Ukulongana Ukulenga ‘Tulecincishanya ku Kutemwa na ku Kubomba Imilimo Iisuma’

UKUFUMA fye na kale, abantu ba kwa Yehova balalongana capamo. Cila mwaka abena Israele bonse abaume baleya ku Yerusalemu ku kusefya imitebeto iikalamba itatu. (Amala. 16:16) Mu nshiku sha batumwa, Abena Kristu balelongana capamo, kabili ilingi line balelonganina mu mayanda ya ba bwananyina. (File. 1, 2) Muno nshiku, tulanonkelamo mu kulongana kwa pa cilonganino, ukwa muputule no kwa citungu. Cinshi ico ababomfi ba kwa Lesa balonganina capamo? Ico balonganina maka maka ni ku kupepa Lesa.—Amalu. 95:6; Kol. 3:16.

² Abasangwa kuli uku ukulongana balanonkelamo sana. Ilyo Lesa aebele abena Israele ukulasefya Umutebeto wa Nsakwe uwalenga 7, abebele ati: “Longanyeni abantu, abaume na banakashi na banono na balebeshi benu abali mu mpongolo shenu, pa kutila bakutike kabili basambilile, pantu bafwile ukulatiina Yehova Lesa wenu no kubika amano ku kukonka fyonse ifyalembwa muli ili funde.” (Amala. 31:12) Kanshi ico tulonganina pamo ‘kusambilishiwa na Yehova.’ (Esa. 54:13) Na kabili, ukulongana kulenga tuleishibana na ba bwananyina no kulakoseleshanya.

UKULONGANA KWA PA CILONGANINO

³ Pa numa ya Pentekoste mu mwaka wa 33, lyonse ilyo abasambi balelongana capamo balebika amano ku fyalesambilisha abatumwa, kabili “ubushiku no bushiku balesangwa lyonse pe tempele no mutima umo.” (Imil. 2:42, 46) Mu kupita kwa nshita, ilyo Abena Kristu balelongana capamo mu kupepa Lesa, balebelenga amalembo ya mushilo, na makalata ayo abatumwa na Bena Kristu bambi balelemba. (1 Kor. 1:1, 2; Kol. 4:16; 1 Tes. 1:1; Yako. 1:1) Kabili balepepela na capamo. (Imil. 4:24-29; 20:36) Limo limo balelanda na pa fyalecitika mu mulimo wa bumishonari. (Imil. 11:5-18; 14:27, 28) Balesambilila pa fyalembelwe mu Malembo ifyo balingile ukulakonka e lyo na pa masesemo ayalefikilishiwa. Balesambilila pa mibele iyo Abena Kristu bafwile ukukwata na pa fyo balingile ukucita pa kuti babe bakapepa bene bene. Kabili bonse balebakoselesha ukuba abacincila mu mulimo wa kubila imbila nsuma.—Rom. 10:9, 10; 1 Kor. 11:23-26; 15:58; Efes. 5:1-33.

⁴ Na muno nshiku mwine, ukulongana kwa Bena Kristu kuba fye nga filya fine kwaleba mu nshiku sha batumwa. Tukonka ifyo Baibolo yatweba pa AbaHebere 10:24, 25 apatila: “Kabili tutontonkanye pa banensu . . . , twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.” Pa kuti tutwalilile ukuba abakosa mu kupepa no kuba aba cishinka kuli Lesa muli shino nshiku shakulekelesha kabili isha-afya, tufwile ukulalongana lyonse. (Rom. 1:11, 12) Fwe Bena Kristu twikala mu nkulo iyabipa kabili iishumfwa, e kutila inkulo iyapondama. Lelo tatucitako ifyabipa kabili tatukonkelela ulunkumbwa lwa mu calo. (Fil. 2:15, 16; Tito 2:12-14) Bushe kwaliba uko twingaya ukucila pa kuba pamo na bantu ba kwa Yehova? (Amalu. 84:10) Kabili bushe kwaliba icingatwafwa ukucila pa kusambilila no kulanshanya Icebo ca kwa Lesa? Natulande pa kulongana kwalekanalekana uko batupekanishisha ukuti kuletwafwa.

UKULONGANA KWA PA MPELA YA MULUNGU

⁵ Icibalilapo pa kulongana kwa pa mpela ya mulungu lyashi lya Baibolo ilyo bapekanishisha maka maka icintubwingi, kabili bamo abesa uba e muku wa kubalilapo ukusangwa kuli uku kulongana. Ili lyashi lya ku cintubwingi lyalicindama sana pantu lilalenga bakasabankanya ba mu cilonganino e lyo na bapya baishiba ifingi pali Lesa.—Imil. 18:4; 19:9, 10.

⁶ Kristu Yesu na batumwa bakwe, e lyo na bo balebomba nabo, e baletungulula ukulongana kwa cintubwingi ukwapalana no kubako mu filonganino fya bantu ba kwa Yehova muno nshiku. Ukwabula no kutwishika, Yesu e waishibishe ukulanda ku cintubwingi pa bantu bonse pano calo. Abantu balelanda pali Yesu abati: “Takwatala akuba nangu umo uulanda ngo yu muntu.” (Yoh. 7:46) Yesu alelanda na maka ayafuma kuli Lesa, e calengele ukuti abantu balepapa imisambilishishe yakwe. (Mat. 7:28, 29) Abalecita ifyo alesambilisha balenonkelamo nga nshi. (Mat. 13:16, 17) Abatumwa bakwe balemupashanya. Pa Imilimo 2:14-36 paba ilyashi ililanga ukuti Petro alilandile ilyashi ilisuma kabili ilya maka pa Pentekoste mu mwaka wa 33, ica kuti abantu abengi balibatishiwe. Ilyo umutumwa Paulo na o alandile ilyashi mu Atena, abantu bamo balitetekele.—Imil. 17:22-34.

⁷ Na muno nshiku mwine, abantu abengi balanonkelamo nga nshi mu malyashi ya ku cintubwingi ayabako pa kulongana kwa pa cilonganino na pa kulongana kwa muputule no kwa citungu. Aya malyashi yalalenga twaishiba bwino amasambililo ya Bena Kristu, kabili yalatwafwa ukutwalilila ukubomba umulimo wa kwa Lesa. Nga tuleita abantu abalekanalekana ku kulongana, kuti twabafwa ukwishiba amasambililo ya kutendekelako aya mu Baibolo.

⁸ Amalyashi ya ku cintubwingi yalalanda pa fintu ifyalekanalekana. Kulaba amalyashi ayalanda pa masambililo ya mu Baibolo, pa busesemo, pa mashinte ya mafunde ya mu Baibolo, e lyo na yalanda pa kufunda indupwa, pa fyupo, pa mafya yakwata abacaice, e lyo na pa mibele iyo Abena Kristu balingile ukukwata. Amalyashi yamo yalanda pa fintu fya kupapusha ifyo Yehova abumba. Yambi nayo yalanda pa bantu abalembwa mu Baibolo abali ne citetekelo, abali abashipa, e lyo na bali aba cishinka, kabili tulasambilila ne fyo twingabapashanya.

⁹ Nga tulefwaya ukuti tulenonkelamo sana mu malyashi ya ku cintubwingi, tufwile ukulakutikisha no kulabelenga amalembo ayo uulelanda ilyashi atweba ukubelenga, e lyo no kulakonkamo ilyo alebelenga no kulondolola. (Luka 8:18) Nga tulebika amano ku fyo tulesambilila, tukafiikatisha kabili tukalafikonka.—1 Tes. 5:21.

¹⁰ Nga ca kuti pa cilonganino paliba abakulanda amalyashi ya ku cintubwingi abengi, ninshi cila mulungu kuti kuleba ilyashi lya ku cintubwingi. Limo aba kulanda amalyashi kuti balefuma na mu filonganino fimbi ifyabela mupepi. Nga ca kuti abakulanda amalyashi balicepa sana, nalimo te kuti kuleba amalyashi cila mulungu, lelo bafwile ukulaesha na maka ukufwaya aba kulanda amalyashi.

¹¹ Ilyashi lya ku cintubwingi nga lyapwa pa kulongana kwa pa mpela ya mulungu, icikonkapo Lisambililo lya Ulupungu lwa kwa Kalinda. Mu Ulupungu lwa kwa Kalinda ulwa kusambililamo mulaba ifipande umuba amepusho ayo abali mwi bumba basuka. Yehova alatupekanishisha ifya kulya fya ku mupashi pa nshita yalinga ukupitila mu Ulupungu lwa kwa Kalinda.

¹² Ilingi line, ifipande ifiba mu Ulupungu lwa kwa Kalinda filanda pa fyo twingalakonka amashinte ya mafunde ya mu Baibolo. Ifi fipande filacingilila Abena Kristu ku “mupashi uwa ici calo,” na ku misango yabipa. (1 Kor. 2:12) Ifyo Ulupungu lwa kwa Kalinda lulandapo filatwafwa ukumfwikisha amasambililo ya mu Baibolo na masesemo, kabili filalenga abantu baishiba icine no kutwalilila ukulaenda mu nshila ya balungama. (Amalu. 97:11; Amapi. 4:18) Ukusangwa kwi Sambililo lya Ulupungu lwa kwa Kalinda no kula-asukapo kuti kwatwafwa ukusekelela mwi subilo ilya kwikala mu calo cipya ica kwa Yehova umukaba ubulungami. (Rom. 12:12; 2 Pet. 3:13) Ukuba pamo na ba bwananyina lyonse kulatwafwa ukuba ne fisabo fya mupashi, kabili kulalenga twaba abacincila sana ilyo tulebombela Yehova. (Gal. 5:22, 23) Kabili kulatukoselesha pa kuti tuleshipikisha amesho na pa kuti tulepanga “umufula uusuma uwa kukuulapo ku ntanshi” pa kuti ‘twikatishe ku mweo wine wine.’—1 Tim. 6:19; 1 Pet. 1:6, 7.

¹³ Kuti twacita shani pa kuti tulenonkelamo sana mu fyo tusambilila mu Ulupungu lwa kwa Kalinda? Tulingile ukulapekanishisha libela ifyo tukasambilila, e lyo nga twalikwata ulupwa, kuti tulepekanishisha capamo. Tufwile ukulabelenga na malembo, kabili ilyo tuli pa kulongana tufwile ukula-asukapo mu mashiwi yesu. Ici cikalenga icine cikalimbe imishila mu mitima yesu, kabili nga tuleasukapo aba mu cilonganino kuti balenonkelamo. Nga tulekutikisha ifyo abanensu baleasuka, kuti tulenonkelamo mu masambililo ya cila mulungu.

UKULONGANA KWA MU KATI KA MULUNGU

¹⁴ Aba mu cilonganino balakumana cila mulungu pa Ng’anda ya Bufumu ku kulongana kwa Imikalile ya Bwina Kristu no Mulimo Tubomba. Muli uku kulongana mwaba imbali shitatu ishitwafwa ukuba ababomfi ba kwa Lesa ‘abafikapo bwino bwino.’ (2 Kor. 3:5, 6) Programu ya uku kulongana ne fyebo fya kubomfya fiba mu katabo akafuma cila mweshi akatila, Imikalile ya Bwina Kristu no Mulimo Tubomba—Akatabo ka Kubomfya pa Kulongana. Mu Akatabo ka Mikalile no Mulimo Tubomba, mulaba ne fyebo fya kubomfya pa kubila imbila nsuma.

¹⁵ Ulubali lwa kubalilapo muli uku kulongana ulutila, Icuma Icaba mu Cebo ca kwa Lesa, lulatwafwa ukwishiba bwino ifyacitike ilyo balelemba amalyashi ya mu Baibolo, ifyo ayo malyashi yalandapo e lyo ne fyo twingasambililako. Muli ulu lubali mulaba ilyashi, ukubelenga, e lyo no kulanshanya ifipande fya mu Baibolo ifyo tulebelenga muli uyo mulungu. Mu Akatabo ka Mikalile no Mulimo Tubomba mulaba ifikope e lyo na pa kulemba, ifitwafwa ukusambilila pa malyashi ya mu Baibolo. Ukusambilila amalyashi ya mu Baibolo muli uyu musango kulatwafwa ukwishiba bwino ifyo twingalakonka ifyo fyebo e lyo ne fyo twingafibomfya ilyo tulesambilisha abantu Baibolo pa kuti ‘tube abafikapo bwino bwino, abaipangasha icine cine ukubomba umulimo onse uusuma.’—2 Tim. 3:16, 17.

¹⁶ Ulubali lwa bubili ulo twita ukuti Ifyo Twingacita pa Kuti Tulebila Bwino Imbila Nsuma, lwabelako ku kutukansha pa kuti tuleishibilako ifya kushimikila ne fya kusambilisha. Ukulunda pa malyashi ya basambi, muli ulu lubali mulaba no kutamba amavidio ayalanga ifyo twingacita pa kubila imbila nsuma. Ulu lubali lwa kulongana lulatwafwa ukuba no “lulimi lwa basambilila” pa kuti ‘tuleishiba ifya kwasuka uwanaka ku cebo.’—Esa. 50:4.

¹⁷ Mu lubali lwa butatu mu kulongana kwa Imikalile ya Bwina Kristu no Mulimo Tubomba, ulo twita ukuti, Ifyo fwe Bena Kristu Tulingile Ukulaikala, tulasambilila pa fyo twingabomfya amashinte ya mafunde ya mu Baibolo mu mikalile yesu. (Amalu. 119:105) Icikalamba icaba muli ulu lubali, Lisambililo lya Baibolo Ilya pa Cilonganino. Muli ili isambililo mulaba ukwipusha amepusho e lyo abali mwi bumba baleasuka, nga filya fine ciba pe Sambililo lya Ulupungu lwa kwa Kalinda.

¹⁸ Cila mweshi Akatabo ka Mikalile no Mulimo Tubomba nga kafuma, kampanya we bumba lya baeluda nelyo eluda uumwafwako imilimo, alapituluka mu malyashi yalimo no kutantika abakalanda. Cila mulungu, baeluda abaishiba ukusambilisha abo ibumba lya baeluda lyasala, e baba baceyamani pali uku ukulongana. Ceyamani afwile ukushininkisha ukuti ukulongana kwatendeka no kupwa pa nshita kufwile ukupwilapo, kabili alatasha no kufunda abali na malyashi ya basambi.

¹⁹ Nga ca kuti lyonse tulesangwa ku kulongana kwa Mikalile no Mulimo Tubomba, nga tulepekanya uku kulongana kabili nga tuleasukapo, tukalaishibilako amalembo, tukalaumfwikisha amashinte ya mafunde ya mu Baibolo, tukalasambilila ifingalenga twaba abashipa ilyo tulebila imbila nsuma, kabili tukalaishibilako ifya kucita pa kupanga abasambi. Abashilabatishiwa abasangwako nabo bene balanonkelamo muli uku kulongana e lyo na mu kuba pamo na ba bwananyina. Pa kupekanya uku ukulongana no kulongana kumbi kuti twabomfya Watchtower Library iya pa kompyuta, JW Library^®, e lyo na Watchtower LAIBRARE YA PA INTANETI (nga emo yaba mu lulimi lwenu), kabili kuti twabomfya na laibrare ya pa Ng’anda ya Bufumu. Muli laibrare ya pa Ng’anda ya Bufumu muba impapulo ishingi isha Nte sha kwa Yehova pamo nga Icisontelelo ca Mpapulo sha Watch Tower nelyo Icitabo ca Kwafwa Inte sha kwa Yehova Ukusanga Ifyebo e lyo na maBaibolo ayalekanalekana, konkodansi, dikishonari ne fitabo fimbi ifingafwa aba mu cilonganino ukufwaya ifyebo. Uuli onse kuti abomfya ishi mpapulo pa Ng’anda ya Bufumu ilyo ukulongana kushilatendeka nelyo ukulongana nga kwapwa.

UKUKUMANA KWA MULIMO WA MWI BALA

²⁰ Pa nshita shalekanalekana mu kati ka mulungu na pa mpela ya mulungu, bakasabankanya balakumana pa nshita fye iinono pa kuti baye mu mulimo wa mwi bala. Ilingi line bakumanina mu mayanda ya ba bwananyina, nelyo pa fifulo fimbi apo bakasabankanya bengaya, e lyo na pa Ng’anda ya Bufumu. Amabumba ayanono nga yalekumana mu fifulo ifyalekanalekana kuti ca-angukila bakasabankanya ukulasangwako ku kukumana no kulaya mu cifulo umo babila imbila nsuma. Kabili kuti ca-angukila no uletungulula ukweba bakasabankanya ifyo balabomba no ko balabombela ukwabula ukupoosa inshita. Kuti calenga na kangalila we bumba ukulabika sana amano ku baba mwi bumba lyakwe. Nangu ca kuti amabumba yalakumana mu fifulo fyalekanalekana, limo limo yalakumana yonse pamo. Ku ca kumwenako, nga ca kuti bakasabankanya abaya mu mulimo wa mwi bala mu kati ka mulungu balacepa, kuti caba bwino nga ca kuti amabumba yamo nelyo amabumba yonse yalekumana pamo pa Ng’anda ya Bufumu, nelyo pa cifulo cimbi icingaba bwino. Ici kuti calenga bakasabakanya bakwata aba kubomba nabo. Amabumba yonse kuti yakumanina pamo pa Ng’anda ya Bufumu nga kuli holide, nelyo pa numa ye Sambililo lya Ulupungu lwa kwa Kalinda.

²¹ Nga ca kuti amabumba yalekumana mu fifulo umo bakumanina, bakangalila ba mabumba e batungulula ukukumana kwa mulimo wa mwi bala. Limo limo kangalila we bumba kuti aeba kaafwa wakwe nelyo munyina umbi uwafikapo ukuti atungulule. Uuletungula tafwile ukulanda pe lembo lya bushiku, lelo afwile ukupekanya ifyebo ifingafwa bakasabankanya ukubomba bwino umulimo wa kubila imbila nsuma. Pa numa ya kweba bakasabankanya ifyo balabomba, na bo balabomba nabo, umo afwile ukupepa. Lyena bakasabankanya kuti baya mu mulimo. Uku ukukumana konse kufwile ukuba fye amamineti 5 ukufika kuli 7, lelo nga kwabako pa numa ya kulongana, kufwile ukuba fye mu mamineti ayanono sana. Uuletungulula afwile ukulanda ifingakoselesha bakasabankanya kabili ifingabafwa ukuyabomba bwino. Kuti caba bwino nga bakasabankanya abapya nelyo bambi abashilafikapo sana babomba na bakasabankanya abaishiba sana ifya kubomba pa kuti basambililako ifya kubila bwino imbila nsuma.

IFYO UKULONGANA KUBA MU FILONGANINO IFIPYA NELYO MU FINONO

²² Apo abantu abengi balesambilila icine no kuba abasambi, ifilonganino filefulilako. Ilingi line, kangalila wa muputule alatuma ku musambo amaformu ya kwipushishapo ukupanga icilonganino icipya. Lelo limo limo, kuti caba bwino sana nga ca kuti ababa mu mabumba ayanono balelongana fye pamo ne cilonganino icaba mupepi.

²³ Limo mu filonganino fimo ifinono kuti mwaba fye bankashi bekabeka. Ifi nga e fyo caba, ninshi nkashi uulepepa nelyo uuletungulula ukulongana afwile ukufwala icitambala, pantu e fyo Amalembo yalanda. (1 Kor. 11:3-16) Ilingi line nkashi nga aletungulula ukulongana, afwile ukwikala. Bankashi tabalanda amalyashi ya ku cintubwingi. Lelo babelenga fye no kulanda pa fyebo ifyo icilonganino ca kwa Lesa capekanya, e lyo limo kuti bacita ne cilangililo nelyo ukulanshanya ifyebo na bakasabankanya banabo. Iofeshi lya musambo lilasonta nkashi umo uwa kulembeshanya nankwe amakalata, kabili uwa kutungulula ukulongana. Mu kuya kwa nshita, bamunyinefwe nga bafikapo ukubomba iyi milimo e bengalabomba.

UKULONGANA KWA MUPUTULE

²⁴ Cila mwaka, kulaba ukupekanya ukuti filonganino ifyaba mu muputule filonganine pamo ukulongana kwa muputule ukwa bushiku bumo ukubako imiku ibili mu mwaka. Uku kulongana kulenga bonse abasangilweko ‘ukukusha ukutemwa kwabo’ ilyo bali na Bena Kristu banabo. (2 Kor. 6:11-13) Apo icilonganino ca kwa Yehova cileshiba ifyo Abena Kristu bakabila, cilapekanya amalyashi ayalekanalekana, umuba ifilangililo ifyalekanalekana, e lyo na malyashi umo bepushako aba bwananyina pali fimo ifyo abeshile mu kulongana bengasambililako. Uku ukulongana kulakosha bonse abasangwako, kabili kulaba na babatishiwa ku kulangilila ukuti bali-ipeela kuli Yehova.

UKULONGANA KWA CITUNGU

²⁵ Kulaba no kulongana kwa citungu umuku umo mu mwaka. Ilingi line uku kulongana kuba kwa nshiku shitatu, kabili ababa pali uku kulongana bafuma mu miputule iyalekanalekana. Nga ca kuti iofeshi lya musambo linono sana, nalimo kuti bapekanya ukuti ifilonganino fyonse filonganine fye pamo ukulongana kwa citungu. Mu fyalo fimo, bapekanya uku kulongana ukulingana ne fyo ifintu fyaba muli ico calo, nelyo ukulingana ne fyo icilonganino ca kwa Lesa calanda. Limo mu fyalo fimo mulaba ukulongana kwa citungu ukwa bafuma mu fyalo ifingi, nelyo ukulongana kwa citungu ukwaibela ukuba ba Nte abengi sana abafuma mu fyalo ifyalekanalekana. Pa myaka iingi abantu abengi balyumfwa imbila nsuma ya Bufumu pantu kulaba amakampeni ya kwita abantu kuli uku kulongana ukukalamba ukwa Nte sha kwa Yehova.

²⁶ Ku babomfi abaipeela aba kwa Yehova, uku kulongana kuba ni nshita ya kupepela pamo mu nsansa, kabili kulalenga twaumfwikisha icine. Limo tulapokelela ne mpapulo ishipya isho tubomfya pa kuisambilisha Baibolo, pa kulongana kwa cilonganino, nelyo mu mulimo wa kubila imbila nsuma. Pali uku kulongana palaba na babatishiwa. Ukulongana kwa citungu kwalicindama pantu kulalenga tulekula mu fya kwa Lesa, kabili kulalenga caishibikwa ukuti abantu ba kwa Yehova balipanga ulupwa lwa mwi sonde lyonse ulwa Bena Kristu abaishibikwa ukuti basambi ba kwa Yesu Kristu.—Yoh. 13:35.

²⁷ Ukulaya lyonse mu kulongana kwa pa cilonganino, ukwa muputule no kwa citungu, kulalenga twalafwaisha ukucita ukufwaya kwa kwa Yehova. Na kabili tulacingililwa ku fya muli ici calo ifingonaula icitetekelo cesu. Uku kulongana konse kulenga tulecindika no kutasha Yehova. (Amalu. 35:18; Amapi. 14:28) Ala tulatasha nga nshi Yehova pa kubikako ukulongana ukulenga abantu bakwe balesambilila ifingi muli shino nshiku sha ku mpela!

UMULAALILO WA KWA SHIKULU

²⁸ Cila mwaka pa bushiku Yesu Kristu afwililepo, Inte sha kwa Yehova balalongana isonde fye lyonse ku kwibukisha imfwa ya kwa Kristu, nelyo Umulaalilo wa kwa Shikulu. (1 Kor. 11:20, 23, 24) Uku ukulongana ukubako umuku umo cila mwaka e kwacindamisha ku bantu ba kwa Yehova. Yesu alitweba ukuti tufwile ukulaibukisha imfwa yakwe.—Luka 22:19.

²⁹ Ubushiku bwa Cibukisho buba pa bushiku ubo balesefeshapo Ica Kucilila ico Amalembo yalandapo. (Ukufu. 12:2, 6; Mat. 26:17, 20, 26) Cila mwaka abena Israele balesefya Ica Kucilila pa kuti baleibukisha ilyo bafumine mu Egupti mu mwaka wa 1513 ninshi Yesu talaisa pano isonde. Pali ilya nshita, Yehova abebele ukuti ubushiku ubwalenga 14 mu mweshi wa kubalilapo, bushiku bwa kulya umwana wa mpaanga uwa pa Ca Kucilila, kabili e bushiku bafumine mu busha mu Egupti. (Ukufu. 12:1-51) Kuti mwaishiba ubu bushiku nga mwapenda inshiku 13 ukutula apo umweshi uupya wamonekela, uubako ku kupwa kwa mweshi wa March nelyo ku kutendeka kwa mweshi wa April, nga fintu umoneka mu Yerusalemu. Ilingi line Icibukisho cibako pa bushiku bwa kubalilapo ilyo umweshi wa bulungana no kumoneka wamoneka onse, e kutila, pa numa ya nshiku 13 ukutula apo wamonekele.

³⁰ Pali Mateo 26:26-28 e paba amashiwi ayo Yesu alandile pa fya kwibukisha imfwa yakwe. Icibukisho ca mfwa yakwe te lutambi umo ifimpashanya fisanguka umubili no mulopa wa kwa Yesu, lelo mulaalilo wa mampalanya uo abakateka na Yesu Kristu mu Bufumu bwa ku muulu balyako. (Luka 22:28-30) Abena Kristu bonse abaipeela abashakateke na Yesu, e lyo na bantu na bambi, balakoseleshiwa ukusangwa ku Mulaalilo wa kwa Shikulu. Ukusangwako cilangililo ca kuti balatasha pa fyo Yehova Lesa acitila abantunse ukubomfya Umwana wakwe, Yesu Kristu. Ilyo kwashala inshiku ishinono ukuti kube Icibukisho, kulaba ilyashi ilyaibela ilya ku cintubwingi ilyo bapekanya ku kulenga abantu balafwaisha ukusangwa ku Cibukisho no kulafwaisha ukusambilila Baibolo.

³¹ Inte sha kwa Yehova balatemwa ukulongana pamo pa kuti ‘baletontonkanya pa banabo ku kucincishanya ku kutemwa kabili ku kubomba imilimo iisuma.’ (Heb. 10:24) Umusha wa cishinka kabili uwashilimuka alapekanya ukulongana pa kuti tulesambilila pali Lesa. Ababomfi ba kwa Yehova bonse ukubikako fye na bantu abengatemwa ukusambilila pali Lesa, balabakoselesha ukulasangwa lyonse ku kulongana. Nga ca kuti ababomfi ba kwa Lesa baletasha no mweo onse pa fyo Yehova abapeela mu cilonganino cakwe, kuti baba abaikatana. Ne cikalamba ca kuti, pali uku kulongana tulaba ne shuko lya kutasha no kulumbanya Yehova.—Amalu. 111:1.