ISAMBILILO 7

Ifyebo fya Cine Kabili Ifingalenga Abaleumfwa Bashininkisha Fimo

Luka 1:3

IFILI MULI ILI ISAMBILILO: Mulelanda ifyebo fya cine ifingalenga abaleumfwa baishiba icishinka.

Mulelanda ifyebo fya cine. Ifyo mulelanda filingile ukufuma mu Cebo ca kwa Lesa. Kuti mwabelenga Icebo ca kwa Lesa nga nacilinga. Nga mwalanda pa fyo basayantisti basanga, pa fyo balandile pa mulabasa nelyo mu nyunshipepala nangu pa Intaneti, pali fimo ifyacitike, nelyo pa fishinka fimbi, mulingile ukushininkisha ukuti ifyo fyebo fya cine kabili tafyayaluka.
Mulebomfya bwino ifyebo. Mulelondolola amalembo ukulingana ne fyo yalelandapo, ukulingana ne lyashi ilikalamba ilyo Baibolo ilandapo sana, no kulingana ne fyo impapulo isho “umusha wa cishinka kabili uwashilimuka” apekanya shilanda. (Mat. 24:45) Nga mulebomfya ifyebo ifyo abantu balemba, mulefibomfya ukulingana no mo abalembele baloseshe, kabili mwilafilanda mu nshila ya kuti ubupilibulo bwalola fye mumbi mumbi.

Tamufwile ukukukumya pa kulanda ifishinka nelyo ifipendo. Mulingile ukuba abacenjela pa kuti amashiwi ya kuti “abantu bamo” tamuyalandile ukuti “abantu abengi,” “limo limo” tamuilandile ukuti “lyonse,” kabili “cifwile” tamuilandile ukuti “nalimo.”
Mulepelulushanya. Nga mwabelenga ilembo nelyo mwalanda ifyaba mu lupapulo lumo, ipusheni amepusho ayashingakalifya abalekutika nelyo langilileni pa kuti abene bashininkishe ico mulelandapo.