Ukucula Konse fye Kwalapwa Nomba Line!

Limbi mwalipushapo ukuti, ‘Cinshi ukucula kwafulile fi?’ Inkondo, ubupiina, utuyofi, ulukakaala, ulufyengo, ukulwala, ne mfwa fyalicusha abantunse pa myaka iingi. Mu myaka 100 iyapita abantu balicula sana. Bushe ukucula kwa musango yu kukabala akupwa?

Iciweme ca kutila kuli no kupwa, kabili nomba line fye! Icebo ca kwa Lesa, Baibolo, citila: “Umubifi takabepo . . . lelo abalanda bakapyaninine calo, no kuilemeno bwingi bwa mutende.” Bushe bakekalamo imyaka inga? “Abalungama bakapyaninine calo, no kwikalamo inshiku pe.”—Amalumbo 37:10, 11, 29.

Ilyo Lesa akafumyapo ububifi no kucula, isonde likaaluka, likaba paradaise. Lyena abantu bakekala ku ciyayaya mu mutende. Icebo ca kwa Lesa casobela ukutila: “[Lesa] akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo.”—Ukusokolola 21:4.

Muli ico calo cipya, abafwa nabo bene bakabwela ku kuipakisha ubumi bwa musango yu: “Kukaba ukubuushiwa kwa balungama na bashalungama.” (Imilimo 24:15) E cilya kanshi Yesu Kristu aebele ncitatubi uwamucetekele ukuti: “Uli no kuba na ine mu Paradaise.”—Luka 23:43.

Bushe Cinshi Ukucula Kwatendekele?

Apo Lesa alefwaya abantunse ukulaikala bwino sana, cinshi alekele ukucula kwatendeka? Cinshi alekela ukucula ukubako pa myaka ne myaka?

Adamu na Efa bali abapwililika ilyo Lesa Ababumbile. Ababikile mwi bala lya paradaise ilisuma nga nshi no kubapeela umulimo uo baleipakisha ukubomba. Baibolo itila: “Lesa amwene conse ico acitile, kabili, moneni, naciwamisha.” (Ukutendeka 1:31) Abomfwila Lesa, nga bafyele abana bapwililika, kabili isonde lyonse nga lyali paradaise na bantu nga bekala ku ciyayaya mu mutende ne nsansa.

Pa kubumba Adamu na Efa, Lesa abikile muli bena ica bupe cawamisha ica kuisalila. Tabali na kuba nga bamotoka abo bapindulula fye. Nomba pa kutwalilila ukuba aba nsansa balingile ukulasala bwino ifya kucita—ukumfwila amafunde ya kwa Lesa. Lesa atila: “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo.” (Esaya 48:17) Ukubomfya bubi bubi amaka ya kuisalila kwali no kuleta ubwafya, ne co, ni pa mulandu wa kuti abantunse tababumbilwe na mano ya kuitungulula ukwabula Lesa. Baibolo itila: “Te kwa muntunse ukwenda kwakwe; te kwa muntu uuleya ukushikimika amatampulo yakwe.”—Yeremia 10:23.

Nomba, ubwafya bwali bwa kuti abafyashi besu balemona kwati kuti baikala fye bwino nangu tabaletungululwa na Lesa. Lelo ilyo balekele ukumfwila ifyo Lesa alefwaya, alekele ukubatungilila kabili baishileba abashapwililika. E ico baile balabotelela mpaka bakota no kufwa. Nga filya abana bapalana na bafyashi babo ico e babaletele pano calo, e fyo na ifwe twapyene ukukanapwililika ne mfwa.—Abena Roma 5:12.

Ukwishiba Uwalingo Kuteka E Cikalamba

Cinshi Lesa ashaonawilile fye Adamu na Efa no kubumba abantu bambi? Pantu bumulopwe bwa kwa Lesa nelyo bukateka bwakwe bwalitwishikwe. Icipusho caimine ca kuti, Nani alingile ukuteka, kabili kuteka kwa kwa ani ukwalungama? Ici caleeta icipusho ca kuti, Bushe abantu kuti baikala fye bwino ukwabula ukutekwa na Lesa? Lesa alibapeele inshita iikalamba iya kweshaesha ukuiteka abene pa kuti cishibikwe bwino bwino nga kuti baikala fye bwino ilyo baleiteka nelyo ilyo Lesa alebateka. Inshita bali no kupeelwa yalingile ukukula pa kuti abantunse beshe imisango yonse iya mitekele, imikalile, iya kusangilamo ubunonshi, e lyo ne mipepele ukwabula ukutungululwa na Lesa.

Finshi fyafumamo? Imyaka iingi iyo abantu baikala pano calo yaisulamo ukucula. Mu myaka 100 iyapita, mwaba ukucula kwa kapela makufi. Iminshipendwa balipaiwe mu Nkondo ya Calo iya Bubili. Abantu ukucila 100 milioni balipaiwa mu nkondo ishingi. Bumpulamafunde no lukaakala fyaba fye mpanga yonse. Ukwangasha imiti ikola kuli fye mpanga yonse. Amalwele yafuma mu bupulumushi yacili yalefulilako. Iminshipendwa balafwa cila mwaka ku nsala na ku malwele. Indupwa shileonaika e lyo ne mibele isuma ileya ilepwa isonde fye lyonse. Takwaba ubuteko bwa bantu ubwingapwisha aya mafya. Takwaba nangu bumo ubuteko ubwapwisha ukukota, ukulwala, ne mfwa.

Ifilecitikila abantu ni filya fine Baibolo yasobele ukuti e fikalacitika mu nshiku shesu. Icebo ca kwa Lesa citila shino nshiku tulimo ni “nshiku sha kulekelesha” isha buno bwikashi ilyo ifintu fili ‘ifyayafya.’ Kabili nga filya fine Baibolo yasobele, “ababifi kabili abafutika balebipilako fye.”—2 Timote 3:1-5, 13.

Ukucula Kuli Mupepi no Kupwa

Nge fyo tumwene ukuiteka ukwaletela abantunse ubucushi kuli no kupwa. Ifyacitika filangilila ukuti ukuteka kwa bantunse te kuti kuwamye imikalile kano nga baletungululwa na Lesa. Kuteka kwa kwa Lesa epela e kwingaleta umutende, insansa, ubumi busuma, no bumi bwa muyayaya. E ico ububifi no kucula ifyo Yehova asuminisha fili no kupwa nomba line. Mu kwangufyanya fye Lesa akapwisha amafya ya bantunse ilyo akonaula imitekele yonse iyabipa.

Ukusesema kwaba mu Baibolo kwatila: “Mu nshiku sha shamfumu ishi [abantunse abaleteka pali nomba] Lesa wa mu muulu akemyo bufumu [mu muulu] ubushakonaulwe umuyayaya, . . . bukashonaula no kupesha aya mabufumu yonse [ayalipo ino nshita], kabili bukeminina umuyayaya.” (Daniele 2:44) Icikalamba ico Baibolo isambilisha ca kuti Yehova e walinga ukuteka ukupitila mu Bufumu bwakwe ubwa ku muulu. Pa kusobela icikalamba icali no kucitika mu “nshiku sha kulekelesha,” Yesu atile: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.”—Mateo 24:14.

Ilyo impela ikesa, ni bani bakapusuka? Baibolo itila: “Abatambalala bakekala mu calo, na ba mpomfu bakashalamo; Lelo ababifi bakaputulwa mu calo, na bafutika bakafumpulwamo.” (Amapinda 2:21, 22) Abatambalala bantu abaishiba kabili abacita ukufwaya kwa kwa Yehova. Yesu Kristu atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” (Yohane 17:3) E ico kanshi “icalo cileya . . . , lelo uucita ukufwaya kwa kwa Lesa ekalilila umuyayaya.”—1 Yohane 2:17.

Amalembo ayali muli uno trakiti yafumine mu Amalembo ya Calo Cipya aya ciGriki aya Bwina Kristu na muli Baibolo wa Cibemba uwa mu 1956, kano fye apali icishibilo cimbi ninshi yafumine muli Baibolo imbi.