Ifipusho Ukufuma Ku Babelenga
Cinshi cintu Umwina Kristu engacita lintu wene tali na maka ya kusanga umunankwe wa mu cupo uwalinga?
Nangu cingati tuli Bena Kristu baipeelesha, kuti pambi nalyo line twaba aba nkumbabulili lintu twasubila mu mupampamina icishicitike. Ukuyumfwa kwesu kwalilumbululwa bwino pa Amapinda 13:12, apasoso kuti: “Icacetekelwa icashimba cilwaliko mutima.” Ifi e fyo Abena Kristu bamo bayumfwa lintu bafwaisha ukuupa lelo tabali na maka ya kusanga umunabo walinga. Ici calibe fyo ukucilisha kuli abo bantu umutumwa Paulo alondolwele nga ‘ababa ne nsuuna.’—1 Abena Korinti 7:9.
Yehova abikile mu bantunse ukufwaisha kwa kusanga kasailisha wa cine muli umo uwa ba bwamba bwapusanako. E ico, tacili ca kusungusha ukuti inkuntu sha musango yo shiba ishakosa mu Bena Kristu abashimbe abengi. (Ukutendeka 2:18) Uku kuyumfwa kwa lyonse pambi kuti kwaluminishiwa mu ntambi isho shibika ukukomailapo kukalamba pa kuupana (nelyo ukuupa/ukuupwa pa mushinku umo) nelyo lintu Abena Kristu abashimbe bali abashingulukwa na baupana aba nsansa mu cilonganino. Nangu cibe fyo, tacili cisuma ukusuminisha ukusakamikwa ukutwalilila pa ciputulwa ca nshita icalepa. E co ni shani fintu Abena Kristu abafumaluka bengabomba ne mibele ukwabula ukufulunganishiwa mu kucishamo?
Tacili icayanguka, kabili bambi tabafwile ukumona uku kwangwako kwati kwali fye makukumya nelyo ngo kubifiwa fye kwacepa. Lelo ku cipimo cakulilako, amaka ya kubomba nelyo ukupikulula imibele kwashintilila pa ntampulo isho umushimbe engabuula.
Tusanga ulufungulo muli ici cishinte ca Baibolo icibomba: “Mwalibe nsansa ishafulilako mu kupeela ukucila ishaba mu kupokelela.” (Imilimo 20:35, NW) Ico calandilwe no mwaume umushimbe Yesu Kristu, kabili alishibe cintu alandile. Ukucitila bambi ifintu mu kuba ne nkuntu shabulamo akaso ni nshila yawama ku kwaafwa uuli onse uwa ifwe ukucimfya ukuyumfwa ukufuma mu cacetekelwa icashimba. Cinshi cintu ici cipilibula ukulingana na fintu Umwina Kristu umushimbe akuminweko?
Tinamina ukubomba imilimo ya cikuuku ku lupwa lobe lwine na kuli bambi mu cilonganino, kabili ingilishako imibombele yobe mu butumikishi. Uku kupanda amano takuli fye ni nshila ya kusoselamo ukuti, ‘Twalilila ukubo wapamfiwa, kabili uli no kulabako pa lwa kufwaya ukuupa.’ Iyo. Ukubo wapamfiwa muli ifi fikonkelelo fya kusandulula ifya Bwina Kristu, kuti pambi wasanga ukuti ‘nawiminina ndi mu mutima obe, uwailama pa kufwaya kobe kwine’ kabili kuti wabomfya imibele yobe ilipo mu nshila ya kunonsha.—1 Abena Korinti 7:37.
Bamo abafwaisha apakalamba ukuupa balisuminisha ici ukuba ica kufimbilikisha caluma ica kupwishe nshita. Balifika fye no kwalepesha pamo ngo kusabankanya kwa kufwaya abena myabo mu manyunshipepala. Ifyo cili cawamisha, nangu ni fyo, ukubika ukukomailapo kwakulilako pa kutesekesha ubunonshi ubo bwingabuulwa ukufuma ku nshita ya bushimbe.—Twapaapaata moneni ifipande “Umushimbe Lelo Uwakumanina ku Mulimo wa kwa Lesa” na “Ubushimbe—Inshila ya Kulambula iya Bumi” mu Ulupungu lwa kwa Kalinda ulwa November 15, 1987, na “Bushe Icupo E Lufungulo Lweka fye ku Nsansa?” mu Ulupungu lwa kwa Kalinda ulwa May 15, 1992.
Pepa kuli Yehova ku kwaafwa ukushipikisha mu mibele ya bushimbe. (Abena Filipi 4:6, 7, 13) Abena Kristu abengi abashimbe basango kuti pa kubomfya inshita yabo ku kusambilila no kwetetula pa Cebo ca kwa Lesa kabili ukusangwa no kwakanamo mu kulongana kwa Bwina Kristu, baliipakisha ‘ukutusha ku myeo yabo,’ ukwalundwako nga fintu Yesu alaile abo abalemukonka. (Mateo 11:28, 30) Ici calibafwa ku kulundulula bumupashi, pa kuti bengesaba abalume nelyo abakashi abawaminako nga ca kuti mu nshita basanga umwina mwabo walinga.
Te kwesha ukulabo kuti Yehova alomfwikisha imibele ya bantu bonse abashimbe abalemubombela. Alishiba ukuti pambi te kuti uyumfwe ifyo imibele yobe iilipo e intu wingasobolapo. Shifwe wakwato kutemwa uwa ku muulu na kabili alibo waibukila pa lwa caba mu buseko bobe ubwawamisha ubwa nshita ntali, lwa ku mupashi na lwa mu nkuntu. Mu kukonkapo kuti waishiba ici mu kuba no kushimikisha: Pa kulolela mu kutekanya pali Yehova na pa kubomfya ifishinte fya Cebo cakwe mu bumi bwa cila bushiku, kuti washininkisha ukuti ali no kwikusha ukukabila kobe ukwacindamisha mu nshila iyo ili ku busuma bobe ubwa muyayaya.—Linganyako Ilumbo 145:16.