ICIPANDE 9
Mulepepa Yehova Capamo na ba mu Lupwa Lwenu
“Pepeni uwapangile umuulu ne sonde.”—Ukusokolola 14:7
Nga fintu musambilile muli ino broshuwa, mu Baibolo mwaliba amalembo ayengi ayengamwafwa no lupwa lwenu. Yehova afwaya muleba ne nsansa. Alilaya ukuti nga ca kuti twabika sana amano ku kumupepa, ‘fyonse ifi ifyo tukabila akatupeela.’ (Mateo 6:33) Alafwaisha mwaba cibusa wakwe. Mulebomfya inshita mukwata ku kukosha bucibusa bwenu na Lesa. Bucibusa na Lesa e cintu icacindamisha ico umuntu engakwata.—Mateo 22:37, 38.
1 MULEKOSHA BUCIBUSA BWENU NA YEHOVA
IFYO BAIBOLO ILANDA: “‘Nkaba shinwe, na imwe mukaba abana bandi abaume na bana bandi abanakashi,’ e fyasosa Yehova.” (2 Abena Korinti 6:18) Lesa afwaya mwaba cibusa wakwe. Ukupepa kuli Lesa kukalenga mukabe cibusa wakwe. Yehova afwaya “mulepepa ukwabula ukuleka.” (1 Abena Tesalonika 5:17) Alafwaisha mwamweba ifili mu mutima wenu ne filemusakamika. (Abena Filipi 4:6) Nga mulepepela pamo no lupwa, aba mu lupwa lwenu bakeshiba ukuti mwalicetekela sana Lesa.
Ukupepa kuli Lesa te kwacindama fye, mufwile no kulakutika kuli ena. Kuti mwakutika kuli Lesa nga mulebelenga Icebo cakwe e lyo ne mpapulo ishilanda pali Baibolo. (Amalumbo 1:1, 2) Muletontonkanya pa fyo mulebelenga. (Amalumbo 77:11, 12) Tulakutika kuli Lesa nga tulesangwa na ku kulongana lyonse.—Amalumbo 122:1-4.
Na cimbi icingakosha bucibusa bwesu na Yehova, kulaebako bambi pali ena. Nga muleshimikila sana, mukapalama nga nshi kuli Lesa.—Mateo 28:19, 20.
IFYO MWINGACITA:
Muleshako inshita ya kubelenga Baibolo no kupepa cila bushiku
Mulebika sana amano ku fya kwa Lesa ukucila ukubikisha amano ku kutuusha na ku kwangala
2 MULEKWATA AMAPEPO YA LUPWA
IFYO BAIBOLO ILANDA: “Palameni kuli Lesa, na o akapalama kuli imwe.” (Yakobo 4:8) Mulingile ukutantika inshita iyo mwakulakwatilapo amapepo ya lupwa e lyo no kukonka ifyo mwatantika. (Ukutendeka 18:19) Lelo kuli na fimbi ifyo mufwile ukulacita. Muli fyonse ifyo mulecita cila bushiku mulebikamo ifya kwa Lesa. Ulupwa lwenu lukapalama sana kuli Lesa nga mulelanda pali ena “ilyo mwikele mu mayanda yenu na lintu mule-enda mu musebo na pa kulaala na pa kubuuka.” (Amalango 6:6, 7) Beni nga Yoshua uwatile: “Ine na ba mu ng’anda yandi twakulabombela Yehova.”—Yoshua 24:15.
IFYO MWINGACITA:
Lyonse mulekwata inshita ya kusambilila kabili ilyo mulesambilila mulelanda pa fyo cila muntu mu lupwa alekabila