Amapepo ya Lupwa Yalafwa Sana Indupwa
1. Bushe ukusunga Isabata ukwa cila mulungu kwaafwile shani indupwa sha bena Israele?
1 Yehova aebele abena Israele ukulasunga Isabata kabili ukucita ifi kwalebafwa sana. Abena Israele baletuusha ku milimo yabo iya cila bushiku, kabili balikwete inshita ya kutontonkanya pa busuma bwa kwa Yehova e lyo no kuwamya icibusa cabo na ena. Iyi nshita e lyo abafyashi balekwata ishuko lya kusambilisha abana babo Amafunde ya kwa Lesa pa kuti yaleba mu mitima yabo. (Amala. 6:6, 7) Isabata lyalengele abantu ba kwa Yehova ukubika amano ku kupepa cila mulungu.
2. Bushe ukusunga Isabata kutusambilisha finshi pali Yehova?
2 Kwena, Yehova tafwaya indupwa shilesunga Isabata pali ino nshita. Nangu cibe fyo, lilya ifunde lilatusambilisha icintu cimo pali Lesa wesu. Lyonse alafwaya abantu bakwe ukukwata bucibusa busuma na ena pa kuti ifintu fibawamine. (Esa. 48:17, 18) Muno nshiku inshila imo iyo Yehova aafwilamo abantu bakwe kupitila mu Mapepo ya Lupwa.
3. Mulandu nshi kwabela Amapepo ya Lupwa?
3 Mulandu Nshi Kwabela Amapepo ya Lupwa? Ukutendeka mu January 2009, Isambililo lya Citabo pa Cilonganino lyatendeke ukutungululwa pa bushiku bumo bwine ne Isukulu lya Butumikishi no Kulongana kwa Mulimo. Umulandu cabele ifyo ni pa kuti indupwa shilekwata ubushiku bumo mu mulungu ubwa kukosha bucibusa bwabo na Yehova ukupitila mu mapepo ya lupwa. Cila lupwa balukoseleshe ukubika isambililo lya lupwa pa bushiku balekwatilapo Isambililo lya Citabo, nga ca kutila kuti bakumanisha ukucita ifyo, kabili balingile ukubomfya iyi nshita ukusambilila Baibolo ukwabula ukukwankwanya e lyo no kusambilila ifikumine ulupwa lwabo.
4. Bushe ulupwa lulingile ukupampamina fye pa kutila Amapepo ya Lupwa yaleba iawala limo? Londololeni.
4 Pa kuti tusangweko kwi Sambililo lya Citabo pa Cilonganino twalekabila inshita ya kufwala, ukwenda e lyo no kupekanya ifintu fimbi. Fwe bamo pa kuti tusangwe kuli uku kulongana kwe awala limo twalepoosa inshita iikalamba sana. Kanshi filya ba-alula ukulongana, calilenga ukuti tulepepa Yehova mu nshita ya cungulo no lupwa lwesu. E co tatulingile ukupampamina fye ukuti Amapepo ya Lupwa yalingile ukuba fye iawala limo. Lelo, tulingile ukutontonkanya pa fyo ulupwa lwesu lulekabila ne fyo lwingakwanisha ukucita kabili tulecita amapepo mu nshita yalinga iingawamina bonse mu lupwa.
5. Bushe inshita yonse ilingile ukupwila ku kulanshanya capamo no lupwa? Londololeni.
5 Bushe Inshita Yonse Ilingile Ukupwila ku Kulanshanya Capamo no Lupwa? Abaupana e lyo na balya abakwata na bana, balakoseleshanya nga ca kuti balelanshanya amalyashi ya mu Malembo. (Rom. 1:12) Ici cilenga ulupwa ukwikatana. Kanshi ilyo mulekwata Amapepo ya Lupwa mulingile ukulanshanya sana Amalembo. Nangu cibe fyo, umo umo mu lupwa kuti akwata inshita ya kuisambilisha umwine pa lwakwe. Ku ca kumwenako, pa numa ya kusambilila capamo, cila muntu kuti atwalilila ukusambilila pa lwakwe, napamo kuti afwaya ukupwisha ukupekanya ukulongana nelyo ukubelenga magazini. Indupwa shimo balasalapo ukushimya TV inshita ya cungulo yonse ilyo bakwata Amapepo ya Lupwa.
6. Bushe kuti mwatungulula shani Amapepo ya Lupwa?
6 Kuti Mwatungulula Shani Amapepo ya Lupwa? Inshila ya kulanshanishishamo taingile lyonse ukuba fipusho ne fyasuko. Pa kuti Amapepo ya Lupwa yaleba ayasuma kabili aya kucincimusha, indupwa ishingi balikwata programu iyapala ukulongana tukwata mu kati ka mulungu. Balaakanya Amapepo ya Lupwa mu fiputulwa, lyena balalanshanya ifyo fiputulwa ukubomfya inshila shalekanalekana. Ku ca kumwenako, kuti pambi babelengela Baibolo capamo, bapekanishisha capamo ulubali lumo ulwa kulongana kabili balapitulukamo mu fyebo ifyo bakayashimikila abantu mwi bala. Pe bula 6 pali inshila shimo isha kukonka.
7. Bushe abafyashi balingile ukucita shani ilyo baletungulula Amapepo ya Lupwa?
7 Bushe Abafyashi Balingile Ukucita Shani Ilyo Baletungulula Amapepo ya Lupwa? Ulupwa lwenu lukasambilila bwino nga ca kuti mulelanga ukutemwa, kabili na muteka no mutima. Nga mulefwaya, inshita shimo kuti mwasambilila pa nse imiceele nga ili bwino. Ilyo mulesambilila, nga mulefwaya kuti muletushako panono nga mwamona ukuti mulekabila ukucite fyo. Indupwa shimo balakwata utwa kulya no twa kunwa cilya bapwisha amapepo. Abafyashi tabalingile ukwikalila fye ukushobaula nelyo ukusalapula abana ilyo bali pa Mapepo ya Lupwa, lelo kwena inshita shimo kuti bapaatulako inshita iya kulanda pa musango wabipa nelyo ubwafya ubo ulupwa lwabo lukwete. Nomba nga ca kuti uwa mu lupwa ali no bwafya, kuti cawama ukulanshanya nankwe pa mbali ubushiku bumbi fye mu mulungu pa kuti e umfwa insoni ku banankwe. Ubushiku bwa Mapepo ya Lupwa tabulingile ukuba ubwa kutendusha, ukwabula no kusekako, lelo bulingile ukuba ubwa nsansa ukulangilila ukuti Lesa tupepa wa nsansa.—1 Tim. 1:11.
8, 9. Bushe imitwe ya ndupwa kuti bapekanya shani Amapepo ya Lupwa?
8 Bushe Umutwe wa Lupwa Kuti Apekanya Shani Amapepo ya Lupwa? Ulupwa kuti lwamwenamo nga ca kuti umutwe wa lupwa apekanya ifya kulanshanya pa Mapepo ya Lupwa ilyo kucili inshita no kusala inshila ya kulanshanishishamo. (Amapi. 21:5) Umulume alingile ukumfwana no mukashi pa fyo balingile ukusambilila. (Amapi. 15:22) Mwe mitwe ya ndupwa, bushe limo limo te kuti mwipushe abana ifyo nabo bengatemwa ukusambilila? Nga mwacite fyo, mukeshiba ifyo abana benu batemwa ne fibasakamika.
9 Imilungu iingi, umutwe wa lupwa takapoose inshita iikalamba ukulapekanya ifya kulanshanya. Ulupwa napamo kuti lulaipakisha sana ukusambilila fimo ifyo mucita cila mulungu, kabili umutwe wa lupwa te kuti alefwaya ifyebo ifipya cila nshita. Umufyashi kuti pambi camuwamina ukupekanishisha programu ikakonkapo lilya line fye bapwisha ukusambilila, ilyo ashilalaba ifyo ulupwa lwakwe lulekabila lwa ku mupashi. Abatungulula indupwa bambi, balatantikila kabela ifyebo bakasambilila no kufikambatika apali ponse apo abana bengafimona pamo nga pa furiji. Ici cilenga bonse ukutemwa sana no kulafwaisha ukuti bakasangweko ku kusambilila kabili cilenga no ulupwa ukukwata inshita iisuma iya kupekanya.
10. Bushe abekala beka kuti babomfya shani ubu bushiku bwa Mapepo ya Lupwa?
10 Kuti Nacita Shani nga ca Kuti Naba fye Neka? Abekala beka kuti babomfya ubushiku bwa Mapepo ya Lupwa ukulaisambilisha abene. Kuti bakwata programu iisuma iya kulaisambilisha abene pamo nga, ukubelenga Baibolo, ukupekanya ukulongana, no kubelenga Ulupungu lwa kwa Kalinda na Loleni! Bakasabankanya bambi balalundapo no kufwailisha ifyebo na fimbi. Inshita shimbi kuti basalapo ukwita kasabankanya umbi nelyo ukwita ulupwa lumo pa kuti balanshanishishe capamo no kukoseleshanya ukubomfya Amalembo.
11, 12. Busuma nshi bumo bumo ubwaba mu kukwata Amapepo ya Lupwa cila mulungu?
11 Busuma Nshi Bwaba mu Kukwata Amapepo ya Lupwa Cila Mulungu? Abapepa Lesa no mweo onse balapalamina kuli Yehova. Kabili, indupwa abapepela pamo balakosha ulupwa lwabo. Umulume no mukashi balembele pa mapaalo baipakisha abati: “Ine no mwina mwandi tulabomba bupainiya, kabili tatwakwata bana. Lyonse tulafwaya ubushiku bwa Mapepo ya Lupwa ukufika bwangu. Tulomfwa ukuti tulaba abaikatana sana kabili tulapalama na kuli Shifwe wa ku muulu. Lyonse nga twabuuka pa bushiku bwa Mapepo ya Lupwa kulaba ukucinkulana ukuti ‘Bushe namwishiba ukuti lelo bushiku bwa Mapepo ya Lupwa?’”
12 Ukukwata amapepo ya lupwa kulafwa na balya abakwata ifya kucita ifingi. Umwanakashi umo, uushaupwa lelo uwakwata abana babili kabili painiya wa nshita yonse alembele ukuti: “Kale nshaletungulula isambililo lya lupwa lyonse pantu nalenaka sana. Nalefilwa ukusanga inshita ye sambililo lya lupwa. Nomba nalemba ino kalata ku kumutasha sana pali ubu bushiku bwa Mapepo ya Lupwa. Ino nshita tulakwata isambililo lya lupwa lyonse kabili twalisanga ubusuma bwabamo.”
13. Cinshi cingalenga ulupwa lwenu ukumwenamo mu Mapepo ya Lupwa?
13 Filya fine ubushiku bwe Sabata bwali, e fyo no bushiku bwa Mapepo ya Lupwa bwaba. Ubu bupe ubo Shifwe wa ku muulu atupeela ubwafwa indupwa. (Yako. 1:17) Inshila abena Israele balesungilamo Isabata e yalelenga balekosha sana bucibusa bwabo na Lesa. Mu nshila imo ine ifyo tubomfya ubushiku bwa Mapepo ya Lupwa ubo twapeelwa e filenga ulupwa lwesu ukukoselako mu kupepa. (2 Kor. 9:6; Gal. 6:7, 8; Kol. 3:23, 24) Nga mwabomfya bwino inshita ya Mapepo ya Lupwa, ulupwa lwenu kuti lwasosa aya mashiwi ya kwa kemba wa malumbo ayatila: “Lelo ine, ukupalama kuli Lesa kusuma kuli ine. Muli Shikulu Mulopwe Yehova e mo nauba.”—Amalu. 73:28.
[Amashiwi pe bula 5]
Ubushiku bwa Mapepo ya Lupwa tabulingile ukuba ubwa kutendusha, ukwabula no kusekako, lelo bulingile ukuba ubwa nsansa ukulangilila ukuti Lesa tupepa wa nsansa
[Akabokoshi pe bula 6]
SUNGENI
Ifyebo fya Kumwafwa pa Bushiku bwa Mapepo ya Lupwa
Baibolo:
• Belengeleni capamo ifipandwa fya kubelenga kwa Baibolo ukwa cila mulungu. Amalyashi yamo ayaba mu Baibolo yalembwa mu nshila ya kuti umuntu umo aleshimika ifyo cali e lyo bambi balebelenga amashiwi yalandile bantu bapusanapusana muli ilyo lyashi.
• Citeni cilangililo ca lyashi mulebelenga mu Baibolo.
• Peeleleni limo cila muntu mu lupwa imbali sha kubelenga ifipandwa fya mu Baibolo no kulemba icipusho cimo nelyo fibili ifili mu fyebo alebelenga. Lyene fwailisheni ifyasuko ku fipusho fyonse.
• Cila mulungu lembeni icikomo ca mu Baibolo pa kapepala kabili esheni ukusungila ku mutwe no kulondolola ico cikomo. Lembeni ifikomo pa tupepala twalekanalekana kabili pitulukenimo cila mulungu mumone amalembo mwingebukisha.
• Bomfyeni icilimba ukukutika kuli Baibolo iyo babelenga no kukopa amashiwi kabili konkenimo muli Baibolo yenu ilyo balebelenga.
Ukulongana:
• Pekanishisheni capamo imbali shimo isha kulongana.
• Pitulukeni mu nyimbo sha Bufumu isho batantike isha mulungu uukakonkapo.
• Nga ca kuti umo nakwata ilyashi mwi Sukulu lya Butumikishi Ilya Bulesa nelyo icilangililo mu Kulongana kwa Mulimo, lanshanyeni ifyebo engabomfya nelyo lekeni alangilile aba mu ng’anda ifyo akalanda ilyashi.
Ifyo Ulupwa Lulekabila:
• Lanshanyeni ifyebo ukufuma mu citabo ca Abacaice Bepusha Ukuti, nelyo icitabo ca Sambilila Kuli Kasambilisha Mukalamba.
• Citeni icilangililo ca fyo abana be sukulu bengacita nga ca kuti bakwata ubwafya ku sukulu.
• Citeni icilangililo ca kuti abana baba kwati e bafyashi e lyo abafyashi inshita imbi babe kwati e bana. Abana bafwailisha ifyebo fimo e lyo batendeka ukulapelulushanya na bafyashi.
Ukushimikila:
• Pitulukeni mu fyebo mukayabomfya pa mpela ya mulungu mu kushimikila kabili citeni icilangililo ukubomfya ifyo fine fyebo.
• Lanshanyeni pa fyo mwapanga ukucita pamo no lupwa pa kuti mukabombeshe mu nshita ya Cibukisho nelyo ilyo mukaba pa cuti.
• Lekeni umo umo mu lupwa pa mamineti fye ayanono afwailishe ifyo engasuka ifipusho fyapusanapusana ifyo abantu tushimikila bengepusha, citeni icilangililo.
Ifintu Fimbi Ifyo Mwingacita:
• Belengeleni capamo icipande ukufuma muli magazini ya nomba line.
• Lekeni umo mu lupwa abelengele calimo icipande ico atemenwe sana ukufuma muli magazini ya nomba line kabili lekeni alondolole ifi fyebo ku lupwa.
• Pa nshita shimo kuti mwaita kasabankanya umo nelyo abaupana ukwisasangwa pa mapepo yenu aya lupwa kabili kuti mwabepushako ne fipusho.
• Kuti mwatamba vidio imo iya sosaiti no kulanshanya.
• Lanshanyeni icipande muli Loleni! ica kuti “Abaice Bepusha Ukuti” nelyo ica kuti “Lanshanyeni na Bana.”
• Lanshanyeni icipande ukufuma mu Ulupungu lwa kwa Kalinda icitila “Fundeni Abana Benu” nelyo icitila “Icipande ca Baice.”
• Belengeni no kulanshanya ifyebo fyaba muli Yearbook nelyo ulupapulo ululi lonse ulwafumine pa kulongana kwa citungu ukwafumineko.
• Pa numa ya kusangwa ku kulongana kwa citungu, ukulongana kwa muputule, nelyo ukwaibela, pitulukeni mu fishinka fikalamba.
• Lolesheni ifyo Yehova abumba kabili lanshanyeni ifyo ububumbo butusambilisha pali Yehova.
• Bombeleni capamo ilyo mulesambilila ifintu pamo nga ifikope, ama mapu, nelyo ama charti.