ICIPUSHO 7
Cinshi Ningacita nga Balempatikisha Ukucita Ubulalelale?
BUSHE KUTI WACITA SHANI?
Tontonkanya pali ici: Tutile papita fye imyeshi ibili apo Mike afwaile Hellen. Lelo Hellen omfwa kwati kale sana aishiba Mike. Balatumishanya amameseji no kulanda pa nshita iikalamba pa foni ukwabula ubwafya! Nomba ilyo bali muli motoka ubushiku ninshi no mweshi naubalika, Mike alefwaya na fimbi ukucila fye pa kulanshanya.
Mu myeshi ibili iyapita, Mike na Hellen bekatana fye mu minwe no kufyompana fye panono. Hellen tafwaya ukucita ificilile apa. Nomba talefwaya ukweba Mike pantu aletiina ati akaleka ukwishishanya nankwe. Mike fye e umulenga ukumfwa ukuti musuma no kuti aliibela. Hellen na kabili aletontonkanya ati, ‘Na kuba, ine na Mike twalitemwana sana . . . ’
Bushe nga naukula uwa kuti utendeke ukwishishanya no muntu kabili ifyacitike kuli Hellen fyakucitikila, kuti wacita shani?
TALA TONTONKANYA!
Ukupanga icupo bupe ubo Lesa apeela ku bantu abaupana. Kanshi ukucita ubulalelale kusaalula ubu ubupe. Caba kwati kubula ica kufwala icisuma no kutendeka ukukolopelako
Cinshi cingacitika nga uli pa mutenge e lyo wasuula amaka Lesa abikako ayatintila ifintu pa nshi? Ifi fine e fyo ciba nga wasuula ifunde Lesa abikako ilitila “Muletaluka ku bulalelale?”—1 Abena Tesalonika 4:3.
Cinshi cicitika nga wasuula ili ifunde? Baibolo itila: “Uucita ubulalelale abembukila umubili wakwe.” (1 Abena Korinti 6:18) Bushe ici cishinka?
Abafwailisha pa fintu basanga ukuti abacaice abengi abacitapo ubulalelale balakwata amafya pamo nga aya.
BALOMFWA UBUBI. Abacaice abengi abacitapo ubulalelale balomfwa ububi pa numa.
TABACETEKELANA. Pa numa ya kucita ubulalelale, balayipusha ukuti: ‘Nani umbi alaalapo nankwe?’
ICITEMWIKO CILAPWA. Abakashana abengi bafwaya umuntu uwingabacingilila, te wa kubabomfya fye. Abalumendo abengi tabatemwa sana umukashana uwa kuti alesumina fye fyonse ifyo bamweba.
Icishinka ni ci: Nga wacita ubulalelale, ninshi uleiseebanya fye no kukowesha umubili obe. (Abena Roma 1:24) Umubili walicindama sana uwa kuti ulekowesha.
Ufwile ukulanga ukuti walishikatala kabili ulingile no “kulataluka ku bulalelale.” (1 Abena Tesalonika 4:3) Ilyo ukoopa nelyo ukuupwa, e lyo ukalaipakisha ukupanga icupo no mwina mobe ukwabula ukumfwa ububi nelyo ukusakamikwa pa mafya ayesa ku balaala no uushili mwina mwabo.—Amapinda 7:22, 23; 1 Abena Korinti 7:3.
AMEPUSHO YA KUTONTONKANYAPO
Bushe umuntu nga alikutemwa sana, kuti afwaya ukukubika mu mafya no kukulenga ukuba no bulanda?
Bushe umuntu uwakutemwa sana kuti akutunka ukonaula bucibusa bobe na Lesa?—AbaHebere 13: 4.