ISAMBILILO 4

Ifya Kucita Ilyo Mushilabelenga Ilembo

Mateo 22:41-45

IFILI MULI ILI ISAMBILILO: Mulelenga abalekutika baipekanya ukukutika ilyo mushilabelenga ilembo.

Muletontonkanya pa co mwalabelengela ilembo. Ilyo mushilabelenga ilembo mulelanda ifingalenga abantu balafwaisha ukwishiba icishinka cikalamba icili mwi lembo ico mulefwaya bomfwe.

Mulebika amano na ku mashiwi ayali mu fikomo fimbi mu cipandwa ico mulebelengamo. Nga mwalumbula ilembo, mwalanda no walandile amashiwi nelyo uwalembele ibuuku lya mu Baibolo, mulingile ukulungika.
Mulelanga ukuti ifyo mulelanda fifumine mu Baibolo. Nga mulelanda na bantu abasumina ukuti Lesa eko aba, mulelenga baishiba ukuti Baibolo Cebo ca kwa Lesa. Nga mulecita ifi ninshi mulelanga ukuti mu Baibolo e mwaba amano yene yene.
Mulelenga abalekutika balafwaisha ukwishiba ifyo ilembo lilanda. Muleipusha icipusho ico ilembo lyalayasuka, mulelumbula ubwafya ubo ilembo lingabafwa ukupwisha, nelyo mulelanda ishinte lye funde ilyo ilembo lyalalenga bomfwikishe.

Muletontonkanya pa fyo abalekutika baishibapo pe lyashi nelyo pe lembo. Ilyo mushilabelenga ilembo ilyo abalekutika baishiba, mulelanda ifingalenga batontonkanyapo na kabili, nelyo baumfwikisha icishinka.