Ifilangililo—Ulufungulo ku Kufika pa Mitima

DAVIDI alebutusho bumi bwakwe. Umulwani wakwe ni Shauli, imfumu yasubwa iya kwa Israele. Nangu cibe fyo, Shauli mwaume waisulamo ulupato kuli Davidi, uwaisulamo na kalumwa. Mu kufwailisha kwakwe ukwa bukomi, imfumu nomba naileta capamo na yo abashilika 3,000. Pa kucilwa apakalamba mu mpendwa, Davidi na baume bakwe nababelama mu kati nga nshi aka ninga mu matololo.

Ilintu Davidi na baume bakwe babungana capamo mu mfifi, imibele yaaluka mu kupumikisha. Imfumu Shauli yaingile muli iyi ininga ine ku kupemwina mu nda. Davidi mu mutalalila afika pa mulwani wakwe uushikwete maka, mu kuba ne canso mu minwe yakwe. Lelo ku kupapushiwa kwa baume ba kwa Davidi, tepeye imfumu. Aputula fye icisempe ca ca kufwala ca kwa Shauli. Ukumfwa ubulanda nelyo fye ni mu kucite ci, Davidi asoso kuti: “Ca kutali fye kuli ine ukucite ci cintu kuli shikulu, ku wasubwa wa kwa Yehova, ku kumutambikilo kuboko kwandi, apo wene abo wasubwa wa kwa Yehova.”—1 Samwele 24:1-6.

Ubu bulondoloshi bwalembwa ubwa Baibolo busambilisha isambililo lyashika pa lwa mucinshi ku bulashi bwapeelwa na Lesa. Na kabili bufika pa mutima, nakalimo nelyo fye mu kufumamo cimo nga nshi ukucila ukufunda kwa mu kulungatika. Aya musango yo yaba e maka ya bulondoloshi ubwalembwa mu Cebo ca kwa Lesa ku kutusambilisha.—Abena Roma 15:4.

Mu kulinganako, Inte sha kwa Yehova balatukuta ukucite fingi ukucila na pa kulondolola ifishinka lintu baleshimikila imbila nsuma, pa kutungulula amasambililo ya Baibolo aya mu ŋanda, pa kupeela amalyashi ya mu Malembo, nelyo pa kucitilo bunte bwa mu lyashi. Besha ukufika pa mitima pa kushimika ifya kukumanya no kubomfya ifilangililo. Citabo ca Kutungulule Sukulu lya Butumikishi bwa Teokratiki cabo cilondolola ukuti: “Ifilangililo fibimbulo buseko no kusobolamo imfundo shacindama. Fikumbamo imitontonkanishishe ya umo no kulengo kube cayanguka ukwikata amatontonkanyo ayapya. Ifilangililo fyasobolwa bwino bwino filundanya ukusonsomba kwa muntontonkanya no kufishapo kwabikwako inkuntu. . . . Akashita kamo, icilangililo kuti cabomfiwa mu kusengauka kafindwe nelyo ukusonga kubi.”a—Ibula 168.

Mu citabo cakwe Essentials of Public Speaking, Warren DuBois amona ukuti: “Lekeni kalemba nelyo kalanda alumbulule imfundo shakwe ukupitila mu ncitilo nelyo amashiwi ya bantunse, kabili umutwe wa lyashi uwaundalila ulalundako ubumi no kusekesha.” Muli ifyo, ukulundako ubumi no kusekesha ku bukombe ubo kale kale buli ubwa kucincimusha kabili ubwa kupeelo bumi kuti mu kushininkisha kwaafwa abatumikishi ba Bwina Kristu ukufika pa mutima.

Ifilangililo Ifyo Ifisambilisha

Musango nshi uwa filangililo uubomba mu kuwamisha? Ilingi line, ni umo uwashimpwa pa cintu bakakutika bengalundanyako mu kwanguka. Yesu Kristu aimike ica kumwenako cishaiwamina muli uku kuloshako. Mu Lyashi lyakwe ilya pa Lupili, Yesu alandile pa lwa fintu fya musango yo ifyaseeka pamo ngo mucele, inyali, ne fyuni. (Mateo 5:1–7:29) Ku ca kumwenako, uuli onse aali uwabeleshanya ne nyali isho shalebomfya amafuta ya miolife kabili isho pa nshita shimo shalebikwa pa ca kutekapo inyali. E co, abasambi ba kwa Yesu bafwile balimwensekeshe ukuti balingile ukuba bakasenda ba lubuuto lwa ku mupashi lintu abebele ukuti: “Abantu tabasanike nyali no kuikupikapo icipe; lelo baiteka pa ca kutekapo inyali, na yo yabalikila bonse abali mu ŋanda. E fyo ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu mulu.” (Mateo 5:15, 16) Ifilangililo fyabulo kupikana ifyo filinga umutwe wa lyashi fikaafwa abatumikishi ba Bwina Kristu ukulondolola imfundo ne fisambilisho fya mu Baibolo.

Nakalimo ifilangililo fyacilapo ukube fya maka ifya kwa Yesu fyatontele pa bantu. Languluka ifyo fyalembwa muli Luka ifipandwa 15 na 16. Bakalemba na baFarise balengulwile Yesu pa kupokelela ababembu na basangushi. Mu kwankulako, ashimike amalyashi ya kukunta pa lwa bantu. Alandile pa lwa kwa kacema uwasangile impaanga yakwe iyalubile, umwanakashi uwasangile indalama yakwe iyalubile, umwana monaushi uwabwelele ku mwabo, no mulashi uushalungama.

Ifilangililo fyashininkishiwa ne fya kukumanya fya mu bumi ifya cine cine kuti fyaba ifya kwaafwa ku mutumikishi wa Bwina Kristu. Ku ca kumwenako, mona cintu Alexander H. Macmillan, uwaendele mu kusaalala pamo nga kalanda wa pa cintubwingi pa myaka 60, alondolwele icine ca Baibolo pa lwa bafwa. Mu kwipipa pa ntanshi ya mfwa ya kwa wishi, uyo uwasumine ukuti umweo taufwa, Macmillan akwete uku kulanshanya na wene:

“Tata alinjipwishe icipusho ca mu kulungatika ukuti: ‘We mwana, bushe nkaba ne citendwe mu nshishi ilyo ndepembelela ubufumu ukutendeka umulimo wa buko uwa kwisushe sonde no kupwililika?’

“Ico cali cipusho ico umulumendo ashingasuka mu kwanguka ku kwikushiwa kwa muntu umukoloci uushabalile atontonkanya muli iyo ntunga.

“Mu kwasuka namwipwishe ukuti: ‘Tata, bushe mwalisendama bwino mailo?’

“Ayaswike ukuti, ‘Ee, mwana wandi, nalisendeme bwino pa numa lintu dokota ampeele utubulungwa twa tulo.’

“‘Bushe mwali ne citendwe lintu mwali mu tulo?’

“‘Iyo, nshali ne citendwe. Kanshi nga ningalaala inshita yonse, pantu lyene nshumfwa bukali.’”

A. H. Macmillan lyene abelengele wishi Yobo 14:13-15 na 3:17-19 no kusoso kuti: “E co mwamona, tata, abafwa baba mu tulo twa mfwa kabili tabeshiba icili conse ilintu bali muli iyo mibele, e co ni shani bengaba ne citendwe?”

Mwandi kusambilisha kwa kufumamo cimo! Nga ca kuti uli umo uwa Nte sha kwa Yehova, na iwe wine kuti wabomfya amalembo ne filangililo ku kwipukisha ku muntontonkanya no mutima.

Ukusanga Ifilangililo

Lelo ni kwi uko wingasanga ifilangililo fya kufumamo cimo nelyo ifyakukumanya fya mu bumi ifya cine cine? Ifingi kuti fyaletwako ukufuma mu cipao cobe ica fyebo ica cakukumanya ca pa lobe. Ku ca kumwenako, bushe ulekabila ukulangisha amapaalo ya citetekelo, amaka ye pepo, nelyo ubuseko bwa butumikishi? Nga ca kuti uli Mwina Kristu uwaipeela, mu kupalako kuti washimika ifya kucitika fyalekanalekana mu bumi bobe bwine. Kuti pambi waumfwa ifyakukumanya fishaiwamina pa kulongana kwa cilonganino nelyo lintu ulelanda na Bena Kristu banobe. Nelyo kuti pambi wabelenga icakukumanya ca kukoselesha muli Yearbook of Jehovah’s Witnesses. Na kuba, Watch Tower Publications Index ipayanya inshila ku fyakukumanya fyapulintwa ukufuma mu kushinguluke calo.

Ni shani fintu wingashimika icakukumanya mu kufumamo cimo? Ku cintu cimo, ukupayanya ukwenekela pa cipimo cimo kukulenga ukwikata ukusakamana kwa bakakutika bobe. Kuti pambi watendeka icakukumanya pa kusoso kuti: “Painiya umo asambilile pa muku wa kubalilapo ifyo Yehova apaala abo abacetekela muli wene.” Mu kwangufyanya, bakakutika bobe balapapa nga mapaalo nshi kashimikila wa nshita yonse uwa Bufumu aipakishe. Shininkisha ukubeba.

Esha ukushimika icakukumanya mu mashiwi yobe yene. Payanya ubulondoloshi bwa kulonsha, pantu pa kucite co cilundako amaka ku lyashi lyobe. Pa kulangilila mu mashiwi icikope calengama ica mibele ibimbilwemo, kuti mu kwanguka wakunta bakakutika bobe. Lelo shininkisha ukuti tauibimbile nga nshi mu kushimika inshimi ica kuti bafilwa ukumfwa umulandu uleshimikila icakukumanya. Na kabili, sengauka ukukukumya, pantu nangu ici cingalenga ilyashi ukuba ilya kusekesha mu kucilapo, kuti cacefya ukucetekelwa kobe. Pa mulandu umo wine, sengauka ukushimika amaŋumfuŋumfu nelyo ukushimika ifyakukumanya ifyo ushingalondolola.

Ukubikamo Ubumi Muli Baibolo

Ifyakukumanya fyabamo ukufunda kwacilamo fisangwa muli Baibolo ine. Ku ca kumwenako, tutile ulefwaya ukulanga umusambi wa Baibolo nelyo ibumba ukuti abana kuti babuulo kwiminina kwakosa ku lubali lwa kwa Yehova Lesa. Kuti pambi wapingulapo ukubomfya ubulondoloshi bwalembwa ubwa mukashana uushalumbulwa ishina uwalandile ku mukashi wa kwa Naamani pa lwa kwa kasesema wa kwa Yehova Elisha. Intanshi, belenga ubulondoloshi bwalembwa pali 2 Ishamfumu 5:1-5. Lyene kuti pambi waipusha ukuti: “Bushe uletontonkanya ukuti cali icakosa shani kuli uyu mukashana ukusungilila bumpomfu kuli Lesa mu calo cabamo ukupepa kwa bufi? Bushe tacasendele ukushipa pa lubali lwakwe ukulanda mu kushinina pa lwa kwa Yehova na kasesema wakwe?”

Ukusapika kwa mu kubangilila pambi nga kwakwafwilishe ukulenga ubulondoloshi ukuba ubumi. Kuti pambi wasangile ifyebo fyabamo ukwaafwa pe samba lya mitwe NAAMAN, SYRIA, na ELISHA muli Watch Tower Publications Index. Ifya kuloshako muli New World Translation of the Holy Scriptures nga fyakutungulwile ukufuma muli 2 Ishamfumu ukuya kwi Amalumbo 148:12, 13, apo tubelenga ukuti: “Mwe balumendo na bakashana kumo, mwe baume bakote na baice. Lekeni fitashe ishina lya kwa Yehova; pantu ishina lyakwe lyeka lyalisansuka, bukatebebe bwakwe bwapula pano isonde na mu mulu.” Mwandi kukoselesha ku bacaice ukulanda icebo ca kwa Lesa mu kuba no kushipa!—Imilimo 4:29-31.

Nga ca kuti uli mutumikishi wa Bwina Kristu, ‘uimone ne sambilisho lyobe’ muli uku kuloshako. (1 Timote 4:16) Wilanda fye icine mu kwanguka—langilila cene. Panga ubulondoloshi bwalembwa ubwa Baibolo ukuba ubwamonekesha kabili ubwaisulamo ubupilibulo. Bomfya ifyakukumanya ne filangililo fyalinga. Ishi shaba ni nshila sha kufika pa mutima.

[Amafutunoti]

[Icikope pe bula 29]

Ukupala Yesu, abatumikishi ba mu kasuba ka lelo kuti babomfya ifilangililo fyamonekesha ku kutwala ubukombe bwabo no kufika pa mitima