Ukulongana mu kupepa Lesa

1. Ilyo abasambi balongene pamo, kwafwa nshi uko babapeele, kabili mulandu nshi uku kwafwa kwalefwaikilwa?

ILYO Yesu abuukile, tapakokwele na basambi balilongene pa kuti bakoshanye. Lelo bali-ikomene mu kati ka cikuulwa pantu baletiina abalwani babo. Bafwile balilekele ukutiina ilyo Yesu aingile umo baali no kubeba ati: “Pokeleleni umupashi wa mushilo”! (Belengeni Yohane 20:19-22.) Pa numa, abasambi balilongene pamo na kabili, lyena Yehova abapongolwelele umupashi wa mushilo. Ala umupashi wa mushilo walibakoseshe pa kuti bakabombe bwino umulimo uo bapeelwe!—Imil. 2:1-7.

2. (a) Bushe Yehova atukosha shani, kabili mulandu nshi tukabila uku kukoshiwa? (b) Mulandu nshi cacindamina ukulakwata Amapepo ya Lupwa? (Moneni futunoti na kabokoshi akaleti “Amapepo ya Lupwa,” pe buula 175.)

² Na ifwe bene tulakwata amafya nga yakweteko bamunyinefwe aba mu nshita ya batumwa (1 Pet. 5:9) Inshita shimo nalimo bamo tulatiina abantu. Kabili pa kuti tushipikishe no kutwalilila ukushimikila kano Yehova atukosha. (Efes. 6:10) Yehova alatukosha sana ukupitila mu kulongana. Pali ino nshita tulasangwa ku kulongana kubili ukubako cila mulungu, ukulongana kwa Ilyashi lya ku Cintubwingi, Isambililo lya Ulupungu lwa kwa Kalinda e lyo kulaba no kulongana kwa mukati ka mulungu uko twita ati ukulongana kwa Imikalile ya Bwina Kristu no Mulimo Tubomba.a Na kabili tulasangwa na ku kulongana kune ukubako pa mwaka, ukulongana kwa citungu, ukwa muputule kubili, no kwa Cibukisho ca mfwa ya kwa Kristu. Mulandu nshi cacindamina ukulasangwa kuli uku kulongana konse? Bushe ukulongana uko tukwata muno nshiku kwatendeke shani? Kabili bushe ifyo tumona ukulongana filanga shani ifyo twaba?

Mulandu Nshi Tulonganina Pamo?

3, 4. Bushe Yehova afwaya ukuti abantu bakwe balecita finshi? Landeni ifya kumwenako.

³ Ukutula fye na kale Yehova afwaya abantu bakwe balelongana pamo ku kumupepa. Ku ca kumwenako, mu 1513 B.C.E., Yehova apeele uluko lwa bena Israele Amafunde, kabili mu Mafunde atile balingile ukulalongana cila mulungu pa kuti aba mu lupwa bonse balemupepa no kusambilila Amafunde. (Amala. 5:12; 6:4-9) Abena Israele nga bakonka ili Ifunde, lyonse indupwa shalekoshiwa no luko lonse lwaletwalilila ukuba ulwa busaka kabili ulwakosa mu fya kwa Lesa. Nga ca kuti uluko lwakaana ukukonka ili Ifunde, lwaleka no kucita ifyo Yehova Lesa alebeba pamo nga ukulongana lyonse ku kupepa ifintu tafyalebendela bwino.—Lebi 10:11; 26:31-35; 2 Imila. 36:20, 21.

⁴ Natulande na pa fyo Yesu alecita. Alitemenwe ukulaya kwi sunagoge cila mulungu pe Sabata. (Luka 4:16) Ilyo Yesu afwile no kubuushiwa, abasambi bakwe balitwalilile ukulalongana pamo lyonse nangu ca kuti tabalingile ukulakonka Ifunde lye Sabata. (Imil. 1:6, 12-14; 2:1-4; Rom. 14:5; Kol. 2:13, 14) Pali uku kulongana, Abena Kristu tabalebasambilisha fye no kubakoselesha, lelo baletuula na malambo ya kulumbanya Lesa mu mapepo, mu kwasukapo, na mu nyimbo.—Kol. 3:16; Heb. 13:15.

5. Mulandu nshi tulonganina cila mulungu no kusangwa ku kulongana kukalamba konse ukubako umuku umo pa mwaka? (Moneni akabokoshi akaleti “Ukulongana Ukubako cila pa Mwaka Ukwikatanya Abantu ba kwa Lesa,” pe bula 176.)

⁵ Nga ca kuti na ifwe tulelongana cila mulungu, tulesangwa na ku kulongana kukalamba konse ukubako umuku umo pa mwaka, tukalakoselesha na bambi ku citetekelo cesu, tukalakoshiwa ku mupashi wa mushilo kabili tukalalanga no kuti tulatungilila Ubufumu bwa kwa Lesa. Ne cacilapo ukucindama ca kuti tulakwata ishuko lya kupepa kuli Yehova, ukwasukapo no kumulumbanya mu nyimbo. Ifyo tulongana pali lelo kuti fyapusanako ne fyo abena Israele na Bena Kristu ba mu nshiku sha batumwa balelongana, lelo ukulongana tukwata muno nshiku nako kwine kwalicindama. Bushe ukulongana uko tukwata muno nshiku kwatendeke shani?

Ukulongana kwa Cila Mulungu Ukutucincisha ku “Kutemwa Kabili ku Kubomba Imilimo Iisuma”

6, 7. (a) Mulandu nshi tulonganina? (b) Bushe ukulongana kwalepusanapusana shani?

⁶ Ilyo munyinefwe Charles Taze Russell atampile ukusambilila icine mu Cebo ca kwa Lesa, alilwike ukuti calicindama ukulalongana pamo na bantu bambi abatemenwe ukusambilila icine. Mu 1879, ba Russell balembele abati: “Ine na banandi mu Pittsburgh twaliteyenye ibumba lya kusambilila amalembo ilyalelongana cila mulungu pa Mulungu kabili ifi fine e fyo twalecita lyonse.” Abalebelenga magazini ya Zion’s Watch Tower balibakoseleshe ukulalongana lyonse kabili mu 1881 mu Pittsburgh ku Pennsylvania balitampile ukulalongana lyonse pa Mulungu na pali Citatu. Ulupungu lwa kwa Kalinda ulwa mu ciNgeleshi ulwa November 1895 lwalandile pa mifwaile ya uku kulongana ukuti yali ni nshita ya “kukoseleshanya kwa Bwina Kristu, ukulalongana pamo no kulanga ukutemwana.”—Belengeni AbaHebere 10:24, 25.

⁷ Pa myaka iingi, ifyo ibumba limo ilya Basambi ba Baibolo lyalelongana ne miku lyalelongana tafyaleba cimo cine na mabumba yambi. Ku ca kumwenako, kalata iyafumine kwi bumba lya Basambi ba Baibolo ku United States iyo basabankenye mu 1911 yatile: “Tulalongana imiku isano cila mulungu.” Balelongana pali Cimo, pali Citatu, pali Cisano e lyo pa Mulungu balelongana imiku ibili. Kalata na imbi iyafumine ku Africa iyo basabankenye mu 1914 yatile: “Tulalongana imiku ibili mu mweshi, tutendeka ukulongana pali Cisano ukufika pa Mulungu.” Lelo mu kuya kwa nshita batampile ukulongana nga filya fine tulongana muno nshiku. Moneni ifyo cila kulongana kwaleba.

8. Bushe amalyashi ya ku cintubwingi yamo aya kale, yalelanda pali finshi?

⁸ Ilyashi lya ku Cintubwingi. Mu 1880 ilyo munyinefwe Russell atampile ukusabankanya magazini ya Zion’s Watch Tower, akonkele ifyo Yesu alecita kabili atendeke ukuya mu kushimikila. (Luka 4:43) Ifi fine e fyo munyinefwe Russell atendeke Ukulongana kwa Cintubwingi. Ulupungu lwa kwa Kalinda lwalandile ukuti pali lulya lwendo, ba Russell “baali no kulalanda ilyashi ku cintubwingi ilyakwete umutwe uwaleti, ‘Things pertaining to the kingdom of God’” (Ifintu Ifyakuma Ubufumu bwa kwa Lesa). Mu 1911, mu fyalo ifingi umo bapangile ifilonganino, balibakoseleshe ukuti baletuma bakalanda abafikapo ukutandalila incende uko baali no kulanda amalyashi ayapusanapusana 6 ayalelanda pa fintu pamo nga ubupingushi ne cilubula. Pa numa ya lyashi limo na limo, balebilisha kalanda uukalanda ilyashi umulungu ukonkelepo no mutwe wa lyashi ilyo akalanda.

9. Bushe Ukulongana kwa ku Cintubwingi kwayaluka shani pa myaka iingi, kabili kuti mwacita shani pa kutungilila uku kulongana?

⁹ Mu 1945, Ulupungu lwa kwa Kalinda lwalandile pa kutendeka kwa kampeni ya Kulongana kwa Malyashi ya ku Cintubwingi. Muli iyi kampeni balelanda amalyashi 8 ayalelanda pa ‘mafya ayaliko pali ilya nshita ayalingile ukubombelwapo bwangu.’ Pa myaka iingi abalelanda aya malyashi tabalelanda fye amalyashi ayo umusha wa cishinka alepekanya, lelo balelanda na malyashi ayo abene balepekanya. Lelo mu 1981, bonse abalelanda amalyashi babebele ukulabomfya ama-autulaini ayo baletumina ifilonganino.b Mu ma-autulaini yamo aya malyashi ya ku cintubwingi kalanda alingile ukulaipusha abali mwi bumba ukulandapo nelyo ukucita ifilangililo, lelo ukutendekela mu 1990 kwali ukwaluka ukwa kuti nomba kalanda akulalanda fye ukwabula ibumba ukulandapo nelyo ukucita ifilangililo. Ukwaluka na kumbi kwaliko mu January mu 2008 ilyo bacefesheko inshita ya malyashi ya ku cintubwingi ukufuma pa mamineti 45 ukufika pa mamineti 30. Nangu ca kuti ifyo balelanda aya malyashi fyalyaluka-aluka, aya malyashi ayapekanishiwa bwino yalitwalilila ukutwafwa ukukosha icitetekelo mu Cebo ca kwa Lesa kabili yalatusambilisha ifintu ifingi pa Bufumu bwa kwa Lesa. (1 Tim. 4:13, 16) Bushe muletako abo muyako ku fipempu fya kubwelelamo na bambi abashili ba Nte kuli aya malyashi ayacindama ayalanda pa fya mu Baibolo?

10-12. (a) Bushe Isambililo lya Ulupungu lwa kwa Kalinda lyayaluka shani? (b) Mepusho nshi mulingile ukwipusha?

¹⁰ Isambililo lya Ulupungu lwa kwa Kalinda. Mu 1922 bamunyinefwe abo baleita abati pilgrims (abeminishi) abo Watch Tower Society yaletuma ku kulanda amalyashi ku filonganino no kutungulula umulimo wa kushimikila, batile kuti cawama ukulakwata isambililo lya Ulupungu lwa kwa Kalinda lyonse pa kulongana. Ifi fine e fyo caishileba. Pa kubalilapo, isambililo lya Ulupungu lwa kwa Kalinda lyalebako mu kati ka mulungu nelyo pa Mulungu.

¹¹ Ulupungu lwa kwa Kalinda ulwa mu ciNgeleshi ulwa June 15, 1932 lwalilandile na pali fimbi ifyo balingile ukulacita pa kusambilila pe sambililo lya Ulupungu lwa kwa Kalinda. Pali ili sambililo baali no kulacita ifyo aba mu lupwa lwa pa Bethel balecita kabili lwatile munyinefwe e ulingile ukutungulula isambililo. Kwaleba bamunyinefwe batatu abaleikala ku cisebele e lyo nomba balepokanina ukubelenga amaparagrafu. Pali ilya nshita ifipande tafyalekwata amepusho ayapulintwa, kanshi uuletungulula alingile ukweba abali mwi bumba ukwipusha amepusho pe sambililo ilyo line balesambililapo. Lyena ale-eba abali mwi bumba ukwasuka ayo mepusho. Nga ca kuti kuli icishinka cimo ico bashumfwikishe, lyena uwaletungulula alelondolola ifishinka mu kwipifya kabili mu kulungatika.

¹² Pa kutampa, balipeele ifilonganino fyonse insambu sha kuisalila magazini iyo abengi mu cilonganino balefwaya ukusambililamo. Lelo Ulupungu lwa kwa Kalinda ulwa mu ciNgeleshi ulwa April 15, 1933 lwatile ifilonganino fyonse fifwile ukulasambilila mu Ulupungu lwa kwa Kalinda ulupya. Mu 1937, ifilonganino fyonse bafyebele ukulakwata ili sambililo pa Mulungu. Na kabili kwali ukwaluka pa fya kucita pa kusambilila Ulupungu lwa kwa Kalinda ifyo tucita na pali lelo ifyo basabankenye mu Ulupungu lwa kwa Kalinda ulwa mu ciNgeleshi ulwa October 1, 1942. Ica kubalilapo, magazini yatile amepusho yakulaba pe samba lye buula lya cila cipande kabili e mepusho bafwile ukubomfya pa kusambilila. Magazini yalandile no kuti, isambililo lifwile ukusenda iawala limo. Kabili yakoseleshe abaleasukapo ukula-asuka mu mashiwi yabo, te kubelenga fye ifyasuko ifili mu maparagrafu. Ukulongana kwa Isambililo lya Ulupungu lwa kwa Kalinda kwalitwalilila ukuba e nshila ikalamba iyo Umusha wa cishinka abomfya ku kupeelelamo ifya kulya fya ku mupashi pa nshita iyalinga. (Mat. 24:45) Kanshi kuti cawama bonse twayipusha ukuti: ‘Bushe ndapekanya isambililo lya Ulupungu lwa kwa Kalinda cila mulungu? Bushe ndesha na maka ukwasukapo?’

13, 14. Bushe Isambililo lya Baibolo ilya pa Cilonganino lyatendeke shani kale, kabili finshi mucita pa kuti mulenonkelamo?

¹³ Isambililo lya Baibolo Ilya pa Cilonganino. Pa kati ka ba 1890, ilyo bafumishe icitabo ca Millennial Dawn, munyinefwe H. N. Rahn, uwali Umusambi wa Baibolo mu musumba wa Baltimore, mu Maryland ku America, alandile ukuti kubeko amabumba ya kusambilila ici citabo. Pa kutampa aya mabumba yalelonganina mu mayanda pa kuti bamone nga kuti fyabomba. Mu September 1895 ukulongana kwa muli aya mabumba kwalibombele bwino sana mu misumba iingi mu America. Ulupungu lwa kwa Kalinda ulwafumine muli ulya wine mweshi lwatile bonse abasambilila icine bafwile balelongana. Lwalandile no kuti uuletungulula afwile ukuba umuntu uubelenga bwino. Alingile ukubelenga sentensi imo e lyo aleka abali mwi bumba balandapo. Nga apwisha ukubelenga amasentensi yonse mu paragrafu na bali mwi bumba nabo bapwisha ukulandapo, lyena katungulula alebelenga amalembo ayaloshiweko. Nga bapwisha icipandwa, cila muntu mwi bumba alelandapo panono pa fyo basambilile.

¹⁴ Uku kulongana kwalyaluka imiku iingi mu fyo bakwita. Balekwita abati, Berean Circles for Bible Study, ukupashanya ku bena Berea aba mu nshita ya batumwa abalefwailisha mu Malembo. (Imil. 17:10-12) Mu kupita kwa nshita, batampile ukwita uku kulongana abati Isambililo lya Citabo Ilya pa Cilonganino. Pali ino nshita bakwita ukuti Isambililo lya Baibolo Ilya pa Cilonganino kabili bonse mu cilonganino balonganina pa Ng’anda ya Bufumu te mu mayanda. Pa myaka iingi, ifitabo fyalekanalekana, amabroshuwa ne fipande fya mu Ulupungu lwa kwa Kalinda fyalibomfiwa pali ili lisambililo. Ukutula fye na mu kutendeka, bonse abalesangwako balebakoselesha ukula-asukapo. Uku kulongana kwalitwafwa ukumfwikisha Baibolo. Bushe lyonse mulapekanya uku kulongana no kwasukapo bwino?

15. Bushe Isukulu lya Butumikishi Ilya Bulesa lyaletwafwa shani?

¹⁵ Isukulu lya Butumikishi Ilya Bulesa. Ba Carey Barber ababombele na pa Bethel ya ku Brooklyn ku New York baibukishe ifyacitike, batile: “Icungulo bushiku cimo pali Cimo, pa 16 February 1942, bamunyinefwe bonse aba mu lupwa lwa pa Bethel ya ku Brooklyn ku New York babebele ukulembesha mwi sukulu ilyali no kulaitwa ukuti Isukulu lya Butumikishi Ilya Bulesa.” Munyinefwe Barber uwaishileba mwi Bumba Litungulula alondolwele ili sukulu ati, “Cintu icaibela icilelanga ifyo Yehova asakamana ababomfi bakwe muno nshiku.” Ili sukulu lyalyafwile bamunyinefwe ukwishiba bwino ifya kusambilisha no kushimikila ica kuti mu kutendeka kwa mwaka wa 1943 kwali akatabo akaleti Course in Theocratic Ministry (Amasambililo aya Kwafwa mu Mulimo wa Kushimikila) ako batumine mu filonganino fyonse. Ulupungu lwa kwa Kalinda ulwa mu ciNgeleshi ulwa June 1, 1943 lwatile ico Isukulu lya Butumikishi Ilya Bulesa lyabelako, kwafwa abantu ba kwa Lesa “ukuisambilisha pa kuti baleshimikila bwino pa Bufumu.”—2 Tim. 2:15.

16, 17. Bushe Isukulu lya Butumikishi Ilya Bulesa lyaletusambilisha fye ifya kulanda bwino? Londololeni.

¹⁶ Pa kubala, abengi baleumfwa umwenso wa kulanda ku cintubwingi. Ba Clayton Woodworth, Jr., abo bashibo bali pamo na munyinefwe Rutherford na bambi abo babikile mu cifungo mu 1918, baibukishe ifyo baumfwile ilyo balembeshe muli ili sukulu mu 1943. Batile: “Ala calenkosela ukulanda amalyashi, naleumfwa kwati ululimi nalulepa, mu kanwa mwaleuma sana kabili ishiwi lyaleba ilyakauka.” Ilyo ba Clayton baishibileko ukusambilisha, balebapeela amalyashi ayengi aya ku cintubwingi. Mwi sukulu tabasambililemo fye ukulanda bwino amalyashi, lelo balisambilile ne fintu ifingi. Balisambilile umulandu cacindamina ukuba abaicefya no kushintilila pali Yehova. Balandile ukuti, “Nailwike ukuti, kanshi kalanda we lyashi te wacindama, lelo icacindama ni fintu apekenye ilyashi. Nga ca kuti napekanya bwino, nashintilila na pali Yehova, ninshi akalanda ilyashi ilya kuti abakakutika bakalitemwa no kusambililako fimo.”

¹⁷ Mu 1959 bankashi nabo balibebele ukulembesha muli ili sukulu. Nkashi Edna Bauer ebukisha uku kubilisha pa kulongana kwa muputule uko asangilweko. Atile: “Ndebukisha ifyo bankashi batemenwe sana. Ili lyali lishuko na limbi kuli bankashi.” Pa myaka iingi, bamunyinefwe na bankashi balikwete ishuko lya kulembesha mwi Sukulu lya Butumikishi Ilya Bulesa pa kuti Yehova alebasambilisha. Muno nshiku Yehova alitwalilila ukutusambilisha pa kulongana uko tukwata mukati ka mulungu.—Belengeni Esaya 54:13.

18, 19. (a) Bushe muno nshiku tusambilila shani ifitwafwa ukulabila bwino imbila nsuma? (b) Mulandu nshi twimbila inyimbo pa kulongana? (Moneni akabokoshi akaleti “Ukwimba Inyimbo sha Bufumu.”)

¹⁸ Ukulongana kwa Mulimo. Ku kutampa kwa 1919, kwaleba ukukumana kwa kuya mwi bala. Lelo te bonse mu cilonganino abalesangwa kuli uku kukumana kano fye abalebombako umulimo wa kushalika impapulo. Mu 1923, pa myeshi iingi Ukulongana kwa Mulimo kwalebako fye umuku umo mu mweshi kabili bonse mu cilonganino balesangwako. Mu 1928 aba mu filonganino fyonse balibebele ukulalongana Ukulongana kwa Mulimo cila mulungu, kabili mu 1935 Ulupungu lwa kwa Kalinda ulwa mu ciNgeleshi lwakoseleshe ifilonganino ukulabomfya ifyebo ifyaleba mu lupapulo ulo baleita ukuti Director, pa numa balelwita ati Informant, e lyo pa numa na kabili twatendeke ukulwita ukuti, Ubutumikishi Bwesu Ubwa Bufumu. Uku kulongana nomba kwalebako mu filonganino fyonse.

¹⁹ Muno nshiku ukulongana kwa mukati ka mulungu kulatwafwa ukulashimikila abantu bwino nga filya fine Kristu asambilishe. (Mat. 10:5-13) Nga ca kuti mulapokako akatabo ka kubomfya pa kulongana, bushe mulakabelenga no kukonka imitubululo iilimo ilyo muleshimikila?

Ukulongana Ukwacindama Ukubako pa Mwaka

20-22. (a) Mulandu nshi twibukishisha imfwa ya kwa Yesu? (b) Munonkelamo shani mu kusangwa ku Cibukisho cila mwaka?

²⁰ Yesu aebele abasambi bakwe ukulaibukisha imfwa yakwe mpaka akabwele. Filya fine balesefya Ica Kucilila, Icibukisho ca imfwa ya kwa Kristu naco cibako fye umuku umo pa mwaka. (1 Kor. 11:23-26) Abantu abengi sana balasangwako kuli uku kulongana cila mwaka. Uku kulongana kwibukisha abasubwa ishuko bakwata ilya kuteka pamo na Kristu mu Bufumu. (Rom. 8:17) Ku mpaanga shimbi, uku kulongana kulalenga baba no mucinshi sana no kuba aba cishinka ku Mfumu ya Bufumu bwa kwa Lesa.—Yoh. 10:16.

²¹ Munyinefwe Russell na banankwe balishibe ifyo ukwibukisha Umulaalilo wa kwa Shikulu kwacindama no kuti balingile ukulaibukisha umuku fye umo pa mwaka. Ulupungu lwa kwa Kalinda ulwa mu ciNgeleshi ulwa April mu 1880 lwatile: “Pa myaka iingi fwe bengi muno mu Pittsburgh . . . tulebukisha Ica Kucilila [Icibukisho] kabili tulalya no kunwa ifimpashanya fya mubili no mulopa wa kwa Shikulu.” Batampile ukukwata ukulongana kukalamba pamo ne Cibukisho, pa nshita imo ine. Umuku wa kubalilapo ilyo bakwete uku kulongana ni mu 1889, ilyo abantu 225 balongene kabili abantu 22 balibatishiwe.

²² Pali lelo tatukwata Icibukisho pamo no kulongana kukalamba, lelo tuleta abantu bonse ababa uko twikalila ukwisalongana pamo na ifwe, pa Ng’anda ya Bufumu nelyo pa cikuulwa ca kusonkela. Mu 2013 abantu ukucila 19 milioni e basangilwe ku Cibukisho ca mfwa ya kwa Yesu. Ala twalikwata ishuko ilya kwita bambi ukwisalongana na ifwe pa Cibukisho! Bushe mulabombesha ukwita abantu abengi ku Cibukisho cila mwaka?

Ifyo Tucita E Filanga Ifyo Twaba

23. Bushe mumona shani ukulongana?

²³ Ababomfi ba cishinka aba kwa Yehova tabamona ukulongana ukuti cisendo. (Heb. 10:24, 25; 1 Yoh. 5:3) Ku ca kumwenako, Imfumu Davidi yalitemenwe ukuya ku ng’anda ya kwa Yehova ku kupepa. (Amalu. 27:4) Davidi aleumfwa bwino sana ukupepela pamo na bambi abatemenwe Lesa. (Amalu. 35:18) Kabili tontonkanyeni na pa fyo Yesu atemenwe ukucita. Na lintu aali fye umwaice, alitemenwe sana ukuba mu ng’anda ya kwa Wishi iya kupepelamo.—Luka 2:41-49.

24. Mashuko nshi tukwata nga tuli pa kulongana?

²⁴ Nga tulelongana tulanga ukuti twalitemwa Yehova no kuti tulafwaya ukukoselesha abasumina banensu. Na kabili tulanga ukuti tulafwaisha ukwishiba ifya kuba abekashi ba Bufumu bwa kwa Lesa, pantu ni pa kulongana kwa pa cilonganino, ukwa muputule no kwa citungu apo tusambilila ifya kuba abekashi basuma aba Bufumu. Ni pa kulongana pene epo tusambilila ifitwafwa ukushipikisha mu mulimo uwacindama sana uwa Bufumu bwa kwa Lesa, e kutila uwa kulenga abantu ukuba abasambi ba Mfumu Yesu Kristu no kubasambilisha. (Belengeni Mateo 28:19, 20.) Ukwabula no kutwishika, ifyo twatemwa ukulongana, e filanga ukuti tumona Ubufumu bwa kwa Lesa ukutila bwa cine cine. Kanshi natulemona ukulongana ukuti kwalicindama sana!