Ukubomfya Bwino Ifya Kulangililako

MULANDU nshi uwa kubomfesha ifya kulangililako pa kusambilisha? Pantu kuti calenga ukusambilisha kwenu ukufika abantu pa mitima. Yehova Lesa na Yesu Kristu balibomfeshe ifya kulangilila, kuti twasambililako kuli bene. Nga ca kuti ifya kulangililako fyabomfiwa pamo na mashiwi, ifyebo fyumfwilwa pabili. Ici kuti calenga abantu ukupoosako sana amano no kulenga ifyo mulesosa fiikale mu mintontonkanya yabo. Kuti mwacita shani pa kusanshako ifya kulangilila ilyo muleshimikila imbila nsuma? Kuti mwaishiba shani ati mulefibomfya ku kufika abantu pa mitima?

Ifyo Bakasambilisha Bapulamo Babomfeshe Ifya Kulangililako. Yehova abomfeshe ifya kulangililako ifishingalabwa ku kusambilisha amasambililo yacindama. Ubushiku bumo afumishe Abrahamu pa nse no kusosa ati: “Shi lolesha mu muulu, upende ne ntanda, nga wingashipenda: . . . E fyo kukabo bufyashi bobe.” (Ukute. 15:5) Nangula ku muntunse icalaiwe camoneke nge cishingacitika, Abrahamu calimukuntile ica kuti atetekele Yehova. Pa nshita imbi, Yehova aebele Yeremia ukuya ku ng’anda ya mubumfi kabili amwebele ukwingila umo alebombela ku kumona uko alemumunga ibumba. Ilyo lyali lisambililo lishingalabwa pa fyo Kabumba akwata amaka pa bantunse! (Yer. 18:1-6) Kabili bushe Yona ali no kulaba isambililo Yehova amusambilishe pa lwa nkumbu ukubomfya ulungu? (Yona 4:6-11) Yehova aleeba fye na bakasesema bakwe ukwangalako fimo ifya mu kusesema ilyo balebomfya ifisolobelo fimo. (1 Isha. 11:29-32; Yer. 27:1-8; Esek. 4:1-17) Ihema ne mbali shimo ishe tempele na fyo filangililo fya kutwafwa ukuumfwa ifya cine cine ifya mu muulu. (Heb. 9:9, 23, 24) Lesa abomfeshe sana ne fimonwa ku kweba abantu ifyebo fyacindama.—Esek. 1:4-28; 8:2-18; Imil. 10:9-16; 16:9, 10; Ukus. 1:1.

Ni shani fintu Yesu abomfeshe ifya kulangililako? Ilyo abaFarise na bena Herode baeseshe ukwikatila Yesu mu fyebo, aebele ukuti bamulange indalama kabili alandile pa cipasho ca kwa Kaisare icali pali ilyo ikobili. Lyene alondolwele ati ifya kwa Kaisare filingile ukupeelwa kuli Kaisare lelo ifya kwa Lesa filingile ukupeelwa kuli Lesa. (Mat. 22:19-21) Pa kusambilisha ulwa kucindika Lesa kuli fyonse ifyo twakwata, Yesu alandile pali mukamfwilwa mubusu pe tempele untu umusangulo wakwe uwa tunyampuku tubili twa ndalama, e ndalama fye sha kuliilamo akwete. (Luka 21:1-4) Pa nshita na imbi, abomfeshe umwana munono nge ca kumwenako ca kuba uwaicefya, uushiibililika. (Mat. 18:2-6) Kabili umwine alangile umo calola ukuba uwaicefya ilyo asambile amakasa ya basambi bakwe.—Yoh. 13:14.

Inshila sha Kubomfeshamo Ifya Kulangililako. Ifwe tatwaba nga Yehova uwingomfwana na bantu ukupitila mu fimonwa. Lelo mu mpapulo sha Nte sha kwa Yehova mulaba ifikope ifingi ifibalamuna ukutontonkanya. Fibomfyeni ukwafwa abalefwaya ukusambilile cine ukuti belenganye ifikaba Paradise wa pe sonde, uwalaiwa mu Cebo ca kwa Lesa. Pe sambililo lya Baibolo ilya mu ng’anda, kuti mwalanga umusambi icikope campene ne fyo mulesambilila no kumwipusha ukulanda ifyo amona. Moneni ukuti ilyo Yehova alangile ifimonwa fimo kuli kasesema Amose, amwipwishe ati: “Cinshi ulemona, Amose?” (Amose 7:7, 8; 8:1, 2) Na imwe kuti mwaipusha amepusho ya musango yu ilyo mulelanga abantu ifikope fya kusambilishishako.

Nga mwalemba amapendo nelyo charti ulipo imyaka ilelanga umo ifintu fyakonkanine ukucitika, kuti cayafwa abantu ukuumfwa bwangu ukusesema pamo ngo kwa “myaka cinelubali [7]” ukwa muli Daniele 4:16 no kwa “bacinelubali [7] amakumi cinelubali [70] ba myaka” ukwa muli Daniele 9:24. Ifyo ifya kulangililako e mo fyaba mu mpapulo shesu ishingi isha kusambililamo.

Mwi sambililo lyenu ilya Baibolo ilya lupwa, ilyo mulelanshanya ifye hema, itempele lya mu Yerusalemu, ne cimonwa ca kwa Esekiele ice tempele, kuti fyayanguka ukuumfwa nga mwabomfya ifikope. Ifi kuti mwafisanga mu fitabo fya Insight on the Scriptures, icisontelelo ca muli Baibolo wa New World Translation of the Holy Scriptures—With References, na mu fipande fyalekanalekana ifya Ulupungu lwa kwa Kalinda.

Ilyo mulebelenga Baibolo no lupwa lwenu, mulebomfya sana bamapu. Konkeni ubulendo bwa kwa Abrahamu ukufuma ku Uri ukuya ku Harani no kutentemuka ukufika ku Betele. Moneni inshila yapitilemo uluko lwa bena Israele ilyo bafumine mu Egupti no kuya ku Calo Calaiwe. Fwayeni impanga yapeelwe ku mukowa umo na umo uwa Israele ku kube cikwatwa. Bebeteni ubukulu bwa bufumu bwa kwa Solomone. Konkeni inshila Eliya apitile pa kufulumuka ukufuma ku Yesreele ukuyafika na ku matololo bushilya bwa Beere-sheba ilyo bamutiinishe kuli Yesebele. (1 Isha. 18:46–19:4) Fwayeni imisumba ne mishi Yesu ashimikilemo. Lonsheni inyendo sha kwa Paulo ishalondololwa mwi buuku lya Imilimo.

Ifya kulangililako filabomba bwino ilyo mulelondolwela umusambi wa Baibolo imilimo ya cilonganino. Kuti mwalanga umusambi programu wa ku kulongana kwa muputule nelyo ukwa citungu no kumulondolwela ifyebo tusambilila pali uku kulongana. Abengi balitemenwe sana ilyo batandalile Ing’anda ya Bufumu nelyo amaofeshi ya Nte sha kwa Yehova. Iyi kuti yaba ni nshila isuma iya kupwishishamo umutunganya pa mulimo wesu no bufwayo bwa uko. Ilyo muletandasha umo pa Ng’anda ya Bufumu, londololeni ifyo yapusana ne fifulo fya kupepelamo ifyashala. Mulondolweleni ukuti ici cikuulwa tacapuulama ukucishamo, ca kusambilililamo fye. Mulangeni fimo ifya kutwafwa mu butumikishi bwesu ubwa ku cintubwingi pamo nga palya bapokela impapulo, bamapu ba cifulo ca kushimikilamo, no tubokoshi twa misangulo (tacaba nga filya bambi bapishamo imbale).

Ukwaba amavidio yapekanishiwa ne Bumba Litungulula, kuti mwayabomfya ku kulenga abantu ukucetekela Baibolo, ukulenga beshibe pa lwa mulimo wa Nte sha kwa Yehova, no kukoselesha abaletamba ukwikala imikalile yalingana ne fishinte fya mu Baibolo.

Ukubomfya Ifya Kulangililako kwi Bumba Likalamba. Ifya kulangililako kuti fyasambilisha bwino sana ibumba likalamba nga fyapekanishiwa bwino no kubomfiwa bwino pa kulanda. Ibumba lya musha wa cishinka kabili uwashilimuka lipekanya ifya kulangililako ifya musango yo ifyalekanalekana.

Ifyebo fya kusambililamo mu Ulupungu lwa kwa Kalinda ilingi line fisanshamo ifya kulangilila pamo nge fikope ifingabomfiwa kuli katungulula ku kukomaila pa fishinka fyacindama. Filasangwa na mu mpapulo shibomfiwa pe Sambililo lya Citabo pa Cilonganino.

Mu maautulaini yamo aya malyashi ya ku cintubwingi kuti camoneka ukuti ifya kulangililako kuti fyabomba bwino ku kulangilila ifishinka. Lelo, ilingi line kuti cawama sana ukulanda sana pa fili muli Baibolo, iyo abengi mwi bumba bakwata. Nga ca kuti inshita shimo mwasanga ukuti kuti cakabilwa ukubomfya icikope nelyo ukulenga icikope ca kulondolola ifishinka fikalamba, bebeteleni kabela nga cilemoneka (nelyo ukubelengwa) bwino bwino ku bali ku numa ya cifulo ca kulonganinamo. Ifya musango yu filingile ukubomfiwa fye mu nshita mu nshita.

Ubuyo bwa kubomfya ifya kulangililako pa kulanda no kusambilisha te bwa kusekesha fye abantu. Lintu mwabomfya ica kulangililako ca mucinshi, cilingile ukulenga abantu ukumone fyebo mulefwaya ukukomailapo sana. Ifya kulangililako fya musango yo fibomba bwino nga ca kuti fileangushako ifyo mulesosa pa kuti abantu bafyumfwikishe, nelyo nga fili bushininkisho bwine bwine ubwa kuti ifyo mulesosa fya cishinka. Ica kulangililako cisuma nga cabomfiwa bwino kuti cafika abantu pa mitima ica kuti fyonse fibili ica kulangililako ne cishinka mulesambilisha kuti fileibukishiwa pa myaka iingi.

Ukuumfwa no kumona fyonse fyalicindama nga nshi mu kusambilila. Ibukisheni ifyo Bakasambilisha bapulamo babomfya ukuumfwa no kumona, kabili esheni ukubapashanya ilyo mulebombesha ukusambilisha bambi.