuti ifyo mulelanda fya cine ninshi mufwile ukulalanda fye icilandelande, ukuumina kumo, nelyo ukupatikisha abantu ukucita ifyo mulebeba. Na lintu mulelanda ifyo mushininkishe ukuti fya cine kabili naficindama, abalekutika balingile ukumona ukuti namutemwa.