Yesu Atusambilisha Ifya Kupepa

BUSHE ulalanda na Yehova Lesa?— Afwaya ulelanda na wene. Lintu ulelanda na Lesa, e citwa ipepo. Ilingi Yesu alelanda na Wishi ku muulu. Inshita shimo alefwaya ukuba eka ilyo alelanda na Lesa. Inshita imo, Baibolo ilanda ati, ‘Aninine ulupili eka ku kupepa. Nangu bwailile, aliko eka.’—Mateo 14:23.

Ni kwi wingaya ku kuyapepa weka kuli Yehova?— Napamo kuti waba weka ulelanda na Yehova ilyo ushilasendama ubushiku. Yesu alandile ati: “Ilyo ulepepa, ingila mu muputule obe uwa mu kati ka ng’anda, isalako ne ciibi cobe, no kupepa kuli Wiso.” (Mateo 6:6) Bushe ulapepa kuli Yehova lyonse ubushiku ilyo ushilasendama?— Ufwile ukucite co.

Yesu alepepa na lintu ali na bantu bambi. Lintu umunankwe Lasaro afwile, Yesu apepele na bambi pa ncende Lasaro abikilwe. (Yohane 11:41, 42) Kabili Yesu alepepa na lintu alongene na basambi bakwe. Bushe ulaya ku kulongana uko amapepo yapepwa?— Kulya ilingi abakalamba e bapepa. Ulekutikisha ku fyo balelanda pantu balekulandilako kuli Lesa. Lyene kuti walanda “Amene” ilyo ipepo lyapwa. Bushe walishiba ifyo cipilibula ukulanda ati “Amene” lintu ipepo lyapwa?— Cipilibula ati lilye pepo naulitemwa. Cipilibula ati wasuminisha ifyalandwa no kuti na iwe e fyo ulefwaya.

Yesu alepepa na pa kulya. Aletasha Yehova pa fya kulya fyakwe. Bushe lyonse ulapepa pa kulya?— Cisuma ukutasha Yehova pa kulya. Umuntu umbi kuti apepa ilyo muleliila capamo. Lelo ni shani nga ulelya weka? Nelyo ni shani nga ulelya na bantu abashitasha Yehova?— Lyene ufwile ukuipepela.

Bushe lyonse ufwile ukupepa ne shiwi lileumfwika? Nelyo bushe Yehova kuti akuumfwa nangu ulepepela mu mutima?— Kuti twasanga icasuko ku fyacitikile Nehemia. Ali ni kapepa wa kwa Yehova uwalebombela pa ng’anda ya Mfumu ya bena Persia, Artakishashete. Bushiku bumo Nehemia ali sana no bulanda pantu aumfwile ukuti ifibumba fya Yerusalemu, umusumba ukalamba uwa bantu bakwe, nafiwa.

Lintu imfumu yaipwishe Nehemia umulandu alemonekela uwa bulanda, Nehemia abalilepo ukupepa mu mutima. Lyene Nehemia aebele imfumu umulandu alemonekela uwa bulanda no kulomba nga kuti aya ku Yerusalemu ku kuyakuula filya fibumba na kabili. Cinshi cacitike?—

Lesa aaswike ipepo lya kwa Nehemia. Imfumu yasuminishe Nehemia ukuya! Imfumu yapeele na Nehemia ifimuti ifingi ifya kubomfya ku kukuulila ifibumba. E co Lesa kuti aasuka amapepo yesu, nangu tulepepela mu mutima.—Nehemia 1:2, 3; 2:4-8.

Nomba tontonkanya pali ci. Bushe ufwile ukukontama ilyo ulepepa? Bushe ufwile ukufukama? Uletipo shani?— Inshita shimo Yesu alefukama pa kupepa. Inshita shimbi aleiminina. Kabili inshita shimo alelolesha mu muulu, nga fintu acitile ilyo alepepelako Lasaro.

E co, cinshi ici cilanga?— Cilanga ukuti tacacindama ifyo uli ilyo ulepepa. Inshita shimo cilawama ukukontama no kushibata. Inshita shimo kuti wafukama no kufukama, nga fintu Yesu acitile. Lelo, ibukisha, kuti twapepa kuli Lesa pa nshita iili yonse iya kasuba nelyo ubushiku, kabili akatumfwa. Icacindama pa lwe pepo ca kuti tufwile ukucetekela ukuti Yehova aleumfwa. Bushe walisumina ukuti Yehova alomfwa amapepo yobe?—

Finshi tufwile ukulanda mu mapepo yesu kuli Yehova?— Njebako: Ilyo ulepepa, finshi weba Lesa?— Yehova alatupeela ifintu ifisuma ifingi, kabili cisuma ukumutashishapo, bushe te ifyo?— Kuti twamutasha pa fya kulya tulya. Lelo bushe walimutashapo pa myulu, ifimuti, na maluba yasuma?— E wafipangile na fyo.

Abasambi ba kwa Yesu inshita imo bamwipwishe ukubasambilisha ifya kupepa. E co Kasambilisha Mukalamba acitile ifyo fine, kabili abalangile ifyacindama ifya kupepelapo. Bushe walifishiba?— Buula Baibolo yobe, no kwisula pali Mateo icipandwa 6. Mu fikomo 9 ukufika ku 13, tusanga ico abantu abengi beta ati Ipepo lya We Shifwe. Natubelengele pamo.

Pano tusambilila ukuti Yesu atwebele ukupepela ishina lya kwa Lesa. Alandile ati tufwile ukupepela ishina lya kwa Lesa ukushishiwa, nelyo ukumonwa ukuti lya mushilo. Ishina lya kwa Lesa nani?— Ni Yehova, kabili tufwile ukutemwa ilyo shina.

Ica bubili, Yesu atusambilishe ukupepela Ubufumu bwa kwa Lesa ukwisa. Ubu Bufumu bwalicindama pantu bukaleta umutende pe sonde no kulilenga ukuba paradaise.

Ica butatu, Kasambilisha Mukalamba alandile ati tufwile ukupepela ukufwaya kwa kwa Lesa ukucitwa pe sonde nga fintu caba ku muulu. Nga twapepele fi, lyene tufwile ukucita ifyo Lesa afwaya.

Icakonkapo, Yesu atusambilishe ukupepela ifya kulya tukabila cila bushiku. Alandile no kuti tufwile ukulomba ubwelelo kuli Lesa lintu twalufyanya. Kabili tufwile ukulomba Lesa ukuti atubelele uluse. Lelo ilyo talacite fyo, tufwile ukwelela bambi abatulufyanya. Bushe ico calikwangukila ukucita?—

Ica kulekelesha, Yesu alandile ati tufwile ukupepa ukuti Yehova Lesa atucingilile ku mubifi, Satana Kaseebanya. E co ifi fyonse fintu ifisuma ifya kupepelapo kuli Lesa.

Tufwile ukucetekela ukuti Yehova alomfwa amapepo yesu. Ukulunda pa kumulomba ukutwafwa, tufwile ukulamutasha. Alatemwa nga tuli aba cishinka mu fyo tulelanda mwi pepo kabili nga twamulomba ifintu ifili bwino. Kabili akatupeela ifi fintu. Bushe wasumine co?—