Ukusalanganya Icena Cisuma Ica Kwishiba Kwa Kwa Lesa

“Kube ukutootela kuli Lesa, uutulengo kucimfya pe muli Kristu, kabili uulenge cena cisuma ca kumwishiba cimoneke mu mpanga shonse kuli ifwe.”—2 ABENA KORINTI 2:14.

1. Cena nshi icisuma tulelanshanya pano, kabili ni shani fintu ishuko lya kucisalanganya lili no kumonwa?

NUNSHA, nunsha! M-m-m-m! Bushe ulanunsha icena canunkila? Pano tatulelosha ku cena cisuma ica maluba yalebalula lelo, mu cifulo ca ico, ku cena cisuma ica mampalanya icilefuma ku fyalembwa fyawamisha pe sonde. Ifi fyalembwa tafili ni fyo ifituntuka ku bantu ba fye lelo fyaba cisansangu capuutwamo ica mampalanya kuli Uyo na kabili uwapangile amaluba ya cena cisuma ayo ayasaamika isonde. Ishuko lya kusalanganya ici cena cisuma ica kwishiba kwa kwa Lesa cili cuma cikalamba. Ee, cili mulimo uuli ukucilisha uwa mutengo—te wa bonse, tawakanwa no mutundu wa muntu mu cinkumbawile.

2. Ni lilali abasambi ba kwa Kristu batendeke ukusalanganya icena cisuma ica mampalanya, kabili mu kuba na ca kufumamo nshi?

² Ici cuma caumo mutengo capeelwe ku basambi ba kwa Kristu lintu balangishiwe ku mulimo wacincila uwa kuli Yehova Lesa pa bushiku bwa Pentekoste mu mwaka wa 33 uwa Nshita yesu Iyaishibikwa. Ukwisulamo no mupashi wa mushilo, batendeke ukusalanganya icena cisuma ica mampalanya, ukukolobonda mu “fikalamba fya kwa Lesa.” (Imilimo 2:1-4, 11) Ukupitila muli wene icena cisuma ica kwishiba kwa kwa Lesa cali no kuya kuli bambi, te ku baYuda ba cifyalilwa beka abasembululwa lelo na kabili ku nko, imikowa, abantu na bantu, ne ndimi abashasembululwa. (Imilimo 10:34, 35) Abasambi ba cine baloleshe pali uyu mulimo ngo wakwatisho mutengo ukucila pa cuma ca ku mubili conse ico abantu baitulaikile.

3. Kufika ku cipimo nshi umulimo wa kusalanganya icena cisuma ica kwishiba kwa kwa Lesa ulecitwa, kabili cipusho nshi tulekabila ukuipusha fwe bene?

³ Ilelo, umulimo wacindamisha uwa kusalanganya icena cisuma ica kwishiba kwa kwa Lesa ulecitwa mu kusalala kwe sonde—pa cipimo cakulisha ukucila na kale lyonse mu lyashi lya buntunse. Ubimbamo ukucitilo bunte ku mutundu wa muntu onse pa lwa Bufumu bwaimikwa nomba ubwa kwa Lesa pe samba lya Mfumu yakwe iyasontwa, Yesu Kristu. (Mateo 6:10; Imilimo 1:8) Bushe ulolesha pa mulimo wa kubilisha Imfumu no Bufumu bwakwe nge cuma icishingapimwa umutengo? Yesu Kristu, uwaluminishe ukushimikila kwa mbila nsuma iya ubo Bufumu, atesekeshe cene muli ilya nshila, ukwimika icipasho.—Mateo 4:17; 6:19-21.

Ukupeele Nshila Ifungo Lisuma ilya Kusefya kwa Kucimfya

4. Ukulingana na 2 Abena Korinti 2:14, ni shani fintu Lesa nomba aletungulula ababomfi bakwe pe sonde, kabili ni ku cibelesho nshi ica pa kale amashiwi ya kwa Paulo yaloshako?

⁴ Mulandu nshi ukubombela Lesa cintu cimo ica kukatamika? Umulandu umo uli wa kuti nelyo fye ni nomba abo ababombela Yehova balikwata ishuko likalamba ilya kutungululwa na Lesa mu kusefya kwa kucimfya ukwacindamisha. Ukulingana na New International Version, 2 Abena Korinti 2:14 atila: “Kube ukutootela kuli Lesa, uututungulula lyonse mu kusefya kwa kucimfya muli Kristu kabili ukupitila muli ifwe alananya konse konse icena cisuma ica kwishiba wene [“alenga ukwishiba kwesu wene ukwanana ukupulinkane calo conse ukupala ifungo lyawama!” Phillips].” Ayo mashiwi ya mutumwa Paulo yamoneka ukulosha ku cibelesho ca pa kale ica kukwata ukusefya kwa kucimfya.a

5, 6. (a) Cinshi cacitike mu kati ka kusefya kwa kucimfya ukwa pa kale ukwa ciRoma, kabili cinshi cintu icena canunkila calangilile ku balekanalekana? (b) Kubomba nshi ukwa ku mupashi ukwa cilangililo ca pali 2 Abena Korinti 2:14-16?

⁵ Mu nshiku sha ripabuliki ya ciRoma, umo uwa mucinshi wasumbukisha untu Icilye Casumbukisha ica Buteko cali no kupeela mushika wacimfya wali kusuminisha wene ukusefya ukucimfya kwakwe pamo no kusefya kwa kucimfya ukwa mutengo. Ukusefya kwa ciRoma kwaselele panono panono ukukonka umusebo wa Via Triumphalis kabili ukuninika kwa kushinguluka ukuya kwi tempele lya kwa Jupiter pa mulu wa Capitoline Hill. Ishamfumu, bacilolo, na bamushika abasendelwe bunkole mu nkondo, na bana babo na babomfi babo, batantamikwe mu minyololo, ilingi line ubwamba, ku kucendwa kwabo no kulengwe nsoni.

⁶ Ilyo ukusefya kwapitile ukupula mu musumba wa ciRoma, abantu bapoosele amaluba ku cinso ce celeta lya ucimfishe, kabili ukoca ifya cushi ce fungo kwapeele inshila yonse ifungo lisuma. Ici cena canunkila calangilile umucinshi no bumi bwacilapo kukwato mutelelwe ku bashilika bacimfya. Lelo calangilile imfwa ku bankole babulo kwelelwa abali no kuputunkanishiwa pa mpela ya kusefya. Ici cisanikila pa kubomfya kwa ku mupashi ukwa kwa Paulo ukwa cilangililo ca pali 2 Abena Korinti 2:14-16. Cilya cikope citambika Paulo na Bena Kristu banankwe nga batekwa ba kwa Lesa, “muli Kristu,” bonse ukukonka mu kusefya kwa kwa Lesa ilyacimfya kabili ukutungululwa na Wene mu kusefya kwa kucimfya ukwacindamisha ukukonka inshila ye fungo lisuma.

Icena Cisuma ica Bumi Nelyo Ukununka kwa Mfwa

7, 8. (a) Ni shani fintu Inte sha kwa Yehova balesalanganya icena canunkila ica kwishiba kwa kwa Lesa? (b) Ilyo Inte shilesalanganya icena cisuma ica mampalanya, kwankulako nshi ukwa abo abalepusuka? (c) Kwankulako nshi ukufuma kuli abo abaleonaika?

⁷ Pa kwananya ukufiko kutali ukuli konse icine ca Baibolo ukukuma ku Bufumu bwa kwa Lesa pe samba lya kwa Kristu, Inte sha kwa Yehova balesalanganya, balelangisha, no kulengo kumoneka ukuli konse icena canunkila ica kwishiba kwa kwa Lesa wa luse uo icine cakwe cabalenga abantungwa ukufuma ku butotelo bwa bufi. Benda nabatantama mu kucimfya mu mulimo wa kwa Yehova. Ifya kuninika fyabo ifya mulimo pamo nge Nte sha wene ne Mfumu yakwe fyapala icushi ca fyanunke cisuma ica kutemuna kuli Yehova. Muli ifyo, kuti twatesekesha cintu umutumwa apilibwile lintu atile: “Tuli icena icinunke cisuma ca kwa Kristu kuli Lesa, mu balepusushiwa na mu baleonaika; ku baleonaika cena ca mfwa icitwala ku mfwa, na ku balepusushiwa cena ca mweo icitwala ku mweo [“icena cisuma icakatama icileta ubumi,” The New English Bible; “icena cisuma ica kupembesula ica bumi bwine,” Phillips].”—2 Abena Korinti 2:15, 16.

⁸ Abantu bafumaluka aba mibele yapale mpaanga baleluka ukununkila kwa kwishiba kwa kwa Yehova nga fintu kusalanganishiwa ne Nte shakwe. Ku bantu ba musango uyo umulimo wa bunte walikwata ukununka kwa butuntulu no bumi, ukwa cine ca mweo, icipeelo bumi. Balapeelo kutootela kuli Yehova ne Mfumu yakwe, uo ukusefya kwakwe ukwa kucimfya bailundako, kabili mu kupongomoka babilikisho kuti: “Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga.” (Ukusokolola 7:10) Balapeema umwela wa cine ca Bufumu, uuli cena cisuma ica kupembesula ica bumi icitungulula ku bumi. Lelo Satana ne fibanda fyakwe balipasula amaka ya kununsha aya abo abakonenena ku butotelo bwa bufi, ica kuti bekatilile imyona yabo kabili mu misuula ukukaana icine. Ku “baleonaika,” icine na bacikwata aba busumino balasalanganya icena ca mfwa icitungulula ku mfwa. Nelyo nga fintu New International Version icibika ukuti: “Ku o tuli kununka kwa mfwa.” Ubupilibulo bwa kwa Phillips bupilibulo kuti: “Ku wa kulekelesha cimoneka ukupala ukununka kwa mfwa ukwe shamo.”

9. Cipusho nshi Paulo nomba aipusha, kabili ni shani wingasuka, kabili mulandu nshi?

⁹ “Kabili ni ani uwingafikapo kuli ifi fintu?” e fyaipusha lyene umutumwa. (2 Abena Korinti 2:16) Ico cili kusoso kuti, “kabili ni ani uwingaba uwafikapo ku mulimo wapala uyu?” (The Jerusalem Bible) “Kabili ku mibombele ya musango yu pamo ngo yu ni ani ali uwakampuka?” (Weymouth) Icasuko ca mu Malembo ca kuti: Inte sha kwa Yehova! Mulandu nshi? Pantu ni beka fye abaipeela abali abafumacumi, abafumaluka, kabili abashifwaya ubunonshi bwa kaso kabili abalanda icine, mu kutelela kabili ukwabulo kusuminishanya no butotelo bwa bufi, ebali abafikapo kuli uyu mulimo wa kwananya icena cisuma ica kwishiba kwa kwa Lesa.—Abena Kolose 1:3-6, 13; 2 Timote 2:15.

10. Mulandu nshi bashibutotelo tababa abafikapo ku mulimo wa kusalanganya icena cisuma ica kwishiba kwa kwa Lesa?

¹⁰ Bashibutotelo ba Kristendomu, abafwaya ukwiminina kusuma ne ci calo, balafilwa ukuba abafikapo kabili abakampuka kuli uyu mulimo wabula akaso. Mulandu nshi? Pantu balafilwa ukukumanisha icifwaikwa calangililwa mu bulondoloshi bwa kwa Paulo ukuti: “Tatuli nga ʼba cinabwingi, abenshe cebo ca kwa Lesa ku kumwenamo; lelo nga ʼba bufumacumi, nga ʼba kwa Lesa, tulandila muli Kristu ku cinso ca kwa Lesa.” (2 Abena Korinti 2:17) Nelyo nga fintu New International Version icibika: “Ukukanapala abafule fyo, tatwensha icebo ca kwa Lesa ku kumwenamo. Mu kucilana, muli Kristu tulanda ku cinso ca kwa Lesa mu kuba no kufumaluka, ukupala abantu abatumwa ukufuma kuli Lesa.”

11, 12. (a) Mulandu nshi Inte tabali “abenshe cebo ca kwa Lesa ku kumwenamo” pa mulandu wa kupokelela ubupe? (b) Mu kucilana no bupilibulo bwasundulwa ubwa buKristu bwashitwa na bengi, cinshi Inte sha kwa Yehova batambika?

¹¹ Inte sha kwa Yehova balitumwa ukufuma kuli Lesa, kabili balebomba umulimo wabo uwa kucitilo bunte pe samba lya mimwene ya kwa Lesa. Ilintu bapayanishisha abantu balesekelela ifitabo fyakatama ne mpapulo shimbi ishilondolola Icebo ca kwa Lesa kabili bapokelela ubupe bwa kuitemenwa ku mulimo wa kushimikilo Bufumu uwa mu kusalala kwa calo, icibelesho ca musango uyo tacili kwensha kwa bunonshi nelyo ukusundula Icebo ca kwa Lesa. Mu cishinka, ubupe bwa musango uyo bwaba fye kwafwilisha ukulola ku kwananishiwa kwa kwishiba kwa kwa Lesa kuli bambi.

¹² Abengi nga nshi ilelo, mu kwishiba nelyo mu kukanaishiba, balishita ubupilibulo bwasundulwa ubwa buKristu, pantu bwalinga ukufwaisha kwabo ukwa kaso kabili tabumfyenenkesha umusango wabo uwa bumi. Basumina ukuti Lesa alabapokelela pa mulandu wa kutunga kwabo ukwa kuti balikwata ukutemwa kuli wene mu mitima yabo. Nangu cibe fyo, lintu Icebo ca kwa Lesa calangwa ukukangana ne fisumino fyabo ne myendele, balanyonganya Amalembo pa kuti basumbule amatontonkanyo ya pa lwabo ukucila pa kuumfwikisha kwalungama ukwa mu Baibolo. (Mateo 15:8, 9; 2 Petro 3:16) Lelo Inte sha kwa Yehova balatambika icine casanguluka, icishasundulwa ukufuma muli Baibolo, muli ifyo ukuletako icena canunkila icapokelelwa kuli Lesa na kuli bakapepa bakwe aba cine. Muli iyo nshila balatamfya ifishilano fyonse ifya butotelo ne fya kucilikila ku kukwata ukwishiba kwa cine ukwa kwa Lesa.

13. Ni bani, pa mbali ya Bena Kristu basubwa, baba mu kusefya kwa kucimfya ukwa kwa Lesa, kabili cinshi balecita ukuli konse uko baya?

¹³ Mu cine cine, ukuba mu kusefya kwa kucimfya ukwa kwa Lesa pamo na Kristu cili lishuko lishingalinganishiwako ilipakishiwa te ku Bena Kristu basubwa beka lelo ne “bumba likalamba” ilya “mpaanga shimbi” nelyo fye nomba, pantu ukucimfya kwa Bufumu kuli mupepi. (Ukusokolola 7:4, 9; Yohane 10:16) Ilyo tuleenekela ukucimfya kwalundwako ukwa Mfumu yesu iya kucimfya, ukuli konse uko twaya tulasalanganya ukwishiba kupeelo bumi ukwa kwa Lesa ukupala ifungo lisuma, nelyo icushi ca fyanunke cisuma icaumo mutengo, kuli abo bantu imitima yabo ilefuluka icine no bulungami. Mwandi lishuko kuli abo abali abafikapo kuli uyu mulimo ukalamba!—Yohane 17:3; Abena Kolose 3:16, 17.

Ukupeelwo Bulashi ku Kuba aba Kupeela Ifungo Lisuma aba Buntunse

14. Mulandu nshi abo abasalanganya icena cisuma ica kwishiba kwa kwa Lesa tabakabila satefiketi wa kupeelwo bulashi ukufuma ku bantu?

¹⁴ Lelo bushe abo abasalanganya icena cisuma ica kwishiba kwa kwa Lesa no Bufumu bwakwe balakabila diploma nelyo satefiketi wa kupeelwo bulashi ukufuma ku bantu? Iyo! Twalitumwa kale kale, nelyo ukusontwa, nge Nte kuli Umo Uwapulishamo uwa kubumbwa konse. E ico, tatukabila ukushimunuka ukuya mwi bala ukwananya icena cisuma ica mbila nsuma iya Bufumu bwa kwa Lesa. Sungeni mu muntontonkanya ukuti Yehova alatutungulula. Ubutumikishi bwa kwa Yesu bwapwishishiwe mu cinso ca “fikansa fya babembu.” (AbaHebere 12:3) Lelo, icalembwa ca kwa Yesu ica mibombele ya mwi bala, nga fintu cisangwa muli Baibolo, nalyo line ciminine ca cine, kabili umulimo wakwe mwi bala ulanda mu kutasha wene no kupaasha mu kwafwilisha ukuba kwakwe umutumikishi wa cine uwa kwa Yehova Lesa.

15. Ni shani fintu umutumwa Paulo alangile ukuti Abena Kristu ba cine tabakabila “bakalata wa kutasha”?

¹⁵ Umutumwa Paulo akumenye imibele imo ine iya kusonsomba mu kasuba kakwe pa kupeela uku kupaasha ukuti: “Bushe natutendeka kabili ukuitasha fwe bene? Bushe tukabila bakalata wa kutasha aba kuleta kuli imwe atemwa aba kufuma kuli imwe, filya bamo bakabila, mwa? Kalata wesu ni ʼmwe, uwalembwa mu mitima yesu, uwaishibwa no kubelengwa ku bantu bonse; kabili mwamoneko kuti ni ʼmwe kalata wa kwa Kristu uwapyungilwe kuli ifwe, uwalembwa te kuli inki lelo ku Mupashi wa kwa Lesa wa mweo, te pa fipapatu fya mabwe lelo pa fipapatu fya mitima ya buntunse.”—2 Abena Korinti 3:1-3.

16. Musango nshi uwa kalata Inte sha kwa Yehova batambika ngo bushininkisho bwa fyalembwa fya kuloshako ubwa kuti ubutumikishi bwabo bwafuma kuli Lesa?

¹⁶ Amabulashi ya ku calo tabapokelela ukutumwa kwesu nge Nte sha kwa Yehova. Lelo lekeni umulimo wesu uwa kusalanganya icena cisuma ica kwishiba kwa kwa Lesa uilandile uwine weka! Uyu mulimo te kuti ufuutwe, nangu cingati abantu bamo balakaana ukubelenga ubu bushininkisho bwa fyalembwa fya kuloshako ubwa butumikishi bwesu. Bashibutotelo batambika ifyalembwa fyabo ifya kupeelwa amasatefiketi ukufuma ku mabumba yateka aya bashibutotelo. Ifya musango uyo, nangu cibe fyo, mapepala fye, icebo ca muntu. Inte sha kwa Yehova, pa mbali ya kwambula ukwafwilisha ukufuma mu Cebo ca kwa Lesa, beminina nge fishininkisho fyalembwa ifya kulosha mu mubili no mulopa. Ibumba likalamba ilya mpaanga shimbi abafikwapo ne mbila nsuma iya Bufumu na bo bene balilonganikwa ku kwa kulyo kwa Mfumu ya kwa Yehova. (Mateo 25:33, 34) Aba bonse bali ni kalata wesu uwa kutasha, kalata untu ifwe pamo nge Nte sha kwa Yehova tusenda ukuli konse pa mitima yesu ne mintontonkanya kabili kuti twalangisha mu kuba no kucetekela. Abo abeminina kuli bumulopwe bwa mu kubumbwa konse ubwa kwa Lesa kabili ababuula ulubali mu kubombela Lesa capamo ne Nte sha kwa Yehova bali abene beka icalembwa ca kutasha icishingafyuka ukubelengwa no kwishibikwa ku bantu bonse.

17. Ni shani fintu “kalata wa kwa Kristu” uwesu alembwa, kabili mulandu nshi Paulo asosela ukuti alembwa mu mitima yesu?

¹⁷ Kwena, ici cilakalifya bashibutoteshi ba bufi no kubalenga aba kafindwe lintu bacibelenga. Nangu cibe fyo, ibumba likalamba ilileingilishiwako ilya mpaanga shimbi bali ni kalata wa kutasha ukufuma kuli Yesu Kristu, Kacema Musuma, uulebomfya bonse aba Nte sha kwa Yehova mu mulimo wakwe uwa kutumikila. Tuli cilembelo, nelyo icibombelo ca buntunse, cintu abomfya pa kulemba uyu kalata. Uyu kalata talembwa muli inki iingafuutwa, lelo alembelwa ku kabili mu kuba na maka yabomba, nelyo umupashi, aya kwa Lesa, ayabomba muli ifwe. Tacili nga fintu cali mu mulandu wa kwa Mose lintu amalango ya Mafunde Ikumi yalembelwe no munwe wa kwa Lesa pa fipapatu fibili ifya libwe. Kalata wesu alembwa pa fipapatu fya ku mubili ifya mitima ya buntunse, apantu ubutumikishi bwesu ubwa ku mupashi buletako ukwaluka kwa muntontonkanya no mutima muli bakapokelela ba mbila nsuma iya cena cisuma.

18. Ca kufumamo nshi cilenga bakapokelela ba mbila nsuma kalata wa kutasha?

¹⁸ Umulimo wesu mu kuba ne Cebo ca kwa Lesa walicita ukwebekesha pali bakapokelela batesekesha aba mbila nsuma kabili walileta ukwaluka kukalamba. Ukupingulapo kwabo ku kubombela Lesa kwashininkisha ukukanaba kwiminina kwa kukuntwa kwa kupumikisha pa mulandu wa kufwaisha kumo ukukumbwamo muli bene kuli kabila uukuntukilwa. Ukucila, kwimininako ukwaluka kubelelela ukwa bumi bwabo ukwashimpwa pa cine calengama nga nshi ica Baibolo wa Mushilo. Ukutemwa kwa kuli Lesa wa cine, Yehova, kulabakunta ‘ukufula ubuntu bwa kale, no lunkumbwa lwa longolo no kufwala ubuntu bupya,’ ubulangisha “ifisabo fya Mupashi.” (Abena Efese 4:20-24, NW; Abena Galatia 5:22, 23) Ica kufumamo, kanshi, cibalenga ukuba kalata wa kutasha. Ilalanda mu kuumfwika kwacilapo ukucila kalata uuli onse uwalembwa na ifwe nelyo no kuteyanya kumoneka ukuli konse ukwingatutuma.

19. Ni shani fintu Paulo alondolola imilingo ya “bakapyunga wa cipingo cipya,” kabili kusonga nshi umulimo wabo wakwata pe bumba likalamba?

¹⁹ Pali 2 Abena Korinti 3:4-6 Paulo atwalilila ukuti: “Awe e kuyanga twakwatila muli Kristu ukwa kuli Lesa. Te kutila tuli abafikapo fwe bene ukulinge cintu ukuti cafuma kuli ifwe fwe bene; lelo ukufikapo kwesu kwafuma kuli Lesa; uo kabili atufishishepo ku kuba bakapyunga wa cipingo cipya.” Nangu cingati beka fye abo aba mu bashalapo basubwa e “bakapyunga wa cipingo cipya,” umulimo wabo walikwata ukusonga pe bumba likalamba ilya mpaanga shimbi, kabili ukambukila na kabili impendwa shishingapendwa isha mpaanga shimbi isha musango uyo abacili no kulonganikwa. Uku e kuyanga uko bonse aba Nte sha kwa Yehova bakwata ukupitila muli Kristu Yesu ukulola kuli Yehova Lesa. Abashalapo mu buseko balakoselesha ibumba likalamba ilya mpaanga shimbi ukwakana no mutima onse mu butumikishi bwa ‘kulemba makalata’ ubo Yesu Kristu asobele pali Mateo 24:14 na Mateo 28:19, 20.

20. (a) Cinshi lipoti wa Yearbook ilangilila pa lwa abo abalesalanganya icena cisuma ica kwishiba kwa kwa Lesa? (b) Cinshi ifwe bonse twingasosa pa lwa milingo yesu ku butumikishi bwa kulemba amakalata?

²⁰ Ico e cintu bacita, nga fintu cili camwenekeshiwa ukufuma kuli lipoti wa 1990 Yearbook umo Inte sha kwa Yehova balangwa balesalanganya icena cisuma ica kwishiba kwa kwa Lesa mu fyalo 212. Bafika ku mpendwa ya bakasabankanya bacincila ukucila pali 3,787,000, kabili umwaka wapwile weka babombele mupepi na maawala 835,000,000 mu kushimikila iyi mbila nsuma iya Bufumu. Pa Mulalilo wa kwa Shikulu umwaka wapwile, 9,479,064 balisangilweko. Bonse abashalapo basubwa ne filundwa fye bumba likalamba ilya mpaanga shimbi kuti batila: “Ukufikapo kwesu kwafuma kuli Lesa.” Nelyo nga fintu The Jerusalem Bible icibika mu mashiwi ukuti: “Imilingo yesu yonse yafuma kuli Lesa.”

21. Cinshi ifwe bonse tulingile ukulacita, kabili mulandu nshi?

²¹ E ico, ananyeni icena canunkila, icipeelo bumi ica kwishiba kwa kwa Lesa mu cifulo icili conse! Lengeni umwela wa cifulo ca kubombelamo ica cilonganino cenu uwafina ne cena cisuma ica kwishiba kwa kwa Yehova. Lyene, pamo nga Mushika wa kucimfya uwa teokratiki, akamutungulula muli uku kusefya kwakwe ukwacimfya ilyo Inte shakwe shonse baya ku ntanshi muli ubu butumikishi bwa kasuba ka lelo ubwa bukata!

[Amafutunoti]

Kuti Waasuka Shani?

◻ Cilangililo nshi Paulo abomfya pali 2 Abena Korinti 2:14-16?

◻ Kusonga nshi pali bambi ukwa kusalanganya icena cisuma ica kwishiba kwa kwa Lesa?

◻ Ni bani beka bali abafikapo kuli uyu mulimo, kabili mulandu nshi?

◻ Mulandu nshi aba kupeela ifungo lisuma aba buntunse tabakabila amakalata yalembwa ku minwe aya kutasha ku mulimo wabo?