IFYO MWINGATENDEKA UKULANSHANYA
ISAMBILILO 6
Ukukanaba no Mwenso
Ishinte lye funde: “Twalishipile pantu Lesa wesu alitukoseshe pa kuti tulande kuli imwe imbila nsuma.”—1 Tes. 2:2.
Ifyo Yesu Acitile
1. Tambeni VIDIO, nelyo belengeni Luka 19:1-7. Lyena lanshanyeni amepusho yakonkapo:
Cinshi nalimo abantu bamo baletiinina ukulanda na Sakeo?
Cinshi calengele Yesu abile imbila nsuma kuli ena?
Finshi Tulesambililako Kuli Yesu?
2. Tulingile ukuba abashipa pa kuti tulebila imbila nsuma kuli bonse ukwabula akapaatulula.
Mulepashanya Yesu
3. Mulecetekela Yehova. Umupashi wa kwa Lesa walengele Yesu aba na maka ya kubila imbila nsuma, kanshi na imwe bene kuti walenga mwaba na maka ya kubila imbila nsuma. (Mat. 10:19, 20; Luka 4:18) Mulelomba Yehova ukuti alelenga mwaba abashipa pa kubila imbila nsuma ku bantu abo muletiina.—Imil. 4:29.
4. Mwilapingula abantu. Kuti twashimunuka pa kulanda na bantu bamo pa mulandu ne fyo balemoneka, ifyo bakwata, nelyo uko bapepa. Lelo muleibukisha ukuti:
Yehova na Yesu e bamona ifyaba mu mitima, ifwe tatumona.
Yehova kuti ayafwa umuntu uuli onse.
5. Muleba abashipa, lelo mulecenjela kabili muleba no mucinshi. (Mat. 10:16) Mwilaumana na bantu. Nga mwamona ukuti umuntu talefwaya ukukutika ku mbila nsuma kabili nalimo ifyabipa kuti fyacitika, mulefumapo fye mu mucinshi.—Amapi. 17:14.