Ifyebo Fyalundwako

Ifyebo ku Bafyashi Abena Kristu:

Mwe bafyashi, mufwile mulafwaisha ukwafwa abana benu ukutemwa Yehova no kuipeela kuli ena. Nomba kuti mwabafwa shani pa kuti bafikepo ukubatishiwa? Ni lilali bengalinga ukubatishiwa?

Yesu aebele abasambi bakwe ukuti: ‘Kalengeni aba nko shonse ukuba abasambi, mulebabatisha.’ (Mat. 28:19) Ukulingana ne li lembo, pa kuti umuntu afikepo ukubatishiwa afwile ukuba umusambi, e kutila, alingile ukusambilila no kusumina ifyo Kristu alesambilisha e lyo no kulafikonka. Kanshi nangu fye bana kuti baba abasambi ba kwa Kristu.

Mwe bafyashi mulecita ifingalenga abana benu bamona ukuti mwalitemwa Yehova, kabili mulebasambilisha ifyo Yehova afwaya. (Amala. 6:6-9) Mulebomfya icitabo icitila Kuti Mwaba ne Nsansa Umuyayaya!, pa kubasambilisha amasambililo ya mu Baibolo aya kutendekelako, na pa kubafwa ukulatontonkanya pa mashinte ya mafunde ya mu Baibolo pa kuti baleyakonka. Muleafwa abana benu ukwishiba ifya kulondolola ifyo basuminamo mu mashiwi yabo. (1 Pet. 3:15) Ifyo mubasambilisha, ifyo mubakoselesha, ifyo basambilila pa mapepo ya lupwa, ifyo basambilila ilyo bali pa kulongana, ifyo baisambilisha abene mu Baibolo, e lyo no kwangala ne fibusa ifisuma kuti fyalenga bafikapo ukubatishiwa kabili kuti fyabafwa na pa numa ya kubatishiwa. Mulebafwa no kulatontonkanya pa milimo bengabombako mu cilonganino ca kwa Lesa, iingalenga bakosha bucibusa bwabo na ena.

Pa Amapinda 20:11 patila: “Umulumendo eshibikilwa ku micitile yakwe nga ca kuti imilimo yakwe isuma kabili yalilungama.” Finshi mwingamwenako ukuti umwana umulumendo nelyo umukashana, naba umusambi wa kwa Yesu Kristu kabili nafikapo ukubatishiwa?

Umwana uulefwaya ukubatishiwa alingile ukulaumfwila abafyashi bakwe. (Imil. 5:29; Kol. 3:20) Baibolo itila ilyo Yesu ali ne myaka 12, alitwalilile ukunakila abafyashi bakwe. (Luka 2:51) Kwena abana benu tabapwililika. Na lyo line umwana uulefwaya ukubatishiwa alingile ukulacita ifyo Yesu alecita, kabili alingile ukulanakila abafyashi bakwe.

Afwile no kutemwa ukusambilila icine ca mu Baibolo. (Luka 2:46) Bushe umwana wenu alitemwa ukulongana no kwasukapo? (Amalu. 122:1) Bushe alitemwa ukubelenga Baibolo lyonse no kuisambilisha ifya kwa Lesa?—Mat. 4:4.

Umwana uulefwaya ukubatishiwa alingile ukubika ifya Bufumu intanshi. (Mat. 6:33) Na kabili, alingile ukulaebako abantu pa fyo asuminamo. Afwile ukulashimikilako abantu imbila nsuma mu nshila shalekanalekana, kabili tafwile ukulaumfwa insoni ukweba bakafundisha na bana besukulu banankwe ukuti ni Nte ya kwa Yehova. Alingile ukulabikako sana amano nga bamupeela ilyashi mu Kulongana kwa Imikalile no Mulimo Tubomba.

Na kabili afwile ukulaesha na maka ukuba ne mibele iisuma, tafwile ukula-angala na baba ne mibele yabipa. (Amapi. 13:20; 1 Kor. 15:33) Pa kuti abafyashi beshibe nga ca kuti umwana wabo aliba ne mibele iisuma, balingile ukubika amano ku nyimbo atemwa, amafilimu atamba, ifyangalo fya pa kompyuta ifyo atemwa, amaprogramu ya pa TV ayo atamba, e lyo ne fyo abomfya Intaneti.

Abana abengi balakonka ifyo abafyashi babasambilisha, balatemwa icine, kabili balabatishiwa ninshi bali fye abaice. Shi Yehova atwalilile ukumupaala ilyo muleafwa abana benu ukuti bakafikepo ukubatishiwa.

Kuli Kasabankanya Uushabatishiwa:

Lishuko nga nshi ukuba kasabankanya uushabatishiwa mu cilonganino. Tulemutasha pa fyo mwalunduluka mu fya kwa Lesa. Apo mulasambilila Icebo ca kwa Lesa, mwalishiba ifyo Lesa aaba kabili mwalicetekela ne fyo alaya.—Yoh. 17:3; Heb. 11:6.

Ilyo mushilatendeka ukusambilila ne Nte sha kwa Yehova, nalimo mwalepepa kumbi nelyo tamwalepepa nangu kumo. Nalimo mwalecita ifyo Baibolo yakaanya. Nomba mwalilanga ukuti mwalikwata icitetekelo pantu mwalilapila, icilepilibula ukuti mwalileka ukucita ifyabipa ifyo mwalecita kale, kabili mwalipampamina pa kucita ifisuma ifyo Lesa afwaya.—Imil. 3:19.

Nalimo mwalishiba amalembo ya mushilo “ukufuma ku bunya,” kabili tamwacitapo ifyo Abena Kristu bashilingile ukucita, nelyo ukucita imembu ishikalamba. (2 Tim. 3:15) Mwalisambilila ifya kucita pa kukanakonkelela ifibusa fyabipa kabili tamucita ifyo Yehova amona ukuti fyalibipa. Mwalilanga ukuti mwalikwata icitetekelo pantu mulatungilila ukupepa kwa cine, kabili mulashimikilako abantu ifyo mwasuminamo. Balimusambilisha ifya kubila bwino imbila nsuma. Nomba namupingulapo ukulabombela Yehova nga kasabankanya uushabatishiwa.

Nampo nga mwasambilile ifyo Yehova afwaya ukutula ku bunya nelyo nga ni mu bukalamba, nalimo nomba mulefwaya ukucita ifintu fibili ifyacindama nga nshi, e kutila, ukuipeela e lyo no kubatishiwa. Ukuipeela kupepa kuli Yehova ukumweba ukuti namupingulapo ukulamubombela ubumi bwenu bonse. (Mat. 16:24) Pa kulanga ukuti mwali-ipeela kuli Yehova, mulingile ukubatishiwa. (Mat. 28:19, 20) Nga mwaipeela no kubatishiwa, e lyo mwingaba umubomfi wa kwa Yehova Lesa uo asala. Ala lishuko nga nshi ukuba umubomfi wa kwa Lesa uo asala!

Nomba nga fintu mwasambilile mu Baibolo, inshita shimo mukalakwata amafya ayalekanalekana. Nga muleibukisha, ilyo fye Yesu abatishiwe, ‘umupashi wamutungulwile ku matololo pa kuti ayetunkwa kuli Satana Kaseebanya.’ (Mat. 4:1) Na imwe bene mule-enekela ukutila mukalaba na mesho ayengi nga mwaba umusambi wa kwa Yesu uwabatishiwa. (Yoh. 15:20) Aya mesho yakaba ayapusanapusana. Nalimo balupwa kuti balamukaanya ukubombela Lesa. (Mat. 10:36) Nalimo abo musambilila nabo ku sukulu, abo mubomba nabo, ne fibusa fyenu kuti balamuseka. Lyonse muleibukisha amashiwi Yesu alandile ayaba pali Marko 10:29, 30 apatila: “Ndemweba icine cine, nati, takuli uwasha ing’anda nelyo bamunyina nelyo inkashi nelyo nyina nelyo wishi nelyo abana nelyo amabala pa mulandu wa ine na pa mulandu wa mbila nsuma uushakapokelele imiku 100 pali ino nshita, amayanda na bamunyina ne nkashi na banyina na bana na mabala, e lyo no kumucusha pa mulandu wa ine. Na ku ntanshi akapokelela umweo wa muyayaya.” E ico twalilileni fye ukulakosha bucibusa bwenu na Yehova no kulakonka amafunde yakwe ayalungama.

Nga mulefwaya ukubatishiwa, mufwile ukweba kampanya we bumba lya baeluda. Pa mabula yakonkelepo pali amepusho ayo baeluda bakalanshanya nenu pa kuti bakamone nga namufikapo ukubatishiwa. Nga mulefwaya, kuti mulepituluka muli aya mepusho ilyo muleisambilisha ifya kwa Lesa.

Ilyo mulepitulukamo mulebelenga no kutontonkanya sana pa Malembo ayo ba-ambula. Nga mulefwaya kuti mwalembako ifyebo fimo muli cino cine citabo nelyo kuti mwalemba pambi. Kuti mwabomfya ifyo fyebo mulembele pamo na cino cine citabo ilyo mulelanshanya amepusho na baeluda. Nga ca kuti amepusho yamo yamukosela ukumfwa, tamulingile ukumfwa insoni ukwipusha aba musambilisha Baibolo nelyo baeluda pa kuti bamwafwe.

Ilyo mulelanshanya amepusho na baeluda, tamulingile ukumona ukuti mufwile ukulefya icasuko nelyo ukulanda ifingi. Mulingile ukubomfya fye amashiwi aya-anguka kabili mufwile ukwasuka fye mu kulungatika mu mashiwi yenu. Ilyo muleasuka, kuti cawama nga mulelandako amashiwi yamo ayaba mwi lembo limo nelyo yabili, ayalanga ukuti ifyo mulelanda e fyo Baibolo isambilisha.

Nga ca kuti baeluda bamona ukuti tamulaishiba sana amasambililo ya mu Baibolo aya kutendekelako, bakapekanya ukuti mukatwalilile ukusambilila pa kuti mukayeshibe bwino, kabili mukaleasuka na mu mashiwi yenu. Lyena ku ntanshi kuti mwafikapo ukubatishiwa.

[Icishibisho kuli baeluda: Ifyebo ifingamwafwa ukwishiba ifya kupituluka mu mepusho na balefwaya ukubatishiwa fili pa mabula 208 ukufika ku 212.]