AKABOKOSHI KA KUTWAFWA UKUSAMBILILA 19A
Umumana Wa Mapaalo Ayafuma Kuli Yehova
Moneni amalembo ayalekanalekana ayabomfya ishiwi lya kuti “umumana” ne lya kuti “amenshi” pa kulangilila amapaalo ayafuma kuli Yehova. Nga twabelenga aya amalembo yonse tulatemwa sana ukumona ifyo Yehova atupaala. Atupaala shani?
YOELE 3:18 Ubu ubusesemo bulanda pa kamfukumfuku akafuma mu cifulo ca mushilo ice tempele. Amenshi ya aka kamfukumfuku yalaya mu kutapilila “Umupokapoka umwaba ifimuti fya Munganunshi.” Kanshi Yoele na Esekiele balimwene umumana uwalengele incende umushali nangu fimo mwaba ifya mweo. Umumana bonse babili bamwene wafumine mu ng’anda ya kwa Yehova nelyo mwi tempele.
SEKARIA 14:8 Kasesema Sekaria amwene “amenshi ya mweo” yalefuma mu musumba wa Yerusalemu. Hafu ya aya menshi yaleya kuli bemba ya ku kabanga, nelyo kuli Bemba Yafwa, kabili hafu imbi yaleya kuli Bemba ya ku masamba nelyo Bemba ya Mediterranean. Yerusalemu yali “musumba wa Mfumu iikalamba,” Yehova Lesa. (Mat. 5:35) Ifi Sekaria alumbula uyu musumba fitwibukishako ukuti Yehova akateka isonde lyonse ku ntanshi. Ukutula fye na kale twaishiba ukuti aya menshi balumbula muli ubu busesemo yalangilila ukuti Yehova akapaala amabumba yabili aya bantu aba cishinka mu Paradaise, abakapusuka ubucushi bukalamba e lyo na bakabuushiwa pa numa.
UKUSOKOLOLA 22:1, 2 Umutumwa Yohane alimwene umumana wa mampalanya uwali fye nga ulya Esekiele amwene. Lelo uyu mumana tawafumine mwi tempele, wafumine ku cipuna ca Bufumu ica kwa Yehova. Kanshi nga filya fine icimonwa ca kwa Sekaria cilangilila, ici icimonwa na co cilangilila ifyo imitekele ya kwa Lesa ikalenga abantu bakapaalwe mu Myaka 1,000 iyo Kristu Akalateka.
Na kuba paba fye ubupusano ubunono sana pa fyo imitekele ya kwa Yehova ikalenga abantu bakapaalwe e lyo na pa mapaalo ayo umumana uo Esekiele amwene mu cimonwa wimininako. Aya amapaalo yonse yafuma kuli Yehova kabili yaya ku bantu bonse ababa ne cishinka.
AMALUMBO 46:4 Moneni ukuti ici cikomo cimo fye cilanda pa fintu fibili, pa kupepa na pa mitekele. Ici cikomo cilanda “pa mumana uulenga umusumba wa kwa Lesa,” walasekelela pa kulangilila Ubufumu ne mitekele. Cilanda na pa “cifulo ica lulumbi kabili ica mushilo uko Uwapulamo ekala” pa kulangilila ukupepa kwasanguluka.
Aya amalembo yonse, yalenga twashininkisha ukuti Yehova akapaala abantu ba cishinka mu nshila shibili. Inshila ya kubalilapo, tukanonkelamo umuyayaya mu mitekele yakwe. Inshila yalenga bubili, tukanonkelamo umuyayaya mu kupepa kwasanguluka. Kanshi natutwalilile ukulafwaisha ukupokelela “amenshi ya mweo” ukufuma kuli Yehova na ku Mwana wakwe, e kutila, ifyo babikako pa kuti tukabe no mweo wa muyayaya!—Yer. 2:13; Yoh. 4:10.