Ababomfi Batumikila Balabomba Imilimo Iyacindama

ILYO umutumwa Paulo alembeele icilonganino ca ku Filipi kalata, atile: “Paulo na Timote, fwe basha ba kwa Kristu Yesu, twamulembela mwe ba mushilo bonse muli Kristu Yesu abali mu Filipi, pamo pene na bakangalila na babomfi batumikila.” (Fil. 1:1) Twamona ukuti Paulo aliposeshe na babomfi batumikila. Aba baume balebomba umulimo wacindama uwa kwafwa baeluda mu cilonganino. E fyo caba na muno nshiku mwine. Ababomfi batumikila balabomba imilimo iya kwafwa bakangalila, kabili ici cilalenga mu cilonganino mwiba icimfulumfulu.

² Bushe ababomfi batumikila ababa mu cilonganino cenu mwalibeshiba? Bushe mwalishiba imilimo babomba mu cilonganino? Yehova alatasha icine cine pa fyo aba baume babombesha. Paulo alandile ati: “Abaume ababomba bwino balashimikwa bwino kabili kuti balanda no kushipa ukwingi pa citetekelo muli Kristu Yesu.”—1 Tim. 3:13.

IMILINGO YA MU MALEMBO IYA BABOMFI BATUMIKILA

³ Ababomfi batumikila bafwile ukuba ne mibele iisuma iya Bwina Kristu, bafwile ukuba abacetekelwa kabili bafwile ukulabomba bwino imilimo. Ifi e fyo Paulo alandilepo muli kalata alembeele Timote pa milingo ya babomfi batumikila, atile: “Ababomfi batumikila na bo bene balebika amano ku fintu, tabafwile ukuba aba ndimi shibili, nelyo abatemwisha umwangashi uwingi, kabili tabafwile ukuba abatemwisha ubunonshi bwa bufumfuntungu, babe abasunga inkama ya kwa Lesa iya citetekelo na kampingu uwasanguluka. Kabili, aba babale beshiwe pa kuti bamonwe nga nabalinga, e lyo bengabomba ubutumikila, pa kuba ababulwa umulandu. Ababomfi batumikila babe abalume ba mukashi umo, abatungulula bwino abana babo na ba mu ng’anda yabo.” (1 Tim. 3:8-10, 12) Ukukonka ifi ififwaikwa ifya mu Malembo, ifilanda pa babomfi batumikila kulacingilila icilonganino ku bengalanda ifyabipa pa baume ababomba imilimo yaibela mu cilonganino.

⁴ Nampo nga bacaice nelyo bakalamba, ababomfi batumikila bafwile ukulabombesha mu mulimo wa kubila imbila nsuma cila mweshi. Bafwile ukulapashanya Yesu uwalebila sana imbila nsuma. Nga balebombesha, cikeshibikwa ukuti bapashanya Yehova uufwaya abantunse bakapusuke.—Esa. 9:7.

⁵ Ababomfi batumikila na kabili bafwile ukulafwala bwino, ukulamoneka bwino, ukuba ne milandile iisuma, e lyo ne mibele iisuma. Ababomfi batumikila nga bali na mano ayatuntulu, balacindikwa. Bafwile no kubika sana amano kuli bucibusa bwabo na Yehova ne milimo iyo bapeelwa mu cilonganino.—Tito 2:2, 6-8.

⁶ Aba baume ‘balabala babesha.’ Ilyo bashilabasonta, bafwile ukulanga ukuti bali-ipeelesha, balibika sana amano ku fya Bufumu, kabili balafwaisha ukubombako imilimo yonse iyo bengabapeela. Aba baume balilinga ukubapashanya.—1 Tim. 3:10.

IMILIMO IYO BABOMBA

⁷ Ababomfi batumikila babomba imilimo yalekanalekana mu cilonganino. Ici cilafwa bakangalila ukubika sana amano ku mulimo wa kusambilisha no kucema. Pa kupeela ababomfi batumikila imilimo, baeluda balamona imilimo iyo umubomfi utumikila engabomba bwino kabili balatontonkanya na pa fyo icilonganino cilekabila.

⁸ Imilimo imo iyo babomba ni yi: Umubomfi utumikila kuti bamupeela umulimo wa kubombela ku mpapulo pa kuti tulekwata impapulo sha kubelenga ne sha kubomfya mu mulimo wa kubila imbila nsuma. Bamo babapeela umulimo wa kusunga ifyalembwa fya ndalama sha cilonganino nelyo ifyalembwa fya cifulo ca kubilamo imbila nsuma. Bambi nabo babapeela umulimo wa kubombela ku fisoselo, umulimo wa bukapyunga nelyo ukwafwa baeluda imilimo imbi. Apo tufwile ukulasunga Ing’anda ya Bufumu iya busaka e lyo no kulawamya ifileonaika, ilingi line ababomfi batumikila balabeba ukwafwilishako ukubomba iyi milimo.

⁹ Mu filonganino fimo, umubomfi utumikila umo kuti bamupeela fye umulimo umo uwa kubomba. Lelo mu filonganino fimbi, umubomfi utumikila umo kuti bamupeela imilimo iingi. E lyo limo limo, umulimo umo kuti wapeelwa ku babomfi batumikila babili nelyo ukucilapo. Nga takuli ababomfi batumikila abengi aba kubomba imilimo, baeluda kuti bapeela imilimo imo kuli bamunyinefwe ababatishiwa ababa ne mibele iisuma. Ici cikalenga bakeshibe ifya kubomba bwino iyi milimo ilyo bakafikapo ukuba ababomfi batumikila. Nga takuli bamunyinefwe abafikapo aba kubomba iyi milimo, bankashi aba mibele iisuma kuti babeba ukula-afwilishako imilimo imo nangu ca kuti te kuti babasonte ukuba abatumikila. Aba mibele iisuma ni balya abo aba mu cilonganino bengapashanya. Kanshi aba bamunyinefwe nelyo bankashi bafwile ukulalongana no kulashimikila lyonse, kabili aba mu lupwa lwabo bafwile ukuba ne mibele isuma. Ifyo batemwa ukucita nga balelesha icitendwe, imifwalile ne mimonekele yabo fifwile ukuba ifisuma.

¹⁰ Mu filonganino umo baeluda bacepa sana, ababomfi batumikila abafikapo kuti bapeelwa umulimo wa kupitulushamo abalefwaya ukubatishiwa, maka maka mu masambililo ayalanda pa fyo twasuminamo. Aya amasambililo yaba mu cipande 1 icitila, “Ifyo fwe Bena Kristu Twasuminamo.” Lelo icipande 2 icitila, “Ifyo Umwina Kristu Afwile Ukuba,” ni baeluda fye epela e balingile ukubapitulushamo pantu mwaba ukulanshanya pa fikumine sana uo balepitulushamo.

¹¹ Limo limo nga ca kuti baeluda bamona ukuti umulimo umo uo umubomfi utumikila abomba kuti wabombwa bwino sana no mubomfi utumikila umbi, uyo wine uwingabomba bwino e o balingile ukupeela uyo mulimo. Lelo kwena cilawamisha ukuleka bamunyinefwe balebomba umulimo umo wine pa nshita iikalamba pa kuti baishibisha ifya kubomba bwino uyo mulimo.

¹² Ukulingana ne fyo mu cilonganino cenu mwaba, kuti kwaba imilimo imo iyo baeluda bengapeela ababomfi batumikila abo ‘ukulunduluka kwabo kulemoneka kuli bonse.’ (1 Tim. 4:15) Baeluda nga balicepa, umubomfi utumikila kuti apeelwa umulimo wa kuba kaafwa kuli kangalila we bumba, nelyo kuti aba umubomfi we bumba, lelo baeluda e balingile ukulamweba ifya kucita. Ababomfi batumikila kuti balepeelwako amalyashi yamo mu Ukulongana kwa Imikalile no Mulimo Tubomba, e lyo inshita shimo kuti baletungululako ne Sambililo lya Baibolo Ilya pa Cilonganino. Na kabili kuti balelandako na malyashi ya ku cintubwingi. Ababomfi batumikila kuti babapeelako ne milimo imbi iilekabilwa ukubomba nga ca kuti nabafikapo ukubomba iyo milimo. (1 Pet. 4:10) Ilyo ababomfi batumikila baleafwa baeluda ukubomba imilimo, balingile ukulabomba no mweo onse.

¹³ Nangu ca kuti imilimo iyo ababomfi batumikila babomba yalipusana ne yo baeluda babomba, bonse babombela Lesa umulimo wa mushilo kabili walicindama pantu ulalenga ifintu file-enda bwino mu cilonganino. Mu kupita kwa nshita, ababomfi batumikila nga balebomba bwino imilimo bapeelwa, kabili nga bafikapo ukubomba umulimo wa kucema no kusambilisha, kuti basontwa ukuba baeluda.

¹⁴ Nga muli bacaice nangu e lyo mubatishiwe fye, bushe mulabombesha pa kuti mukafikepo ukuba ababomfi batumikila? (1 Tim. 3:1) Apo abantu abengi nga nshi balesa mu cine cila mwaka, abaume abafikapo ukubomba imilimo mu cilonganino balefwaikwa. Kuti mwafikapo nga ca kuti mulefwaisha ukulabombako imilimo ya kwafwa bamunyinenwe. Nga muletontonkanya pa fyo Yesu aleafwa abantu, na imwe kuti mwalafwaisha ukwafwa abantu. (Mat. 20:28; Yoh. 4:6, 7; 13:4, 5) Mukalafwaisha ukwafwa abantu nga mwamona ubusuma bwaba mu kucita ifi. (Imil. 20:35) Kanshi muleitemenwa ukwafwa aba mu cilonganino, ukuwamya Ing’anda ya Bufumu nelyo fye ukulanda amalyashi ya kupumikisha mu Ukulongana kwa Imikalile no Mulimo Tubomba. Nga mulefwaisha ukubombako imilimo mu cilonganino, mufwile ukulaisambilisha Baibolo lyonse pa kuti mukabe ne mibele ya Bwina Kristu. (Amalu. 1:1, 2; Gal. 5:22, 23) Na kabili munyinefwe uulefwaya ukubombako imilimo mu cilonganino, nga bamupeela imilimo afwile ukulanga ukuti wa cishinka kabili kuti acetekelwa.—1 Kor. 4:2.

¹⁵ Ababomfi batumikila basontwa no mupashi wa mushilo pa kuti balebomba bwino mu cilonganino. Ilyo ababomfi batumikila balebomba imilimo bapeelwa, bonse aba mu cilonganino kuti balanga ukuti balatasha pa milimo babomba nga balekonka ifyo balebeba. Nga balecita ifi bakalanga no kuti balatasha pa fyo Yehova apekanya pa kuti mu cilonganino tamuleba icimfulumfulu.—Gal. 6:10.