Ukobelwa ne Mbila Nsuma

UMUTUMWA Paulo aali mu mibele yayafya iishili ishaishibikwa ku Nte sha kwa Yehova abo abali abatumikishi ba nshita yonse—aali uwabulisha nga nshi mu fya ndalama. E co mu Korinti abuulile umulimo wa pa nshi uwa kubila amatenti uyo untu asambilile ilyo aali umusepela. Uyu mulimo wali uwakosa, kabili pa nshita shimo pambi amaboko yakwe yalisuumine umulopa ukufuma ku nsalu ya matenti iyakakabala. Indalama shasangilwe shapayenye fye ifya kulya ne fya kufwala, lelo aali uwaikushiwa, pantu lintu umulimo wakwe uwa ku mubili wapwile akasuba kamo kamo, abikile ifibombelo pa nshi ifya mulimo wakwe kabii acitile cintu akonkele ku Korinti mu cifulo ca ntanshi—ashimikile imbila nsuma!—Abena Filipi 4:11, 12.

Pa nshiku she Sabata, Paulo alolele kwi sunagoge. Ca cine, Paulo pa kubalilapo atununwike amabumba yakwe mu Korinti “mu kunaka na mu mwenso na mu kututuma ukwingi.” (1 Abena Korinti 2:1, 3) Lelo ukucincimushiwa ku kwankulako kwa bamo ku bukombe bwakwe, Paulo atwalilile “mwi sunagoge isabata lyonse alapelulula, no kunasha abaYuda na bena Hela.”—Imilimo 18:1-4.

Pa nshita imo, nangula ni fyo, Paulo aali no kucita ifingiko panono ukucila pa kushimikila inshita lubali. Lyene kwaishile Sila na Timote ukufuma ku Makedonia mu kuba no musangulo wa bukapekape uo ‘bapeele mu kubulwa kwakwe.’ (2 Abena Korinti 11:9; Abena Filipi 4:15) Ica kusansamusha, na kabili, cali ni mbila ya kuti bamunyina mu Tesalonika baleiminina abashangila ukwabula ukusakamana ukupakaswa.—1 Abena Tesalonika 3:6.

Ica kufumamo kuli Paulo? “Paulo alaobelwo kubile cebo [“apeeleshe nshita yakwe yonse ku kushimikila,” The Jerusalem Bible; Today’s English Version], aleshimikisha ku baYuda ukuti Yesu e Kristu.” (Imilimo 18:5) Ukwilulukwa ku kutitikisha kwa mu fya ndalama pa nshita imo, Paulo taali na kutusha ukufikila abwelele ku kushimikila kwa nshita yonse. Abwelele kuli uyu mulimo mu kuba na maka yabamo lupikwe no kucincimuka, te kushimikila fye ku baYuda lelo nelyo fye ukubuula inshita ya kulemba iya ntanshi iya makalata yakwe ayapuutwamo—kalata ku Abena Tesalonika!

Icipasho Kuli Ifwe Ilelo

Icalembwa ca mulimo ukalamba uwa kwa Paulo mu Korinti calibakililwa pa kukoselesha Abena Kristu bonse ukuba abaobelwa ne mbila nsuma. Paulo alimwensekeshe ukuti Shikulu Yesu umwine alipeele ku basambi bakwe umucinshi ukalamba uwa kuba “ulubuuto lwa pano isonde.” Tabaali na kufisa ulu lubuuto. Yesu abebele ukuti: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu mulu.” (Mateo 5:14-16) Ici capilibwile ukukwata ukwakanamo kwakumanina mu kushimikila umulimo wasobelwe na Yesu. (Mateo 24:14; 28:19, 20; Imilimo 1:6-8) Ukushimikila kwa iyi mbila nsuma ya Bufumu wali e mulandu ukalamba uwa kubako kwa cilonganino ca Bwina Kristu.

Abena Kristu ba mu kubangilila, ukupala Paulo, babuulile uyu mulimo wa kushimikila mu kukatama. Muli ifyo, lintu abalwani ba kwa Lesa batontonkenye ukuti balishimishe ulubuuto lwa cine cine pa kwipaya mu bunkalwe “Kelenganya wa mweo,” abakonshi bakwe balitwalilile nga ulubuuto lwa calo, ukushimikila mu kupikintika. (Imilimo 3:15) Nangu fye kupakaswa takwashibenshe ukubombesha kwabo. E fisosa icalembwa ca Baibolo ukuti: “Ubushiku no bushiku tabalekele ukusambilisha no kubila mwi tempele na ku [ŋanda ne ŋanda, NW] ukuti Yesu e Kristu.” (Imilimo 5:42) Takuli nangu cimo icali no kubacilikila!

Mu nshita sha muno nshiku, Abena Kristu mu nshila yapalako balyobelwa ne mibombele ya kucitilo bunte. Mupepi na ku kupwa kwa mwanda wa myaka uwalenga 19, abasambi basakamanisha aba Cebo ca kwa Lesa batendeke ukumona ukukabila kwa kwakana icine ca Baibolo na bambi. Zion’s Watch Tower Tract Society—ukuteyanya uko ukwasanguka ukwa pa kati ka nko mu cipimo ca mibombele—kwabele kuteyanya kwalembeshiwa mwi funde mu 1884. Aba basambi ba Baibolo, abaishibikwa ukutula 1931 pamo nga Inte sha kwa Yehova, mu cine cine balisusha isonde no kwishiba kwa Cebo ca kwa Lesa. Imibombele yabo iikalamba yafumamo umulalo ukalamba uwacila pa mamilioni yane abakosa! Kabili ukwabula ukutwishika impendwa yabo ikatwalilila ukutanunuka pe samba lya butungulushi bwa kwa Yehova.—Esaya 60:22.

Bushe Ulebomba Ulubali Lobe?

Yesu asosele ukuti: “Ukulobolola kwena kukalamba, lelo ababomfi nabacepa.” (Mateo 9:37, 38) Mu 1990 mupepi na bantu amamilioni ikumi balisangilwe ku Cibukisho ca mfwa ya kwa Kristu. Mwandi kwenekela kwa kupapusha ukwabako ukwa kulobolola kwaingilishiwako ukwa mu kusaalala kwa calo! Lelo ilintu tulesekela muli uku kutanunuka kwatwalilila, umo umo afwile ukuipusha umwine ukuti, ‘kufika ku cipimo nshi ine ndeyakanamo muli uyu mulimo ukalamba? Bushe ndecita ifyo lyonse—cila mulungu nga cingacitika?’

Baeluda bafwile ukubuula ubutungulushi muli uyu mulimo pamo nga ‘ifya kumwenako ku mukuni.’ (1 Petro 5:3) Ca cine, baeluda abengi balikwata incito sha ku mubili. E fyo cali na ku mutumwa Paulo ilintu aali mu Korinti. Nalyo line, abikile inshita pa mbali ku mibombele ya kushimikila iya lyonse. Baeluda abengi ilelo mu kupalako balobelwa ne mibombele ya ku mupashi pa mpela sha milungu. Ici kuti cakwata ukusonga kwa maka kabili ukwa kukoselesha pali bonse mu cilonganino. Mu myeshi imo lintu ukubombesha kwaibela kwabikwako, ifilonganino fyafulilako filakwata icinabwingi ca bakasabankanya mu mulimo wa bupainiya. Inkama? Baeluda balabuula ubutungulushi ponse pabili mu kushimikila na mu kuteyanya ukutantika kwa mulimo wa mwi bala.

Ababomfi batumikila mu kupalako kuti baba ukusonga kusuma pa cilonganino nga ca kuti lyonse baleyakana mu mulimo wa mwi bala. Ibukisha, Amalembo yafwaya ukuti babe “aba mushiye, . . . pa kupyunga bwino badikone baimwene ncende isuma.” (1 Timote 3:8, 13) Bucishinka mu mulimo wa mwi bala bwaliba ubwakabilwa kuli munyina ku kufikapo pamo nga eluda nelyo umubomfi utumikila.—Tito 1:8, 9.

Ukupala Paulo, bamo baliba na maka ya kucefyako incito ya ku mubili na muli ifyo ukucita bupainiya. Impendwa ya bapainiya ba nshita yonse, aba kwafwilisha, na baibela yalingilishiweko ukufuma pali 137,861 imyaka fye ikumi iyapitapo ukufika kuli 536,508 mu 1990. Mu kushininkisha, lipaalo fye no kusuminisha kwa kwa Yehova e fyali na maka ya kuletako ici. Bapainiya, nangula ni fyo, bafwile ukusakamana ukubomfya inshita yabo mano mano, te kupenda fye inshita. Bapainiya, bushe muli abaipekanya bwino kabili abafumamo cimo mu butumikishi? Bushe mulatukuta ukucita ukuwamyako kwatwalilila pa kuti ubutumikishi bwenu bukabe mu cine cine ubwa kutwale fisabo?

Ifilambu fya Butumikishi Bwashikatala

Bushe mulatesekesha ifyebo ifikosha ubumi ifipeelwa cila mweshi mu Ulupungu lwa kwa Kalinda no unankwe, Loleni!? Ukwabula ukutwishika mulatesekesha. Bushe ukutesekesha kwenu kwalimusesha ukukwata ukwakamamo mu kwananya aba bamagazini? Nkashi umo mu Botswana alicitile ifyo. Ku numa alekaanya icine, lelo umulume wakwe alemubelengela muli bamagazini. Mu nshita alyalwile umuntontonkanya no kuba Inte. Nangu cingati tabelenga, aliba uwatunguluka nga nshi mu kushalika bamagazini, ukusoso kuti, “Nshaishiba ukubelenga, lelo umulume wandi alambelengela aba bamagazini. Ndaipakisha bene, kabili ndeshininkisha ukuti na iwe wine ukaipakisha.”

Mulandu nshi te kukwatila ukwakanamo kwa cila mulungu muli uyu mulimo wa kupususha ubumi? Ilintu fye wakwata imilingo ya ku mupashi, icilonganino ca Bwina Kristu cikaba ica nsansa ukukwafwilisha ukutendeka. Ukushalika bamagazini, nangu cibe fyo, lwaba lubali fye lumo ulwa mulimo. Uuli onse uwaobelwa ne mbila nsuma alatukusha ukukwata ubutumikishi bwashikatala. Ku ca kumwenako, Watch Tower Society ilasabankanya ifitabo fyakakwa mu mamilioni, kabili ifi filatambikwa ku cintubwingi pamo nga intulo ibelelela iya ca kulya ca ku mupashi. Bushe waliba uwafikapo mu kukumanina mu butumikishi bobe ku kushalika ifitabo, pamo nga Kuti Waikala Kuli Pe na pe Muli Paradise Pe Sonde?

Kabili ni shani pa lwa bantu balanga ubuseko? Bushe ulasunga icalembwa cisuma pa kuti wingacita ifipempu fya kubwelelamo pali bene? Ifipempu fya musango uyo kuti fyatungulula ku lubali lwa mulimo uyo uleta ubuseko bukalamba pali fyonse—umulimo we sambililo lya Baibolo ilya mu ŋanda. Ibukisha, Yesu atukambishe pali Mateo 28:19, 20 ‘ukupanga abasambi, ukubabatisha.’ Ico cilepilibula ukusambilila Baibolo na bene. Ca cine, ukutampa isambililo ilingi line kufwaya umute. Nte umo akumenye abaupana babili aba cikoloci abo mu kucincimuka basumine isambililo lya Baibolo. Lelo balalikishe isambililo imilungu itatu mu kukonkana. Mu kupelako isambililo lyalitampile. Lyene, pa nshita imo, abaupana babili baputawishe isambililo mupepi no mulungu uuli onse umbi. Mu kulekelesha, nangula ni fyo, umukashi alilundulwike ukufika ku cipimo ca kubatishiwa. “Pa numa ya kubatishiwa,” e fibukisha munyina, “amenso yakwe yaiswilemo ne filamba fya nsansa, ifyo fyaletele ifilamba fya nsansa kuli ifwe bonse babili umukashi wandi na ine.” Ee, ukuba uwaobelwa ne mbila nsuma kuleta ubuseko bushingalondololwa!

Ilenge we Mwine Ukubomfiwa!

Yesu Kristu no mutumwa Paulo balitwimikila ifipasho fya kuipeelesha kwawama ukupashanya. Kabili twalikwata ifya kumwenako ifingi pa kati ka Nte sha kwa Yehova isha muno nshiku. Inshita naifika kuli bonse abo baishiba imbila nsuma ukuba abacincila mu kukumanina mu kuishibisha kuli bambi. Baibolo itwebekesha ukuti ukubombesha konse ukwa musango uyo “te kwa fye.”—1 Abena Korinti 15:58.

Ukupala Paulo, abengi balikwata ukukakililwako kwa mu fya ndalama uko bali no kukumanisha. Pa mulandu wa ici, abengi te kuti babe na maka ya kucita bupainiya. Lelo mu kuba no kwaafwa kwa kwa Yehova, bonse kuti bakonka ukupanda amano kusuma ukwapeelwa pali Abena Roma 12:11 ukwa kuti: “Ku kupimpa mwiba banenuka; ku mitima mube ababilima; kuli [Yehova, NW] mube abapyunga.” Kabili nga ca kuti imibele yayaluka ku kusuminisha inshita yakulilako ukupooswa mu mulimo wa kwa Yehova, uuli onse uyo mu cine cine atemwa Yehova, ukupala Paulo, akashukila ishuko lya mu nshita. Beni abaobelwa ne mbila nsuma! Ukucita fyo takwakalete fye amapaalo nomba lelo ku nshita ya ku ntanshi kukafumamo ubumi bwa muyayaya mu kuba no buseko bwabule mpela ne nsansa!—Mateo 19:28, 29.

Nangu cingati Paulo apatikishiwe ukubomba lwa ku mubili, apeeleshe isabata ku kushimikila

Baeluda na babomfi batumikila bafwile ukubuula ubutungulushi mu mulimo wa mwi bala pa kuti bengafikapo ku mashuko yabo aya mulimo. Lintu bacita ifyo, ica kumwenako cabo cilakoselesha bonse mu cilonganino

Ukwilulukwa pa nshita imo ukufuma ku kutitikisha kwa mu fya ndalama, Paulo tali na kutusha ukufikila abwelele ku kushimikila kwa nshita yonse

Nkashi ushaishiba ukubelenga no kulemba alashalika bamagazini pa kusoso kuti: “Nshaishiba ukubelenga, umulume wandi alambelengela aba bamagazini. Ndaipakisha bene, kabili ndeshininkisha ukuti na iwe wine ukaipakisha”