Bafulumuka Kateka Umunkalwe

Yosefe ashibwishe Maria no kumweba ifyo balingile ukucita bwangu bwangu. Malaika wa kwa Yehova alimoneke kuli ena mu ciloto no kusosa ati: “Ima, senda umwana na nyina no kufulumukila ku Egupti, kabili ukekale kulya mpaka nkakwebe ukufumako; pantu Herode alatendeka ukufwaya umwana pa kuti amwipaye.”—Mateo 2:13.

Ilyo line ubushiku, Yosefe na Maria no mwana balifulumwike. Balyangufyenye ukufulumuka pantu Herode alishibe ukuti ababukila ku ntanda balimupitile pa mano. Abebele ukuti nga bamona umwana, bakamwebe. Lelo bafumine mu calo ukwabula ukumweba. Herode alifulilwe icine cine. Apo alefwaya ukwipaya Yesu, atumine aba kuyaipaya abana baume bonse aba myaka ibili no kucepako mu Betelehemu na mu ncende shonse ishali mupepi. Alishibe ukuti ukulingana ne fyo aumfwile ku babukila ku ntanda abafumine ku Kabanga, imyaka Yesu akwete pali ilya nshita, tayacilile ibili.

Calibipile icine icine, abana baume bonse balibepeye! Tatwaishiba impendwa ya bana abaume abo baipeye, lelo ukulila no kuloosha ukukalamba uko banyina ba bana balooseshe kwalifikilishe ifyo Baibolo yasobele ukupitila muli Yeremia, kasesema wa kwa Lesa.—Yeremia 31:15.

Pali iyi nshita, Yosefe no lupwa lwakwe ninshi balifulumukila ku Egupti, uko baile mu kwikala. Lyena bushiku bumo malaika wa kwa Yehova alimoneke na kabili kuli Yosefe mu ciloto no kumweba ati: “Ima, senda umwana na nyina no kuya ku calo ca Israele, pantu abalefwaya ukwipaya umwana balifwa.” (Mateo 2:20) Kanshi Yosefe alishibe ukuti nomba kuti abwelelamo ku mwabo no lupwa lwakwe. Ici califikilishe na cimbi ico Baibolo yasobele. Yatile Umwana wa kwa Lesa aketwa ukufuma ku Egupti.—Hosea 11:1.

Yosefe afwaile ukwikala no lupwa lwakwe mu Yudea, mupepi ne tauni lya Betelehemu, uko baleikala ilyo bashilafulumukila ku Egupti. Lelo taileko ilyo aishibe ukuti Arkelao, umwana wa kwa Herode, e wali imfumu mu Yudea. Lesa na kabili alisokele Yosefe mu ciloto pali iyi imfumu iyabipa. E ico Yosefe no lupwa lwakwe baile ku kapinda ka ku kuso no kuyaikala mu musumba wa Nasarete, uwali mu citungu ca Galili, ukutali ne cifulo ukwali sana imipepele ya ciYuda. Yesu akuliile muli uyu musumba, kabili ici cafikilishe ifyo Baibolo yasobele ukuti: “Aketwa umwina Nasarete.”—Mateo 2:23.