“Mu Kusefya kwa Kucimfya”
UKUSEFYA kwa kucimfya kwali kusefya kwa kucincimusha pa kucimfya abalwani. Umo uwa micinshi yasumbuka uwa Cilye Casumbukisha ica Buteko bwa ciRoma uwabikilwe pali mushika wacimfya wali kumusuminisha ukusefya ukucimfya kwakwe mu kuba no kusefya kwa musango yo ukwa lyonse, ukwa mutengo nga nshi. Umutumwa Paulo alumbwile ukusefya kwa kucimfya imiku ibili mu kulemba kwakwe. Pa ntanshi tatulalanguluka amashiwi yakwe, nangu cibe fyo, esha ukucite cikope ukusefya kwa musango yo. Elenganya amabumba nayatantama mu misebo ilintu balesela panono panono ukukonka mu musebo wa Via Triumphalis kabili ukuninika kwa kushinguluka ukuya kwi tempele lya kwa Jupiter pa mulu wa Capitoline Hill iya ku Roma.
“Icena cisuma ukufuma ku finunkilo fyaleocewa casalangene monse monse mu matempele na mu mbali ya misebo, ukwisusha umwela no kununkila kwa fiko,” e fyalembele uwasambilila James M. Freeman. “Mu kusefya mwali icilye casumbukisha na bana calo bakalamba aba buteko, abo muli ifyo ku kubapo kwabo bacindike kacimfya. Ifya kutapa fya mutengo ifya ku nkondo, ukupala golde, silfere, ifyanso fya musango uuli onse, imendela, ifipe fyalengwa ifya mutengo ifishimonaika, ne cili conse icamwenwe nge cacilapo kucindama napamo kuli kacimfya nelyo ku wacimfiwa, fyasendelwe pa lwalala mu musumba watitikana. Abafungwa ba nkondo na bo bapatikishiwe ukutantama mu kusefya. Mushika, uo umucinshi wa kucimfya wapeelwe, aninine mwi celeta ilya musango waibela no kutintwa kuli bakabalwe bane. Umwingila wakwe wasaamikwe na golde, na tambatamba wakwe mu kuba na maluba. Mu kuboko kwakwe ukwa kulyo aali no musambo wa cimuti, kabili ku kwa kuso inkonto; ilintu pa mpumi yakwe pali amaluba yalukwa bwino aya Delph. Mu kati ka kupunda kwa bashilika no kwaula kwa cintubwingi kacimfya alesendwa ukupula mu misebo ukuya kwi tempele lya kwa Jupiter, uko amalambo yalepeelwa, pa numa ya ico kwali umutebeto wa cintubwingi mwi tempele.”
Paulo abomfeshe ukucimfya kwa kusefya mu nshila ya cilangililo lintu alembele kalata yakwe iya cibili ku Bena Kristu mu Korinti mu mwaka wa 55 uwa Nshita yesu Iyaishibikwa. Asosele ukuti: “Kube ukutootela kuli Lesa, uutulengo kucimfya pe muli Kristu, kabili uulenge cena cisuma ca kumwishiba cimoneke mu mpanga shonse kuli ifwe. Ico tuli icena icinunke cisuma ca kwa Kristu kuli Lesa, mu balepusushiwa na mu baleonaika; ku baleonaika cena ca mfwa icitwala ku mfwa, na ku balepusushiwa cena ca mweo icitwala ku mweo.”—2 Abena Korinti 2:14-16.
Pano Paulo na Bena Kristu bambi abasubwa baimininwako nga banakila baipeelesha kuli Lesa, “muli Kristu.” Balangililwa nga bana baume, abalashi, na bashilika ukukonka mu mulongo wa kwa Yehova no kutungululwa na wene mu kusefya kwa kucimfya mu mbali ya musebo wanunkila. (Moneni Ulupungu lwa kwa Kalinda, July 15, 1990, amabula 10-15.) Uku kubomfya mu nshila ya cilangililo ukwa kusefya kwa musango yo na kabili kulangilila ukuti abo abakaana imbila nsuma iya Bufumu bwa kwa Lesa bakwata fye icilolelo ca mfwa. Lelo ifyo cabe capusanako ku bakonshi basubwa aba kwa Yesu! Bakwata isubilo lye pusukilo ku bumi bwa bumunshifwa ku mulu pamo na Kristu. Kabili ni shani pa lwa banabo ba cishinka, kabili abaipeela kuli Lesa? Bakwata isubilo lya buseko ilya bumi muli paradise pe sonde, apo Lesa “akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka.” (Ukusokolola 21:1-4; Luka 23:43) Bushe uli ulubali lwa ili bumba lya nsansa?
Icikope capusanako nacilangililwa pa Abena Kolose 2:15, apo Paulo alembele ukuti: “[Lesa] afuulile [amakamfulumende na mabulashi, NW] no kubabika ica kutamba pa mbilibili, no kubacimfisha kuli ico.” Pano amakamfulumende na balashi ba bulwani pe samba lya kwa Satana Ciwa bacitwe cikope nga bankole na bafungwa mu kusefya kwa kucimfya. Yehova Kacimfya abafuula no kubasha ubwamba no kubalangisha pa lwalala nga bacimfiwa. Bacimfiwa “kuli ico,” uko e kuti ‘icimuti ca kucushiwilwapo’ ica kwa Yesu. Imfwa yakwe pa cimuti yapayenye icishinte ca kufumyapo “iciikatilo ca mu fipope” (icipingo ce Funde) no kucilenga ukucitikako ku Bena Kristu ukulubulwa ukufuma mu busha bwa maka ya busatana aya mfifi. (Abena Kolose 2:13, 14) Ifyo tulingile ukutasha ubuntungwa bwa musango yo ubwa Bwina Kristu!