Ululimi Lwine Lwine Lwaikatanya Ibumba Likalamba Ilya Bakapepa

ULULIMI lwine lwine ulwapeelwa na Lesa lwaba maka ku kwikatana kwa Bwina Kristu. Ubushinino bwa ico bwalimonekeshe kuli bonse abasangilwe kwi bungano lya Nte sha kwa Yehova ilyacitilwe mu West Berlin ukufuma pa Cibili ukupulinkana ukufiko pali Cisano, pa July 24 ukufika pa 27, 1990, apantu Inte ukufuma ku fyalo 64 balisangilweko.

Lintu Amabungano ya Citungu iya “Kuipeelesha kwa Bukapepa” yacitilwe mu Poland mu kati ka lusuba lwa 1989, amakana ya makombe balishile ukufuma ku Russia na Czechoslovakia, lelo myanda fye inono ebasangilweko ukufuma ku East Germany. Fintu imibele ya calo mu mapolitiki yayaluka ukutula ilyo! Ino nshita, amakombe yatunganishiwa 30,000 ukufuma ku East Germany bakumene ne Nte mu Olympia Stadium mu West Berlin. Ibungano lyali lya musango wa myanda ya mabungano yacitilwe mu mbali shimbi isha calo mu cinkambawile pali Cine ukupulinkana ukufika pa Mulungu.

Mu lyashi lyakwe ilya kwiswila ilya kusengela pali Cibili, ceyamani alondolwele ulubali ulo amabungano yabomba ukutula mu 1919 mu kwafwilisha Inte sha kwa Yehova ukucita ukulunduluka mu kulanda ululimi lwine lwine. Ili bungano mu kupalako lyali no kwaafwa bonse abali mwi bumba ku kuwamyako mu kubombesha kwabo ku kulanda ululimi lwine lwine no kwikalilila kuli lwene. Acinkwileko amakombe ukuti ku misakwile yabo ine ne myendele, abantu ba kwa Yehova balangisha ukulunduluka uko bacita mu kulanda ululimi lwine lwine.

“Ululimi Lwine Lwine ku Nko Shonse”

Mu kulinga, ilyashi likalamba ilye bungano lyapeele umutwe wa lyashi uli pa mulu. Washimpilwe pali Sefania 3:9, apo Lesa alaile ukuti: “Lyene nkaalulo lulimi lwa bantu na bantu ukubo lulimi lwine lwine, ukuti bonse bene balilile kwi shina lya kwa Yehova, no kumubombela no mutima umo.” Ululimi lwine lwine lubimbamo ukumfwikisha kwalinga no kutesekesha kwa cine pa lwa kwa Lesa ne mifwaile yakwe. Ni Yehova eka fye ewingapayanya ici ukupitila mu mupashi wakwe uwa mushilo. Ukutemwa kwa cine kulingile ukuba e kukunta kwa kusambilila ululimi lwine lwine, lumo ulwalubuka ukufuma ku kukanasanguluka konse ukwa mibele.

Mu kulundapo, ukulanda ululimi lwine lwine takwaba fye kubomfya ubutala bwa mashiwi yamo. Ukucila, inshila yesu iya bumi ifwile ukuba mu kumfwana ne cifuma pa milomo yesu. Na kuba, iciunda cesu ice shiwi, inumbwilo sha cinso, no kubomfya kwa mubili na fyo fine fyalicindama, pantu fibelebesha cintu twaba mu kati. Pa kutwalilila no lulimi lwine lwine ululetanunuka, tufwile ukukwata programu we sambililo lyakonkesha kabili lyonse ukusangwa ku kulongana kwa cilonganino konse.

Ukusambilila Ululimi Lwine Lwine

Nga fintu ilyashi pali Cibili icungulo lyaebekeshe, ukusambilila ululimi lwine lwine kupilibula “Ukulunduluka Ukufuma ku fya Kutendekelako Ukufika ku Kukosoka.” Ukukula kulakabilwa nga ca kuti tuli no kutwalilila ukukula lwa ku mupashi. Ici cipilibula ukushukila ukupayanya konse ukwa kulunduluka kwa ku mupashi no kubomfya ifishinte fya Baibolo lyonse.

Pa kuba abafikapo mu lulimi lwine lwine, tufwile ukuba “Basambilishiwa Kuli Yehova,” umutwe wa kukonkana pali Cine ulucelo. Kalanda wa kubalilapo alangilile fintu ici ‘Calangililwa kuli Yesu Kristu.’ Ukuti Yesu asambilishiwe kuli Yehova calimonekeshe ukufuma ku mashiwi yakwe ne ncitilo. E co tulefwaya ukumupashanya mu fintu asambilishe. Kabili nga fintu Yesu lyonse anakile ku kufwaya kwa kwa Wishi, e fyo na ifwe tufwile ukucita.

Bakalanda bakonkelepo batatu balangilile fintu Yehova asambilisha ukupitila mu kulongana na mabungano. Tulamwenamo mu kulongana kwa cilonganino konse kusano kabili tatulingile ukulekelesha ukuli konse ukwa kwene. Ukulongana kumo na kumo kwaliba ukwakatama ku kuya pa ntanshi kwesu ukwa ku mupashi. Yehova na kabili atusambilisha ukupitila mu maprogramu ya kulongana kwesu ukwa muputule, ibungano lya citungu, na maprogramu ya kulongana kwa bushiku bwaibela. Pa kumwenamo ukufuma kuli fyonse ifi, tufwile ukukutika mu kusakamanisha kabili lyene ukubika mu kubomba ifyo tulesambilila.

Uku kukonkana kwakonkelwepo ne lyashi “Ukupeele Lambo kwi Sambililo lya pa Lobe.” Pa kusanga inshita kuli kwene, tufwile ukumfwila ukufunda pa Abena Efese 5:15, 16 ku kulubule nshita ukufuma ku fintu fishacindamisha.

Ubuyo bwabamo amano ubwa kusambilila kwesu ululimi lwine lwine kuipeela no lubatisho. Ici cine calyebekeshiwe mu lyashi “Ulubatisho lwa Abo Abalesambilila Ululimi Lwine Lwine.” Ulu lulimi luletungulula abengi ku kuipeela no lubatisho. Nangu cibe fyo, umo pa numa ya ico afwile ukutwalilila ukukonka icipasho ca kwa Yesu pa kushimikila mu kupimpa imbila nsuma, ukufwala ubuntu bupya, no kuisunga uwapaatukako ukufuma ku calo.

Ifya Kulya Fyakosa Ifya ku Mupashi

Abakubungana na kabili balisekelele pa kupokelela ifya kulya fyakosa ifya ku mupashi ifyashimpilwe pa kufikilishiwa kwa filangililo fya busesemo. Pali Cine icungulo, amalyashi yabili yashimpilwe pa mutwe wa lyashi uwafumishiwe mu busesemo bwa kwa Esekiele. Ilya kubalilapo, “Iceleta lya kwa Yehova ilya mu Mulu Lili pa Kusela,” lyalondolwele ica kwensha ca mu mulu ica kupuutamo mwenso icakulisha, ica bukata, cilesela pa lubilo lwa kubyasha kwa mulilo wa nkuba. Lyacite cikope ukuteyanya kwa mu mulu ukwa kwa Yehova, ilyo Lesa ensha pa kuti mu kubamo kutemwa alabelesha ubulashi pali lyene, kabili alalibomfya ku kupwishishisha imifwaile yakwe. Esekiele acite cikope abashalapo basubwa no mupashi, ukucilisha ukutula 1919. Ukutula 1935 ukucilisha balilundwako ne “bumba likalamba.”—Ukusokolola 7:9.

Ilyashi lyakonkelepo lyali no mutwe “Endela Pamo no kuteyanya Kumoneka.” Takwaba kutwishika kwa kuti ukuteyanya kumoneka ukwa kwa Lesa kuleendela pamo no kuteyanya kwapala iceleta lya mu mulu. Nge fyacitile Esekiele, ababomfi ba kwa Yehova ilelo mu cumfwila bafwile ukufikilisha ukutumwa kwabo ukwa busesemo ukwabulo kusakamana ukukanayangwako, ukupumya, nelyo fye ukukaanya. Ukwendela pamo kutungulula ku mapaalo ayengi nomba no bumi bwa muyayaya mu calo cipya ica kwa Lesa.

Pali Cisano ulucelo, ifya kulya fyakosa ifya ku mupashi fyalipayanishiwe na kabili ukupitila mu malyashi yatatu ayashimpilwe pali Esaya icipandwa 28. Ilya kubalilapo muli aya lyalangishe mu nsoselo sha maka ukuti bacakolwa ba ku mupashi aba kwa Israele wa pa kale na Yuda bacitile cikope bacakolwa ba ku mupashi aba kwa Kristendomu. Kabili nga fintu fye aba kale bakumenye amapingushi yashasenaminwa aya kwa Yehova, e fikakumanya na bo aba mu Kristendomu.

Ilyashi lyakonkelepo, ilyali no mutwe “Icubo Cabo—Bufi!,” lyakwetemo ukusoka kwakosa: Pamo fye nga fintu ukucetekela kwa kwa Yuda wa pa kale muli Egupti kwashininkishe ukuba icubo ca fye, e fikaba no kulundana kwa kwa Kristendomu na maka ya bupolitiki aya kasuba ka lelo. Ilyashi lya citatu pali Esaya icipandwa 28, “Twalilileni Ukusoka Ulwa Mulimo wa kwa Yehova Umbi Umbi,” lyalungatikwe ku bantu ba kwa Lesa. Cintu Yehova akacita kuli Kristendomu mu kulinga citwa cimbi cimbi, pa kuti cikesa ngo kupumikisha kwa kupapa pali wene. Ilelo, Yehova aba cilongwe ca bukata kwi bumba linono ilya Bena Kristu basubwa na ku “mpanga shimbi” mupepi na mamilioni yane. (Yohane 10:16) Kalanda asondwelele mu kuba na mashiwi ya kukumbamo: “Shi ukupimpa kwesu, umupampamina, na bucishinka fisangwile kwi lumbo lya muyayaya ilya kwa Lesa wesu, Yehova.

Ukulanda Ululimi Lwine Lwine

Kupilubula Ukulangisha Ukutemwa kwa Bumunyina

Pali Citatu icungulo abakubungana balicinkwilweko ukuti ukulanda ululimi lwine lwine na kabili kupilibula ‘Ukulanguluka Inshiwa na Bamukamfwilwa mu Kucula Kwabo.’ Kalume wabula wishi kuti aafwiwa pa kupokelela ukukanshiwa kwa pa lwakwe. Kuti twalangisha ukulangulukilako kuli bamukamfwilwa ku mashiwi ya cikuuku aya kukoselesha, pa kubasansha mu mibombele yesu iya Bwina Kristu no kubishanya kwa kwangalila pamo, na pa kubapeela ukwaafwa kwa ku mubili nga ca kuti bali abawaminwa kabili mu cine cine bali mu kukabila. Ukwipusha kwalangilile ifyo ifi fintu fyalecitwa.

Pa Cine icungulo, ilyashi na limbi ilya kukafya umutima lyalangilile “Ifyo Abena Kristu Basakamana Umo no Munankwe.” Inte sha kwa Yehova balikwata icalembwa cisuma ica kusakamana umo no munankwe, ukucilisha lintu utuyofi pamo nga ifikuuku fya mwela ne finkukuma fyapama, lintu kuliko ukukabila kwa kulembela abalashi, nelyo lintu kuliko ukukabila kwa cikaya. Lelo lintu amafya yaima pa mulandu wa kukanapwililika kwa buntunse, tulingile ukubomfya ifishinte fyabimbwamo mu kufunda kwa kwa Yesu pali Mateo 5:23, 24 na 18:15-17. Ukucilisha lintu caisa ku mitantikile ya fya makwebo pa kati ka bamunyina kuliko ukukabila kwa kutemwa kwa bucibusa no kubelesha ukusakamana ica kuti nangu uwingishe ncito nelyo uwaingile ncito mu kubamo akaso tashukile ukwampana kwa ku mupashi.

Ukulanda Ululimi Lwine Lwine Kupilibula Ukumona Imyendele Yesu

Ukukabila kwa kumona imyendele yesu kwalyebekeshiwe mu kubwekeshabwekeshapo. Muli fyo, kalanda wa kubalilapo pali Cine icungulo alandile pa mutwe wa lyashi “Ukumfwa no Kusunga Icebo ca kwa Lesa.” Alangilile ukuti kwaliko imilandu ibili iikalamba iya kwishila kwesu ku mabungano: ukupokelela ukwishiba kwalungikwa no kukuntwa ukubombela pali uko kwishiba.

Ilyashi lya kubalilapo pali Citatu ulucelo lyaimishe icipusho ca kusonsomba “Kristu ‘Apatile Ubupulumushi’—Bushe Walibupata?” Tacaba icakumanina ukutemwa ubulungami. Tufwile na kabili ukupata ubupulumushi pa kuti twingakwata kampingu musuma, pa kusungilila ukwampana kusuma na Yehova, pa kusengauka ukuleta umuseebanya pe shina lyakwe, kabili pa kusengauka ukulobolola ifisabo fya bupulumushi—ukubola ne mfwa.

Ilyaampana mu kupalamisha kuli uyo mutwe wa lyashi lyali lyashi lyakonkelepo, ilyali no mutwe wa kuti “Kaana Ifya Kwelenganya fya ku Calo, Supila Ifya Cine Cine fya Bufumu.” Satana, Efa, na bamalaika bawa bonse basupile ifya kwelenganya ku boni bwabo. Ifya kwelenganya ifya ku calo, ifyakwatamo ifiloto fya ku mubili nelyo ifyo ifibomba ne milandu ishili ya mwi funde, fifumamo ubulanda nga te ncitilo yalubana iyabipisha. Ku kulwisha ifi fya kwelenganya, tufwile ukusupila ifya cine cine ifya Bufumu ukupitila mwi sambililo, ipepo, ukusangwa ku kulongana, no butumikishi bwa cintubwingi.

Pa kwikala ubumi bwa Bwina Kristu ubwalungama, tufwile na kabili ukumfwila ukufunda kwapeelwe pali Citatu icungulo mu lyashi “Mwe Bena Kristu—Ikalileni mu Ndalama Mukwata.” Ukufilwa kwa kucita ici kuletako ifya kufumamo fya kucena lwa ku mubili na lwa ku mupashi. Inshila ya mano yaba kulama ukufwaisha kwa umo ukwa kaso pa kukanaitumpika mu nkongole shishakabilwa na pa kupekanya ukubomfya kwa ndalama ukutuntulu kabili lyene ukukakatila kuli kwene. Pa nshita shonse tufwile ukulundulula ukuipeelesha kwa bukapepa. Capamo no kwikushiwa, iyi e nshila ya bunonshi bukalamba.—1 Timote 6:6-8.

Ubucindami bwa kumona ukubishanya kwesu bwalikomailwepo mu lyashi lya pali Cibili “Bushe Ifibusa Fyobe Fibusa fya kwa Yehova?” Ifibusa fyesu filingile ukuba Bena Kristu abafwala ubuntu bwapala ubwa kwa Kristu kabili ababa abapimpa mu mulimo wa kushimikila. Abakubeleshanya na bo aba ku calo tababa fibusa fya kwa Lesa, kabili te kuti twangalile pamo na bo ukwabulo kuleto kucena kuli fwe bene. Nangu fye ni mu kati na nkati ka cilonganino, tufwile ukuba abasalulula nga ca kuti ukubishanya kwesu kuli no kuba ukwa kukuulilila mu cine cine.

Ukufunda kuli pa mulu ukukuma ku myendele kwalyebekeshiwe mu kumonekesha ne cilangililo ca muno nshiku. Cali no mutwe “Ukubomba ne Ncitilo sha Mucenjelo Isha kwa Ciwa.”

Ululimi Lwine Lwine Ukufunda ku Ndupwa

Ilyalekabilwa apakalamba lyali lyashi lya pali Citatu “Mwe Bafyashi—Fikilisheni Ukukakililwako Kwenu!” Abafyashi abene bafwile ukwishiba ukufwaya kwa kwa Lesa no kulakucita apapela amaka yabo yonse. Bafwile na kabili ukulafunda Icebo ca kwa Lesa mu bana babo. Mu kulundapo, tacili icakumanina ukusenda fye abana ku kulongana kwa Bwina Kristu na mu butumikishi bwa mwi bala. Bafwile ukusambilishiwa ukutemwa Yehova no kumona amano yabomba aya kucita ifintu fya bukapepa.

Mu kukonkapo kwaishile ukukonkana pa “Ulupwa mu Kasuba Kesu.” Kalanda wa kubalilapo alangilile ukuti ulupwa lwatuntwike kuli Lesa. Bashibo bafwile ukuumfwana bwino ukulosha ku milandu ya ku mupashi. Banyina bafwile ukuba abene mayanda basuma, kabili abana balingile ukulanga umucinshi kuli Yehova pa kubombela pamo na bafyashi babo.

Kalanda wakonkelepo alangishe ukuti ulupwa luli “Pe Samba lya Kusansa ku Fibambe.” Ukutitikisha mu fya bunonshi kulebuula icikuko ca kuko. Icifulo ca ncito caisulamo na mesho ya kucita icalubana, kabili amalyashi yafimbwa no lukaakala, ukwampana kwa bwamba kushili kwa mwi funde, no kwipukisha kwa fya ku mubili. Ukukambisha kufwile ukutendeka mu kubangilila, kabili umukoosha ukalamba ulakabilwa ku kucimfya ifya kusonga fya ku calo. Ukubomfya kusuma kulingile ukucitwa ukwa fibombelo fya teokratiki ifyapayanishiwa na Watch Tower Society.

Ilyashi lyakonkelepo, ilyalelanda pa ‘Kubakwa kwa Lupwa Ukwingila mu Calo Cipya,’ mu kulundapo lyaebekeshe icishingamo cakatama ico abafyashi bakwata. Ukukansha kwa bana kufwile ukucitwa mu kuba no kucincila kukalamba. Ukufunda kwawama kwalipeelwe ukulosha ku masambililo ya Baibolo aya lupwa ne ca kusambilila, conse ku mifwaile ya kufika pa mitima ya bana. E lyeka fye lintu abafyashi na bana bengacetekela ukubakwa ukwingila mu calo cipya ngo lupwa.

Ukupayanya ukufunda kwawama ku mibele ya lupwa umo Inte ishingi baisanga abena lyali lyashi “Ukubomba mu Kati na Nkati ka Cinshingwa-Ŋanda Cayakanikana.” Abo ababa mu mibele ya musango uyo balifundilwe ukukanaleka ukucetekela ukuti uushasumina bushiku bumo pambi kuti aba uwasumina. Poosa inshita no munobe wa mu cupo ushasumina kabili shininkisha ukuti wafikilisha conse ico cifwaikwa ku munankwe wa Bwina Kristu. Kuti wakwata ukwaafwa ukufuma kuli baeluda nelyo nakalimo ukufuma kuli bambi ababa mu mayanda yaakanikana.

Ukulanda Ululimi Lwine Lwine Kuli Bambi

Mu kulingisha, ukusakamana kukalamba kwalipeelwe ku kubomfya kwesu amashuko ya mu nshita ukusambilisha ululimi lwine lwine kuli bambi. Muli fyo, pali Citatu ulucelo abakubungana baumfwile ilyashi “Bomfya Inshita Yobe iya Mutengo Mano Mano.” Pa kucita ifyo tufwile ukwimika ifiise ntanshi, mu kumfwana na Mateo 6:33, iisoso kuti: “Lelo mubale mufwaye ubufumu bwa kwa Lesa no bulungami bwakwe.” Ico cisanshamo ukubika inshita pa mbali kwi sambililo lya Baibolo lya pa lobe, ukusangwa ku kulongana konse, no kuba uwa lyonse mu butumikishi bwa mwi bala. Ici cifwaya ukuti tulubule inshita ukufuma ku fishacindamisha nangu cingati mibombele ya musamwe. Ukwipusha ukwingi kwalangishe fintu bamo balecita ifyo.

Tatufwile ukulaba ukuti tuli Nte sha kwa Yehova. Pali Cine icungulo, ifilangililo ifingi fyacinkwileko icishinka cine ico pe samba lya mutwe “Twalilileni Ukulanda Ululimi Lwine Lwine pa Kashita Akali Konse.” Ifi filangililo fyalangilile fintu ici cingacitwa mu bunte bwa mu musebo, mu bunte bwa mu lyashi, na ku kubomfya lamya. Ukutemwa kwabula akaso ukwa kuli Yehova Lesa no mwina mupalamano wesu kukatusesha ukulanda ululimi lwine lwine pe shuko lya mu nshita ilili lyonse.

Ukwampana mu kupalamisha kuli uyu mutwe kwali mipeelele yakonkelepo “Amapaalo ya Abo Abashileshalesha.” Mu kupusana kwamonekesha na Kristendomu kwaiminina ukuteyanya kusambilisha ukwa mu kusaalala kwa calo ukwa Nte sha kwa Yehova. Ngo muntu umo umo, tulingile ukukaana ukutitikisha konse, pamo nga ukukaanya kwa balashi, ukukanalangulukilako kwaanana, ne mpika sha mu fya bunonshi. Ifilangililo fyashimpilwe pa citabo ca Ukupelulula Ukufuma mu Malembo fyalangilile fintu uku kutitikisha kwingacimfiwa.

Na kabili ukukoselesha ukushimikila kwapimpa caali cilangililo ca mu Baibolo Ukucita Ukufwaya kwa kwa Lesa mu Kuba no Kupimpa. Calangilile ifyo Yehu apimpile kwi shina lya kwa Yehova kabili na fintu cili icacindama kuli ifwe ukulangisha ukushipa kumo kwine no kupimpa ku mulimo wa kwa Lesa.

Ifikakulwa Fye Bungano

Kwaliko ifyakakwilwe fibili ifya kucincimusha, mu ciNgeleshi na mu ciGerman mu kati ke bungano. Ulwa kubalilapo muli ishi mpapulo lwakakwilwe mu kulundana ne lyashi lyali no mutwe “Ukupususha Ubumi Bobe ku Mulopa—Shani?” Kalanda mu kubalilapo alandile pa lwa masanso yayampana no kukuushishamo kwa mulopa. Asonteleko ukuti kwalibako ifya kupyanikapo ifingi ku mulopa mu kubweseshapo ukulufya kwa mulopa. Lelo Inte sha kwa Yehova bataluka ukufuma ku mulopa te pa mulandu wa kuti waba uwa busanso lelo pa mulandu wa kuti ukupokelela wene kukaanashila. Balatalukako, te pa mulandu wa kuti umulopa kuti pambi wakoweshiwa, lelo ni pa mulandu wa kuti walicindamisha kuli Lesa. Umulopa uyo mu cine cine waba uwa kupususha ubumi mulopa wa cilubula uwa kwa Yesu Kristu. Mu kusondwelela kalanda atemwine bakomfwa bakwe bonse pa kukakula broshuwa wa mabula 32 How Can Blood Save Your Life?

Icakakwilwe na cimbi icacindamisha caishile mu kulundana ne lyashi “Fwailisheni Yehova, Imwe Mwe Bantu.” Nga fintu caba ilingi line, abantu tabalefwailisha Lesa. Ukubako kwa mabutotelo ayapusanapusana ayengi kulangilila fintu ukufwailisha Lesa ukwa muntu kwatungululwa bubi bubi kwaba pa mulandu wa kuti alisuula Icebo ca kwa Lesa. Nga fintu cimonwa mu malipoti yesu aya Cibukisho umwaka umo umo, amamilioni balekabila ukwafwiwa ukubuula ukwiminina kwabo kuli Yehova. Esaya 55:6, 7 ilangilila fintu Yehova mu cine cine aba Lesa wa kutemwa kabili uwa luse, uwaipekanya ‘ukulekelela apakalamba.’ Pamo nga Inte shakwe, twalipeelwa ululimi lwine lwine pa kuti twingaafwa bambi ukuilunda kuli ifwe mu kubombela Yehova no mutima umo.

Ilelo, abantu ba kwa Yehova balolenkana no kusonsomba pa mulandu wa tubungwe tukalamba utwa bwingi bwa bantu. Pamo nge ca kufumamo, imisango yonse iya mabutotelo kuti pambi yabeleshiwa na bantu mu cifulo cesu ica kubombelamo. Pa kuti twingaafwa abaHindu, abaBuddha, abaShinto, na bambi aba mabutotelo yambi, Sosaite naipayanya icitabo cawamisha ica mabula 384 Mankind’s Search for God. Mu kubamo bulashi cipeela ifisambilisho fya kutendekelako ifya mabutotelo yakalamba ku nse ya Kristendomu. Lelo na kabili cilonsha icalembwa ca butotelo bwa bufi mu kati na nkati ka Kristendomu. Mu kuba no kwaafwa kwa ici citabo, kuti twatendeka amasambililo ya Baibolo na bantu ababelesha amabutotelo ayengi ayapusanapusana.

Ilyashi lya Baibolo no Kulandapo kwa Kusondwelela

“Beni Abaikatana ku Lulimi Lwine Lwine” wali e mutwe wa lyashi lya Baibolo ilya pali Cisano. Kalanda alangilile ukuti nangu cingati indimi shapusanapusana amakana yatatu nomba shibomba nge fipindami ku kwikatana, ululimi lwine lwine lwaba maka yekatanya ayakalamba. Lwalicingilila Inte sha kwa Yehova ku filubo fya Babiloni, lwalibasambilisha ukushila kwa bumi no mulopa, kabili lwalibaafwilisha ukwikala ku fishinte fya Baibolo ifyo fibanonsha lwa ku mupashi na lwa ku mubili. Bonse balingile ukuba abakumako ku kusambilila no kulanda ululimi lwine lwine, pantu ni beka fye abacite fyo e bakapusunsuka Armagedone. Takuli nshita ya konaula mu kumfwila ukufunda kwa pali Sefania 2:1-3.

Pa numa ya kufunda kwawama ukwa mu Malembo pa kukabila kwa ‘Kuba Abasakamana mu Kupepa,’ kwaishile ukulandapo kwa kusondwelela ukushimpwa pa mutwe wa lyashi “Ukwenda mu Kumfwana no Lulimi Lwine Lwine.” Impendwa ya bantu nomba abaleenda mu kumfwana no lulimi lwine lwine mu cine cine ileingilishiwako. Kabili ukwangwako ku lulimi lwine lwine kwalilangilwe kuli abo abasangilwe kuli aya mabungano ku busaka bwabo, umuyano, no kumfwana kwa kuteyanya. Ifyakakwilwe fyapulintwa ifipya fikafwilisha bonse Inte sha kwa Yehova ku kwananya ululimi lwine lwine mu kufumamo cimo nga nshi.

Kalanda wa kupelako uwe bungano aibukishe bonse ulwa kukabila kwa kushipikisha. Alangishe ukuti pamo nge ca kufumamo ca ili bungano, bonse balingile ukukoshiwa mu mupampamina wabo ku kuya ku ntanshi. Lyene asondwelele mu kuba na mashiwi ya kuti: “Shi natutwalilile ukwenda mu kumfwana no lulimi lwine lwine ulwapeelwa na Lesa pa kuti kuti twatasha Shifwe wa mu mulu uwakwato kutemwa, Yehova Lesa, nomba na ku ciyayaya conse!”

[Akabokoshi pe bula 26]

Impendwa ya pa mulu iya basangilweko pe bungano mu West Berlin yali 44,532, kabili 1,018 balibatishiwe. Casendele aba kuya ku lubatisho amaminiti 19 ku kwenda mu mulongo ukufuma mu Olympia Stadium, kabili mu kati ka iyi nshita kwaliko ukutoota kwatwalilila. Kwaliko icisebele caibela ica makombe yalande ciNgeleshi. Bamo aba aba 6,000 baumfwile programu yonse mu lulimi lwabo. Pali ili bungano, palipo na kabili 4,500 ukufuma ku Poland; mu kati ka maawala yabili akasuba pa kati, ifilundwa fye Bumba Litungulula bapeele amalyashi ayepi ku kumwenamo kwabo.

[Ifikope pe bula 24, 25]

1. Olympia Stadium, West Berlin

2. Programu ye bungano ilya German

3. Amabasi imyanda ibili yaletele amakombe ukufuma ku East Germany

4. Abakubungana aba ku Poland baali aba nsansa ukupokelela ifyakakulwa fyapulintwa

5. Ifya kuyemfya fya maluba fyayemfeshe ukumoneka kwa cifulo

6. A. D. Schroeder, umo uwa filundwa fye Bumba Litungulula pa cisebele mu West Berlin