Bushe Kuti Mwatemwa Ukwishiba na Fimbi Pali Baibolo?
Mulandu Nshi uwa Kubelengela Baibolo?
BAIBOLO yalipusana ne fitabo fyonse—pantu mwalembwa ukufunda kusuma ukwafuma kuli Lesa. (1 Abena Tesalonika 2:13) Nga mwabomfya ifyo Baibolo isambilisha, mukamwenamo apakalamba. Mukacilapo ukutemwa Lesa no kupalamina kuli wena, uwaba Kapeela wa “ca kupeelwa conse icisuma ne ca bupe conse icafikapo.” (Yakobo 1:17) Mukeshiba ifya kulanda na wene mwi pepo. Ilyo muli na macushi, Lesa kuti amwafwa. Nga mwalenga imikalile yenu ukumfwana na mafunde yakwe ayaba muli Baibolo, Lesa akamupeela umweo wa muyayaya.—Abena Roma 6:23.
Muli Baibolo mwaba icine icishilimuna. Abasambilila ifyaba muli Baibolo balalubulwa ku fisambilisho fya bufi ifitungulula imikalile ya bantu abengi nga nshi. Ku ca kumwenako, ukwishiba icine pa cicitika nga twafwa kulatulubula ku kutiina ukuti abafwa kuti batucena nelyo ukuti balupwa wesu na banensu abafwa balecula. (Esekiele 18:4) Ifyo Baibolo isambilisha pa kubuuka kwa bafwa kuti fyasansamusha abantu abafwilwa abantu batemwa. (Yohane 11:25) Ukwishiba icine pali bamalaika babifi kutulenga ukwishiba amafya yaba mu kupupe mipashi kabili kulatwafwa ukumfwikisha umulandu pe sonde pabela ubucushi ubwingi.
Ifishinte fya bukapepa ifyaba muli Baibolo fitulanga imikalile ingatunonsha lwa ku mubili. Ku ca kumwenako, ukuba “uwa mushiye” kulafwako ukuba no bumi busuma. (1 Timote 3:2) Nga ‘twaisangulula ku kukantana konse kwa mubili no mutima,’ te kuti tonaule ubumi bwesu. (2 Abena Korinti 7:1) Ukukonka ukufunda kwa kwa Lesa ukwaba muli Baibolo na kabili kulalenga insansa mu cupo no kulenga umuntu ukumfwa uwacindama.—1 Abena Korinti 6:18.
Nga mulebomfya Icebo ca kwa Lesa, mukaba aba nsansa. Ukwishiba kwaba mu Baibolo kulatwafwa ukusanga umutende ne nsansa ifya lwa nkati kabili kulatupeela isubilo. Kulatwafwa ukuba ne mibele isuma pamo nga inkumbu, ukutemwa, ukusekelela, umutende, icikuuku, ne citetekelo. (Abena Galatia 5:22, 23; Abena Efese 4:24, 32) Imibele ya musango yo ilatwafwa ukuba abalume nelyo abakashi basuma, bashibo nelyo banyinabo basuma, abana baume nelyo abana banakashi basuma.
Bushe mwalibala amutontonkanya pa fyo cikaba ku ntanshi? Ukusesema kwa muli Baibolo kulatulanga inshita tulipo. Uku kusesema kulalondolola ifyo icalo cili ndakai ne fyo Lesa nomba line akalula isonde ukuba paradise.—Ukusokolola 21:3, 4.
Ukwafwa ku Kumfwikisha Baibolo
Nalimo mwalyesha ukubelenga Baibolo kabili mwasanga ukuti yalyafya ukumfwa. Nalimo tamwaishiba apo mwingamona muli Baibolo pa kusanga ifyasuko ku fipusho fyenu. Nga e fyo caba, tamwaba mweka. Bonse tulakabila ukwafwa ku kumfwikisha Icebo ca kwa Lesa. Inte sha kwa Yehova, mu fyalo nalimo 235, balasambilisha abantu abengi nga nshi Baibolo apa fye. Bakaba aba nsansa ukumwafwa na imwe.
Ilingi line cilawamisha ukusambilila Baibolo panono panono, ukubalilapo ne fisambilisho fya kutendekelako. (AbaHebere 6:1) Ilyo mulesambilila, mukaba abafikapo ukulya “ifilyo ifyakosa”—e kuti, icine icishayanguka ukumfwa. (AbaHebere 5:14) Muli Baibolo e mufuma ifyebo fya cine. Impapulo shilanda pali Baibolo, pamo nga broshuwa wa Cinshi Cintu Lesa Afwaya Kuli Ifwe?, shikamwafwa ukumfwikisha Amalembo yalanda pa fyalekanalekana.
Bushe Kuti Mwatemwa Ukulubulako Inshita Cila Mulungu Ukumfwikisha Baibolo?
Isambililo lya Baibolo kuti lyateyanishiwa pa nshita ne cifulo ifingamuwamina. Abantu abengi balabasambilisha beka mu mayanda yabo. Bamo balasambilila fye na pali lamya. Ili sambililo, te kusambilila na bantu abengi kwati ni mu kalasi, lelo lyenu fye mweka ukulingana ne fyo imibele yenu ili, ukusanshako apo mwapeela mu kwishiba na mu masomo. Takwaba amashindano, kabili tamwakalengwe insoni. Ifipusho fyenu pa lwa Baibolo fikasukwa, kabili mukasambilila ifya kupalamina kuli Lesa.
Tamufwile ukulipila pa kumusambilisha Baibolo. (Mateo 10:8) Tusambilisha ukwabula ukulipilisha ku bantu ba mu mipepele yonse na ku bashipepa lelo abalefwaya icine cine ukwishibilako na fimbi pa Cebo ca kwa Lesa.
Ni bani bengasangwako ilyo mulesambilila? Aba mu ng’anda yenu bonse. Abanenu bonse abo mulefwaya ukuti basangweko na bo kuti basangwako. Nelyo nga mulefwaya, kuti mwasambilila fye mweka.
Abantu abengi balapaatulako iawala limo cila mulungu ukusambilila Baibolo. Nga kuti mwapaatulako inshita yakulako nelyo iyacepako cila mulungu, baNte bakaitemenwa ukumwafwa.
Tulemulaalika Ukusambilila
Tulemulaalika ukumonana ne Nte sha kwa Yehova. Inshila imo mwingacita ici kulemba ku keyala kali pe samba. Lyene tukapekanya umo ukusambilila Baibolo na imwe mu mwenu apa fye.
□ Ntumineniko broshuwa wa Cinshi Cintu Lesa Afwaya Kuli Ifwe?
□ Shi mukesentandalila ukukuma isambililo lya Baibolo ilya mu ng’anda.
Ukwambula kwa Malembo muli uyu trakiti kufumine muli Baibolo wa Cibemba uwa 1956, kano fye nga twalanga ukuti twambwile kumbi.