Ukusosa Ifyebo Fyalungika

MULANDU nshi Umwina Kristu pambi engalandila ifyebo fishili fya cine? Napamo kuti alebwekeshapo fye ifyo bamushimikile ukwabula ukubebeta nga fishinka. Nelyo kuti akukumya ukwabula ukwishiba ati taumfwikishe ifyo abelengele. Nga ca kuti twayangwa ku kusosa ifyebo fyalungika na mu tuntu tunono, bakomfwa wesu bakamona ukuti kuti bacetekela ne ficindeme sana ifili mu bukombe bwesu.

Mu Butumikishi bwa mwi Bala. Abengi balatiina ukutampa ukuya mu butumikishi bwa mwi bala pantu balishiba ukuti kucili ifingi ifyo tabalasambilila. Lelo, basango kuti kanshi kuti bashimika ubunte busuma, nangu ca kuti baishibako fye icine panono. Kuti bacita shani fyo? Umuti kupekanya.

Ilyo mushilaya mu mulimo wa mwi bala, ishibeni bwino umulandu mulefwaya ukuyalandapo. Elenganyeni amepusho bakomfwa wenu bengepusha. Sokoteni ifyasuko fyafikapo ukufuma muli Baibolo. Ici cikamwafwa ukwasuka ifyasuko fyalungama mu mutekatima. Bushe muleya ku kutungulula isambililo lya Baibolo? Pitulukeni bwino bwino mu fyebo mukasambilisha. Shininkisheni ukuti namumfwikisha ifyasuko fya mu Malembo ku mepusho yapulintwa.

Ni shani nga ca kuti mwine ng’anda nelyo untu mubomba nankwe aipusha icipusho ico mushiipekenye ukwasuka? Nga muletwishika ulwa fishinka, te kwesha ukutunganya fye. “Umutima wa mulungami welenganye ca kwasuka.” (Amapi. 15:28) Kuti mwasanga ubwafwilisho mu citabo ca Ukupelulula Ukufuma Mu Malembo nelyo mu “Ifyebo fya Baibolo fya Kulanshanyapo” nga mwalikwata ifi mu lulimi lwenu. Nga tamwakwata, ebeni uyo muntu ukuti muli no kuyasapika e lyo no kubwelelako. Nga ca kuti uwipwishe icipusho cine cine alefwaya fye ukwishiba, akapembelela icasuko calungama. Na kuba, napamo kuti atemwa sana ukumona ifyo mwaicefya.

Ukubomba mu butumikishi bwa mwi bala na bakasabankanya bafikapo kuti kwalenga mwaishiba sana ifya kulungiko kusose Cebo ca kwa Lesa. Moneni amalembo babomfya ne fyo bayalondolola. Icefyeni no kukutika ku mitubululo iili yonse nelyo ukulungika bengamulungika. Umusambi wapimpa Apolo alinonkelemo mu kwafwa apokelele ukufuma kuli bambi. Luka alondolola Apolo ukuti ali “inkolobwa,” “uwa maka mu kwishiba amalembo,” kabili “uwapimpa mu mutima,” umuntu “[uwalelanda] no kusambilisha no mucetekanya ulwa kwa Yesu.” Lelo, taumfwikishe fyonse. Ilyo Priskila na Akula bamwene fi, “balimubuulile bamutwele ku mwabo no kumukolobondelamo Inshila ya kwa Lesa ukwa kushikimikisho kucilamo.”—Imil. 18:24-28.

‘Ukwikatishe Cebo ca Cishinka.’ Ifyo tusosa mu cilonganino filingile ukulanga ukuti twalicindikisha umulimo wa cilonganino uwa kuba “ulupanda kabili ishintililo ifya Cine.” (1 Tim. 3:15) Pa kuti tutungilile cine, calicindama ukumfwikisha amalembo ayo tulepanga ukubomfya mu malyashi. Lolesheni pa mashiwi yashingulukako aya malembo no bufwayo bwa yako.

Limo kuti mwalanda ku cilonganino ifyo na imwe mwaumfwile fye. Kwena, “ifwe bonse tuipununa apengi.” (Yako. 3:2) Lelo muli no kunonkelamo nga mwabelesha ukucite fintu ifyafwa ukulanda ifyebo fyalungama. Bamunyina abengi abalembesha mwi Sukulu lya Butumikishi Ilya Bulesa mu kupita kwa nshita bakaba baeluda. Abantu bafwaya “ifyacilamo” ukufuma ku bapeelwa imilimo ya musango yo. (Luka 12:48) Nga ca kuti eluda ku mulekelesha apanda aba mu cilonganino amano yalubana ayengalenga amafya yabipisha, uyo eluda kuti ayobwela ubukali bwa kwa Lesa. (Mat. 12:36, 37) Kanshi, munyina uwafikapo ukuba eluda afwile ukwishibikwa ukuti “[alikatishe] Cebo ca cishinka umwabele sambilisho.”—Tito 1:9.

Sakamaneni pa kuti ifyo mulelanda filingane ne “cipasho ca fyebo fituntulu” ifyaba mu cine conse ica mu Malembo. (2 Tim. 1:13) Ici tacilingile ukumutiinya. Napamo tamulapwa ukubelenga Baibolo yonse. Twalilileni ukubombelapo. Lelo pali ino nshita, moneni ifyo imitubululo yakonkapo ingamwafwa ukulingulula ifyebo mulepanga ukusambilisha.

Intanshi, ipusheni amuti: ‘Bushe ifi fyebo fyalingana ne fyo nasambilila kale mu Baibolo? Bushe fili no kulenga bakomfwa wandi ukupalama kuli Yehova, atemwa fili no kusumbula amano ya ku calo, no kukoselesha abantu ukutungululwa na yene?’ Yesu atile: “Icebo cenu e cine.” (Yoh. 17:17; Amala. 13:1-5; 1 Kor. 1:19-21) Lyene, bomfyeni bwino impapulo shapekanishiwa ne bumba lya musha wa cishinka kabili uwashilimuka. Ishi shikamwafwa ukumfwikisha bwino amalembo e lyo no kukanacilamo mu fyalembwa pa kuyalondolola kabili ukuba abalinga. Nga mwashimpa amalyashi yenu pa “cipasho ca fyebo fituntulu,” ifyo mulesosa fikaba ifyalungama. Na pa kulondolola amalembo no kulanda ifyo yengabomba nga mwashintilila pa fyebo fya bantu Yehova abomfya ku kutwebelamo ifintu, ifyo musosa fikaba ifyalungama.

Ukubebeta Ifyebo Nga Nafilungama. Ilyashi lya filecitika pano isonde, ifyebo fya kufumya kumbi, ne fya kukumanya kuti fyabomba bwino ilyo mulepeela icilangililo pa fishinka fimo no kulondolola ifyo fingabomba. Kuti mwashininkisha shani ukuti nafilungama? Inshila imo yaba kufumya ifyo fyebo ku ntulo iishingatwishikwa. Ibukisheni ukubebeta ukumona ukuti ifyo fyebo te fya kale umwapita no mwela. Ifipendo filaaluka; ifyo basayantisti basanga bwangu bwangu fiba ifya fye ilyo kwaisa fimbi ifipya; kabili ilyo abantunse baleumfwikisha ifya lyashi lya kale ne ndimi sha kale, ifishinka fya kale fifwile ukupitulukwamo. Cenjeleni sana nga mulefwaya ukubomfya ifyebo fya mu nyunshipepala, pa televishoni, pa redio, ne fya pa Intaneti. Amapinda 14:15 yafunda ati: “Uwapelwa amano atetekele cebo conse; lelo uwacenjela amwensekeshe nyantilo shakwe.” Ipusheni amuti: ‘Bushe iyi ntulo ndefumyamo ifyebo yaishibikwa ukuti ilanda ifyalungama? Bushe kuli inshila shimbi mwingabomfya ku kumona nga nafilungama?’ Nga muletwishika ifyebo fimo, mwifibomfya.

Ukulunda pa kubebeta intulo ya fyebo fyenu nga kuti yacetekelwa nelyo iyo, tontonkanyeni mu kusakamanishisha fintu mulepanga ukubomfya ifyo fyebo. Shininkisheni ukuti ifyebo mufumishe kumbi ne fipendo fyalingana ne lyashi fyalelandapo uko kwine mwafifumishe. Ilyo mulefwaya ukukomaila pa cishinka cimo, cenjeleni. Amashiwi yaleti “abantu bamo bamo” mwiyasosa ati “abantu abengi,” ayaleti “abantu abengi” mwiyasosa ati “abantu bonse,” na yaleti “inshita shimo shimo,” mwiyasosa ati “inshita shonse.” Ukukukumya amalyashi na malipoti yalimo impendwa, ubukulu bwa fintu, nelyo ifyo fibipile kuti kwalenga abantu balamutwishika.

Nga ca kuti lyonse mulesosa ifyebo fyalungika, abantu bakamwishiba ati mwalicindika icine. Ici cilenga abantu ukucindika Inte sha kwa Yehova shonse. Ne cacindamisha ca kuti cilalenga balecindika “Yehova, Lesa wa cishinka.”—Amalu. 31:5.